Read Banggai 2 TOMUNDO-TOMUNDO 21 Bible Online

2 TOMUNDO-TOMUNDO 21 - Banggai bible

2 TOMUNDO-TOMUNDO 21

¹Manasye konaumur 12 kotaun yana tealimo tomundo doi Yehuda, tukon yana maparenta doi Yerusalem 55 kotaun konakalumbit. Kotinano kosambuno Hefsibah.

² Sabab Manasye loingiyo kobangsa-bangsa nakokubai molokis tukon ko TEMENENO lapamo siikayo yanila luwedoi Kanaan doi tempo ko Israel miano nausokiyano dotanodoo, maukai Manasye yana baladosamo koidan doi TEMENENO.

³Kolipu-lipu mososubaiyan pilogot mo lapamo kotamano Hizkia manase yana bangune koidan. Yana bangune koidan kobalabaan-balabaan tuuk sosubaan doi pilogot, tukon yana kubaiyo ko Pilogot Boine Asyera timbalango pokakana komo kinubai luwe Ahab tomundo Israel. Manasye sosubaiyo kobituwon-bituwon pauno.

⁴ Ko TEMENENO lapamo bantile baikon ko Yerusalem doiyamokai lipu nadaanoan tukon lipu sosubaan doi yana, bai indaa doi TEMENENO Na Bonua, Manasye lapamo mokokondong balabaan-balabaan motuuk doi pilogot.

⁵Doi looluakon do TEMENENO doo Na Bonua basaleano yana kekendenge kobalabaan-balabaan teali basosubakonan doi bituwon-bituwon pauno.

⁶Yana sosubakene konapau salaku sosubakon mosinua. Manasye koidan yana palatikanggene komatalapuan, banujuman, motoiyan minasaindinggon, tukon mangkabi pongotunggul doi roh-roh molokis. Tobikon doiya yana baladosa tuuno doi TEMENENO sahingga olubatene ko TEMENENO nanggimalan.

⁷ Ko Pilogot Boine Asyera timbalango yana abese doi TEMENENO Na Bonua lalomo, baanggokai dotampatoo ko TEMENENO lapamo bantile doi Daud tukon namalane Salomo, “Daku Bonua tukon nakota Yerusalem nia, molapamo Yaku lilike luwedoi antara kosongulono lua ko Israel benseno doiyamokai kotampat Yaku mo tantukenemo salaku tampat bakaledaan doi Yaku.

⁸Tukon kalu ko Israel miano yanila loingiyo sasaibino Daku parenta tukon tulutiyo ko ukum-ukum Daku peleleani Musa mo beekene doi yanila, maka aki Kupataikene napo siniika luwedoi tano mo lapamo Yaku beekene doi tumbunoila.”

⁹Bai ko Yahudi miano aki nataat doi TEMENENO tukon Manasye koidan tongo mangaanikene yanila molakukene kolalim-lalim mo lobian lokis luwedoi bangsa-bangsa nalalim linakukanggon TEMENENO mosiikayo luwedoi Kanaan doi tempo ko Israel miano nausokiyano dotanodoo.

¹⁰Tobikon doiya lolo doi sasaibino konabi, TEMENENO napeleleani-peleleani, ko TEMENENO bantile,

¹¹“Tomundo Manasye lokis tuuno. Konakulokisan lobian odoon konakulokisan tukon Kanaan miano nakulokisan. Sabab nakubaiyano komososubaiyan pilogot-pilogot, yana mangaanikene Yehuda miano baladosa.

¹²Tobikon doiya, Yaku, TEMENENO Israel miano na Mian Bisa sinosubai, naikon olubatene kobalaa mo babasal tuuno doi Yerusalem tukon Yahuda sahingga sasamba komian mo lengele dolanggedoo naikon ngginggim.

¹³Ko Yerusalem naikon Yaku ukume pokakana daku ukumano ko Samaria tukon Ahab tomundo Israel tukon konakaturunan. Ko Yerusalem Yaku sasapuwo bilisii pokakana kopinggan molapamo kinumosi tukon inanggalaupo.

¹⁴Kotumbuno mototinggal naikon Yaku batadikenemo sulano nateali namusuh-musuh nasail kinaan, naikon mosilakaiyo yanila tukon molambase konapai tano.

¹⁵Doiya Yaku lakukanggene sasaibino doi Kuumat sabab yanila baladosamo doiyaku sahingga olubatene daku nggimalan salataa tumbunoila natobuatan luwedoi Mesir polong doi oloyo nia.”

¹⁶Sanglaasan konakubaiyano ko Yehuda miano baladosa doi TEMENENO tukon nasosubaiyano kopilogot, Manasye koidan badaang tuuno komian mo akiyo konasalah konainakate sahingga lomba kosau doiyayaa doi Yerusalem.

¹⁷Kosalitano bailonggon mengenai Tomundo Manasye tukon kodosa-dosa yana molakukanggene, tinuliso doi Tomundo-tomundo Yehuda Nabuku Tundun lalomo.

¹⁸Tukon Manasye mate yana tinadin doi tomundo nakamali modaano kobasaleano mosinakai bubunga, doiyamo tomundo Uza nakombung modaano kobubunga. Konamalane Amon yana teali tomundo mosoboliyo yana.

¹⁹Amon sodo 22 kotaun konaumur yana tealimo tomundo doi Yehuda tukon yana maparenta doi Yerusalem lua kotaun konakalumbit. Kotinano kosambuno Mesulemet Harus napau, Yotba miano.

²⁰Amon baladosa doi TEMENENO, pokakana kotamano.

²¹Yana loingiyo kotamano nakokubai-kokubai, tukon sosubaiyo kopilogot-pilogot tamano nasinosubai.

²²Yana tubo aki natulutiyo ko TEMENENO namongiasan bai tongo tinggale ko TEMENENO, tumbunoila na Mian Bisa sinosubai.

²³Tomundo Amon napagawe-pagawe yanila mokubai pototongian molokis molawane yana tukon yanila akateyo doi kamali.

²⁴Bai korayat Yehuda yanila akateyo sasaibino komo akateyo doi Tomundo Amonoo, maka yanila oduduke konapau Yosia, teali tomundo.

²⁵Kosalitano bailon motuuk doi Amon tinuliso doi Tomundo-tomundo Yehuda Nabuku Tundun lalomo.

²⁶Amon yana tinadin doi batadinan Uza nakombung modaano kobubunga. Konapau Yosia teali tomundo mosoboliyo yana.