Read Banggai 2 TOMUNDO-TOMUNDO 19 Bible Online

2 TOMUNDO-TOMUNDO 19 - Banggai bible

2 TOMUNDO-TOMUNDO 19

¹Doi tempo Tomundo Hizkia lengele kolapulan moluwedoi mianoo motolu, yana siake konapakean tukon baino mapake toik moluwedoi karung salaku paloosan susaan, doibundu yana ampakono doi TEMENENO Na Bonua.

²Maka yana mosumbolii bito-bito doiyamo Elyakim, mo kapalaiyo komian doi tomundo nakamali, Sebna dulutulis negara, tukon sasaibino koimam-imam momotuamo, sulano yanila naampakon mopososuung tukon Nabi Yesaya Amos napau. Yanilakai mapake toik moluwedoi karung.

³Naiyamokai Hizkia nateteba yanila mopelenggene doi Yesaya tukon tetebadoo bunonaiya, “Naoloyo nia oloyo susaan, kita inukum tukon tinotulai. Kita buno boi-boine mo yase mosuung bai kabuso konategana.

⁴Tomundo Asyur lapamo mosumbolii bito-bito doiyamo meeng konasuludadu kapalano motatandak konapangkat sulano yana natotulaiyo ko Mian Bisa motubo. Aki nda toiyo ko TEMENENO mu Mian Bisa uga-ugaate lapamo lengele dopototulaidoo, tukon naikon ukume doi yaniladoo mo bantile! Tobikon doiya posambeangkai doi Mian Bisa tuuk doi nda mian-mian modaanoon motubo.”

⁵Salataa talimayo koteteba moluwedoi Tomundo Hizkiadoo,

⁶Yesaya sumboliiyo sasaibino dobito-bitodoo sulano napo pelenggene napotimbili nia, “Ko TEMENENO bantile, Tuan inai momatakut kalu ikoo lengele komeeng kobukutii nyata moluwedoi tomundo Asyur naata-atadoo baikon ko TEMENENO aki namoola olupute kita.

⁷TEMENENO naikon kubaiyo tomundo Asyur sulano napalatikanggene komeeng kobilita mokala sulano naabali doi tano susuungo, tukon indaa yana naikon inakate.”

⁸Suludadu kapalano doi Asyuroo yana malaat bilita baikon kona tomundo lapamo tinggale ko Lakhis tukon daanoon mopolobosi lawane kokota Libna, aki nadodoon luwe idoo. Maka ampakonokai dosuludadu kapalanodoo indaa sulano napososuung dona tomundodoo.

⁹Tomundo Asyur lapamo mantalima bilita baikon kopasukan Mesir Tirhaka tomundo Sudan katuaiyo naikon lubato molobosiyo yanila. Tobikon doiya, tomundo Asyur makapatu surat doi Hizkia tomundo doi Yehuda.

¹⁰Bunonaiya dosuratoo nabantilan, “Inai mototipu luwe mu Mian Bisa nadandi domu binalaanggonoo baikon ikoo aki aki naikon mutuwong doi limanggu lalomo.

¹¹Ikoo lapamo lengele baikon sasamba kotano kotomundo-tomundo Asyur molobosiyo, inakamas kabus. Inai mosangkayo baikon ikoo moola luput.

¹²Doi tempo kotumbunggu namanasano kokota Gozan, Haran, tukon Rezef, tukon akateyo ko Eden miano mo dungol doi Telasar, akiyokai komeeng komian moluwedoi napo pilo-pilogot komo moola salamatene yanila.

¹³Inaandokai doi kota Hamat, Arpat, Sefarwaim, Hena tukon Iwa natomundoila?”

¹⁴Salataa Hizkia talimayo dosulatoo moluwedoi sasaibino dobito-bitodoo, boobus koidan yana bacayomo. Salataa lapa yana mobacayo doibundu yana ampakon doi TEMENENO Na Bonua, tukon yana belekayo dosurat-suratoo doi TEMENENO salaano,

¹⁵ doibundu koidan yana sambeango, tukon bantile, “TEMENENO, Israel na Mian Bisa mo osulang doi kerub bunggono, tongo ikokai ko Mian Bisa mo akiyo konabunoan mo kuasaiyo sasaibino kobatomundoan doi dunia nia. Ikoomokai komo pasitakayo kotimbu tukon dunia.

¹⁶TEMENENO, palatikanggenekai oila komo sodo teali tukon kami. Lengelekai sasaibino Sanherib napototulay motuuk doikoo, Mian Bisa mo tubo!

¹⁷Kami sasaibino toiyo, TEMENENO, baikon kotomundo-tomundo doi Asyur badaango kobangsa-bangsa nasinilaka tukon akamanase konapoi tano-tano.

¹⁸Konapo pilogot-pilogot sinuwa koidan tukon inakamanas sabab dopilogot-pilogotoo akiyo konakuasa mobisa. Yanila tongo timbalang moluwedoi kayung tukon batu manusia mokubaiyo.

¹⁹Oh TEMENENO, komai Mian Bisa, oluputekai kami luwedoi Asyur mian-mianodoo, sulano sasaibino kobangsa doi dunia toiyo baikon tongo ikoo ko Mian Bisa moakiyo konabunoan.”

²⁰Doibundu Yesaya makapatu teteba doi Tomundo Hizkia baikon salaku potimbili tomundo nasambeang,

²¹ko TEMENENO bantile, “Kokota Yerusalem kokumbite tukon totu-totulaiyo ikoo, Sanherib.

²²Kai ikoo toiyo indee komu tinotosii tukon domu tinotulaidoo? Yaku, Israel na Mian Bisa, Mian Bisa moliyous! Komu sikap todudul babanggaal tuuk doiyaku.

²³Ikoo makapatu bito-bito sulano nababanggaakene baikon tukon nabadagaiyan komu loda polobosian ikoo lapamo taklukanggene kobunggul-bunggul motatandak doi Libanon. Ikoo babanggaalkene baikon ikoo moola tapeyo konakayung-kayung kauwalu motatandak tuuno tukon moola loloiyo kobokulung-bokulungo mo mosoloton tuuno sumbot doi sembeleng.

²⁴Ikoo koidan babanggaalkene baikon ikoo makalimo bubung tukon monginum paisu doi tano-tano bailon, tukon baikon sasaibino komusuludadu pipiikiyo ko Nil Paisunobatango polong mooti.

²⁵Ikoo akiyoon mubiasa lengele baikon sasaibino doiya lapamo yaku piki-pikikene salataa doilooluk? Tukon budodoiya yaku laksanakanggenemo. Yakukai komo beena doi koo kuasa sulano mumanase kokota-kota modaano kobenteng-bentengo teali abu timbunano.

²⁶Komian-mian mo dungol indaa aki namokubai oioila; yanila ngginggim tukon matakut. Yanila pokakana kobulung doi padangkai bulung motubo doi bonua atono, mo motuul kalu pinuul mbobuul tolopot mo moonas.

²⁷Bai yaku toiyo sasaibino doiya tentang kobutomu. Yaku toiyo oilamo komulinakukanggon tukon doiyayaamo komu ampakonan.

²⁸Yaku toiyo baikon ikoo nggimal tuuno doiyaku, tukon yaku lapamo ndongoliiyo tentang komu babanggaalanoo. Budodoiya yaku konoikene kopakait doi ngoolomu tukon tambang doi babamu sulano kutandane ikoo mule loloiyo kololoon ikoo mololoiyo salataa mulubatan.”

²⁹Yesaya kapatuwo koidan nateteba nia doi Hizkia tukon dotetebadoo bunonaiya, “Naiyakai komo teali tanda doikoo. Doi taun nia tukon taun salaando komian naikon kaane kogandum mo tubo susuungo. Bai nalapa doiya yanila moola masakakon gandum tukon anggur tukon yanila moola lasayo kohasilo.

³⁰Ko Yehuda miano mo daanoon motubo naikon tosuungi kotumbuno tukon yanila aman akiyo komo ganguwe yanila pokakana kotanaman mo atean tuuno koalono tukon hasilkanggene kosaono.

³¹Doi Yerusalem tukon doi Bunggul Sion bungkono naikon daano komian mo salamat, sabab ko TEMENENO lapamo tantukene baikon dolanggedoo naikon teali.

³²Naiyamokai ko TEMENENO nabinantil tentang tomundo Asyur: ‘Yana aki naikon nausokiyo ko Yerusalem kai mopanakene konapana motujuiyo dokotadoo. Kosuludadu modaano kona kalait tukon tombide akiyo komo moola loolaniyo dokotadoo, tukon doi napotikunggonan aki nabinangun kopangatang mobinetoon popookino dokotadoo molobosian.

³³Tomundo Asyur yana mule tukon loloiyo kololoon yana mololoiyo salataa nalubatan, tukon aki nausokiyo dokotadoo. Yaku, TEMENENO, lapamo basalita.

³⁴Kokota Yerusalem naikon Yaku belayo tukon Yaku lindungiyo sabab sabab Kuinodotiiyan susuunggu tukon sabab Dakuperjanjian tukon Daud Kupeleleani.’ ”

³⁵Dopopookoo koidan ko TEMENENO namalaekat lubat doi Asyur miano nabasandungan, tukon mangakate 185.000 kosuludadu. Modowakon kooloyono dowa-dowa kopai bajan-bajano tasabulo.

³⁶Sambuno bunodoiya maka Sanherib tomundo Asyur yana bangobulenggon mule doi Niniwe.

³⁷Daano kooloyo meeng, yana daanoon mososuba doi Pilogot Nisrokh bonuano, yana inakate tukon bakoko luwe Adramelekh tukon Sarezer, namala-malane. Sambuno lapa doiya yanila dampas doi tano Ararat. Maka konapau Esarhadon, namalane bailon, teali tomundo mosoboliyo yana.