Read Banggai 2 TOMUNDO-TOMUNDO 20 Bible Online

2 TOMUNDO-TOMUNDO 20 - Banggai bible

2 TOMUNDO-TOMUNDO 20

¹Adukon pososinggat dotempodoo Tomundo Hizkia seselon bisul mo babasal tuuno sahingga adukon yana mate. Nabi Yesaya Amos napau yana ampakon moduutiyo yana tukon bantile, “Ko TEMENENO baeteteba sulano Tuan naalapayo sasaibino koulusan, sabab Tuan aki naikon mutangalin. Akimo namalumbit koidan naikon Tuan matemo.”

²Hizkia palos doi betoon maka nasambeang tukon bantile,

³“Oh TEMENENO, neneekekai baikon yaku nia lapamo balimang doikoo tukon setia tukon moloyos konoanggu. Yaku sidutu kakaate motulutiyo komumongiasan.” Sambuno lapa yana mosambeang yana kokiil tukon susa.

⁴Yesaya otinggale Hizkia, bai yana akiyoon natobuat luwedoi kamali tangano basaleano, ko TEMENENO sumboliiyomo yana moabali doi Hizkia,

⁵TEMENENO namian natomundo, tukon pelenggene nateteba nia mobantile, “Yaku, ko TEMENENO, Mian Bisa Daud tumbumuyu nasinosubai, lapamo ndongoliiyo komu sambeang tukon lapamo kitayo komatamu paisuno. Yaku naikon tangalinggene ikoo; nalua kopopook ikoo lubat doi Ku Bonua.

⁶Yaku naikon suungiyo komuumur 15 kotaun koidan. Ikoo tukon kokota Yerusalem naikon yaku olupute luwedoi tomundo Asyur. Yaku naikon lindungiyo nakota nia sabab kuinodotiiyan susuunggu tukon sabab daku perjanjian tukon daku peleleani Daud.”

⁷Maka Yesaya mosumbolii mian mobatayo koanggur saono tukon domianoo suntike doi tomundo nabisul sulano natangalin.

⁸Tomundo Hizkia mansadai, “Oikai kopaloosano baikon ko TEMENENO naikon motangalinggene yaku tukon baikon nalua kopopook yaku naikon moola lubat doi TEMENENO Na Bonua koidan?”

⁹Yesaya timbiliyo, “Ko TEMENENO naikon beena paloosan doi Tuan baikon yana tepaatiyo konadandi. Budodoiya, yaandomokai Tuan nainiyas: paloosan potudo jam oloyomatano Tomundo Ahas mokubaiyo mo maju songulo lua kogaris kai mundur songulo kogaris?”

¹⁰Hizkia bantile, “Kokubaiyano dopaloosanoo namaju 10 kogaris, gampang tuuno. Tobikon doiya mokubaikene yana moundur 10 kogaris.”

¹¹Yesaya sambeang doi TEMENENO, maka ko TEMENENO kubaiyo dopaloosanoo moundur 10 kogaris doi potudo jam dooloyomatanodoo.

¹²Adukon pososinggat dotempodoo tomundo Babel, kosambuno Merodakh-Baladan Baladan napau, yana lengele baikon Tomundo Hizkia sodo tangalin luwedoi nasesel. Maka yana mosumbolii bito-bito sulano nababayo kosurat tukon patambo doi Hizkia.

¹³Hizkia talimayo sasaibino dobito-bitodoo tukon yana tudoikene doi yanila sasaibino konabuat, doiyamo mosoni tukon suasa, lamba-lamba minalambut, tukon sasaibino konasuludadu napakakas. Akiyo komeengkai koioila doi tomundo nakamali tukon posaapon kobatomundoan moaki naokitakene doi yanila.

¹⁴Doibundu Nabi Yesaya mangadap doi Tomundo Hizkia tukon mansadai, “Luwedoi yaando domianmianoo? Oila konapo binantil?” Hizkia timbiliyo, “Yanila luwedoi Babel, tano mo odoon.”

¹⁵Yesaya sadaiyo koidan, “Oila konapo kinita doi kamali?” Hizkia timbiliyo, “Kookabuson! Akiyo komeengkai doi sasaibino kololongguno doi tomundo nakamali mo aki kutudoikene doi yanila.”

¹⁶Maka Yesaya bantile doi tomundo, “Ko TEMENENO bantile baikon

¹⁷ nalaate kotempono sasaibino kobuat doi mukamali lalomo tukon komo lapamo tumbumu pototongikene polong naoloyo nia inakut doi Babel. Akiyono komo totinggal.

¹⁸ Luwedoi mupau tumbu daano naikon komo inala tukon tinealikon pagawe doi tomundo nakamali sulano naleleaniyo ko tomundo Babel.”

¹⁹Tomundo Hizkia timbiliyo, “Monondok koidan ko TEMENENO nateteba ikoo mopelenggene doiyaku.” Yana timbiliyo bunodoiya sabab yana pikikene: “Asal dakubatomundoan natataap aman tukon dame modaanoon yaku motubo.”

²⁰Kosalitano bailonggon mengenai Tomundo Hizkia, mengenai najasa-jasa batalengaan, tukon bulaando konamokubaiyan dolaak tukon sausalul sulano nasalulanggene kopaisu doi kota, sasaibino tinuliso doi Tomundo-tomundo Yehuda Nabuku Tundun lalomo.

²¹Hizkia mate, maka konapau Manasye teali tomundo mosoboliyo yana.