Read Banggai 2 TOMUNDO-TOMUNDO 2 Bible Online

2 TOMUNDO-TOMUNDO 2 - Banggai bible

2 TOMUNDO-TOMUNDO 2

¹Laatemokai kotempono ko TEMENENO nabingkatano Elia doi surgaa tukon lolodoi mbombuul mo topu-toputar. Doiya kosinggato Elia tukon Elisa lapamo lengget luwedoi Gilgal,

²tukon doi loloon tanga Elia bantile doi Elisa, “Dungolokai naimbaa. Ko TEMENENO sumboliiyaku motaus doi Betel.” Bai Elisa timbiliyo, “Tukon TEMENENO sambuno mo tubo tukon Tama naansaang, aki kai naikon kuotinggale Tama.” Jadi yanila polaing-laing mobanggadudukene konapo ambakonan polong doi Betel.

³Meeng kotambuno konabi mo dungol idoo ampakon posuunggene Elisa tukon sadaiyo, “Ikoo toiyo baikon doi oloyo nia komutuan naikon otinggalemo ikoo sabab yana TEMENENO bingkatemo?” Elisa timbiliyo, “Oode, yaku toiyomo, bai banggalokai, maunaakimo ndabisalakene dolanggedoo.”

⁴Lapa doiya Elia bantile doi Elisa, “Dungolokai naimbaa, ko TEMENENO sumboliiyaku motaus doi Yerikho.” Bai Elisa timbiliyo, “Tukon TEMENENO sambuno mo tubo tukon Tama naansaang, aki kai naikon kuotinggale Tama.” Jadi yanila luaila banggadudukenemo konapo ampakonan polong doi Yerikho.

⁵Meeng kotambuno konabi mo dungol idoo yanila taus pososuunggene Elisa tukon yanila sadaiyo, “Kai ikoo toiyo baikon doi oloyo nia ko Mian Bisa naikon bingkatemo komutuan tukon otinggalemo ikoo?” Elisa timbiliyo, “Oode, yaku toiyomo, bai baanggalokai, mau naakimo nda bisalakene doiya langgedoo.”

⁶Doibundu Elia bantile doi Elisa, “Dungolokai naimbaa. Ko TEMENENO sumboliiyaku motaus doi Yordan Paisunobatango.” Bai Elisa timbiliyo, “Tukon TEMENENO sambuno mo tubo tukon Tuan naansaang, akikai naikon kuotinggale Tama.” Sambuno lapa doiya yanila banggadudukenemo konapo ambakonan polong doi Yordan Paisunobatango,

⁷tukon daano kolima kolono konabi bailon mo lainge yanila. Maka Elia tukon Elisa yanila tade doi paisuno batango bibilo, tukon donabidoo mo lima kolono yanila kokondong akinduung nadodoon luwe idoo.

⁸Elia bukayo kona jubah, maka nalulune tukon yana umbasenemokai doi paisudoo batango bunggono. Maka dopaisubatangodoo paisuno tongobos lua, sampe tukon Elisa yanila moola ambakon doi paisubatangodoo mo mootimo.

⁹ Salataa yanila polong doi sembeleng, Elia bantile doi Elisa, “Kabiyomokai oilamo komuiniyas moluwedoi yaku moakiyoon ko TEMENENO nabingkate yaku tukon mootinggale ikoo!” Elisa timbiliyo, “Beekanakumokai Tama nakuasa, sulano kumoola teali posoboli Tama.”

¹⁰Elia timbane, “Wah, doiya susah tuuno, bai kalu ikoo kitayomo yaku doi tempo ko TEMENENO nabingkatano yaku, komukakabidoo ikoo minoolakono. Kalu aki mukitayo, domukakabidoo naikon tinolak.”

¹¹Doi napo ambakonan lalomo, yanila luaila banggadudul mobasa-basalita. Sosinggot daano komeeng kokereta mo daano koaungo adalan modaano koaungo motandane mo lubat poalaasene yanila luaila maka Elia biningkato doi surgaa luwe mbombuul motoputar-putar.

¹² Elisa kitayomo maka nabantile, “Elia, Tamanggu! Tamanggu! Israel napototooli motambongan tukon barani! Tama akiyono!” Sambuno lapa doiya maka lapusokai Elia luwedoi Elisa napambaleng. Tobikon Elisa nasusaan yana siyake konajubah tabata lua,

¹³maka yana pulute Elia najubah mo tuwong. Sambuno lapadoiya yana abali tukon kokondong doi Yordan Paisunobatango bibilo,

¹⁴maka umbasene Elia najubahdoo doi paisu bunggono maka nabantile, “Inandomokai ko TEMENENO, Elia na Mian Bisadoo?” Salataa yana umbasene dojubahdoo, dopaisudoo tongobos lua tukon yana moola ambakon polong doi sembeleng.

¹⁵Lima kolono konabi doi Yerikhodoo yanila kitayo, tukon napo bantile, “Elia nakuasa biyolo doi Elisa!” Yanila lubotiiyo yana maka napo somba doi salaano

¹⁶tukon napo bantile, “Kami daano kolima kolono komian, kami nia sasaibino mian mo buku-bukuan. Tobikon doiya, maimokai nda taus moumboliiyo komu komutuan Elia. Ugaatene ko TEMENENO na Roh lapamo babayo yana doi bunggul kai doi pepelako, maka do TEMENENO doo otinggalemo yana idoo.” Elisa timbiliyo doi yanila, “Mau naaki!”

¹⁷Bai donabidoo mo limakolonodoo banggadudul modesaake yana sampe yana satujuiyo. Maka donabidoo mo lima kolono yanila tauso moumboliiyo Elia, bai yanila aki napososuunggene Elia.

¹⁸Doibundu yanila abalimo doi Elisa mo daanoon mototiili doi Yerikho. Elisa bantile doi yanila, “Yaku lapamo bantile baikon komuyu maunaaki potaus?”

¹⁹Moimoiya komian mo luwedoi Yerikho lubat doi Elisa tukon yanila bantile, “Tama, buno komo lapamo Tama kitayo susuungo, nakota nia monondok, bai kopaisuno aki namonondok tukon tongo mangaanikene koboiboine motianan, tobulus.”

²⁰Elisa bantile, “Mangala mangko mo boolu, tukon obosiyomo timuson doi lalomo.” Sambuno buno doiya yanila babakenemo donakinabidoo doi yana.

²¹Maka ampakonokai Elisa doi paisumatanodoo tukon doibundu yana sakukenemo dotimusonoo doi paisu lalomodoo tukon bantile, “Naiyamokai ko TEMENENO nabinantil: ‘Yaku kolinoyo napaisu nia sulano naakimo namangaanikene komatean kai tobulusan!’ ”

²²Salataa tambuun doiya molinomo dopaisudoo pokokonoi tukon Elisa nabantilan-bantilan.

²³Sambuno lapa doiya ampakonokai Elisa luwedoi Yerikho taus doi Betel. Doi loloon tanga daano komeeng kotambuno kolabuk-labuk motobuat luwedoi kota tukon yana totu-totulaiyo yana. Konapobantilano, “Eh suba, suba ampakon luwe naimbaa!”

²⁴Elisa palos tukon mbalenge yanila maka batotopikene yanila tukon luwedoi TEMENENO sambuno. Sambuno lapa yana mobantile buno doiya sosinggoton lubat kolua koasu lobo molukono mo tobuat luwedoi mosolot tukon beni-benitio kosanggapo kolono lua dolabuk-labukoo moluwedoi sasaibino dolabuk-labukoo.

²⁵Elisa banggadudukenemo kona ambakonan doi Karmel Bunggulo, doibundu koidan yana abali doi Samaria.