Read Banggai 2 TOMUNDO-TOMUNDO 22 Bible Online

2 TOMUNDO-TOMUNDO 22 - Banggai bible

2 TOMUNDO-TOMUNDO 22

¹ Yosia sodo alu kotaun konaumur yana tealimo tomundo doi Yehuda, tukon yana maparenta doi Yerusalem 31 kotaun konakalumbit. Kotinano kosambuno Yedida Adaya napau, luwedoi Bozkat.

²Yosia nakokubai monondok tuuno doi TEMENENO salaano. Sabab yana moloingikon kotumbuno Tomundo Daud nakokubai, tukon loingiyo sasaibino ko Mian Bisa naukum-ukum tukon tutuu.

³Tomundo Yosia daano komeeng konadulutulis negara kosambuno Safan Azalya napau, Mesulam natumbu. Doi taun kosongulono alu Tomundo Yosia nabapamarentaan, tomundo beekene naparenta nia doi nadulutulisoo tukon doparentadoo bunonaiya, “Ampakonokai doi Hizkia Imam Babasaloo modaano doi TEMENENO Na Bonua, tukon kabiyomokai yana namebee lapulan tentang doy molapamo kinombul luwedoi sasaibino koimam mo batugas doi tataapon usokiyano ko TEMENENO Na Bonua.

⁵Sumboliiyo nabeekene dodoydoo doi sasaibino kopototooli limang bakindondokan doi TEMENENO Na Bonua. Sio napo gunakanggene dodoydoo tuuk pebeyal tambo

⁶doi sasaibino kotukang kayung, tukang bangunan, tukon tukang batu, tukon sio napo mongolikayung tukon batu mo pinalaluukon.

⁷ Sasaibino dopototooli limangoo jujur tuuno, jadi aki napalaluu kinabi kolapulano kodoy mo luwedoi yanila.”

⁸Tomundo Yosia naparenta nia Safan pelenggene doi Hilkia, maka Hilkia salitaikene doi Safan baikon yana lapamo pososuunggene ko TEMENENO Naukum-ukum kitabpo doi TEMENENO Na Bonua. Hilkia beekene dobukudoo doi Safan, tukon yana bacayomo.

⁹Sambuno bunodoiya Safan abalimo doi Tomundo Yosia tukon lapulkanggene baikon kodoy mo inabos doi TEMENENO Na Bonua lapamo inala tukon dodoydoo sasaibino tomundo naata lapamo salakanggene doi sasaibino kopototooli limang bakindondokan doi TEMENENO Na Bonua.

¹⁰Doibundu Safan bantile, “Nabuku nia Hilkia komo beekanaku.” Doibundu Safan bacakanggenemo dobukudoo doi Tomundo Yosia.

¹¹Salataa Tomundo Yosia lengele dobukudoo antoko, yana siasiake konapakean sabab susa konoano.

¹²Doibundu koidan Tomundo Yosia beekene naparenta nia doi Imam Hilkia, Ahikam Safan napau, Akhbor Mikha napau, Safan dulutulis negara, tukon Asaya tomundo naajudaan tukon doparentadoo bunonaiya:

¹³“Poampakonokai pomasadai doi TEMENENO tuuk doiyaku tukon komo tuuk doi sasaibino ko Yehuda miano oila koantoko nabuku nia. Ko TEMENENO nggimoliiyo kita sabab kotumbunggita aki naambakonggene koparenta-parenta mo totulis doi lalomo.”

¹⁴Sambuno lapa doiya ampakonokai Hilkia, Ahikam, Akhbor, Safan tukon Asaya momangkabi pongotunggul doi meeng koboine kosambuno Hulda. Yana meeng konabi modungol doi bakampungan boolu doi Yerusalem. Konalangkai kosambuno Salum Tikwa napau, Harhas natumbu; yana pongulus pakean kaledaan doi TEMENENO Na Bonua. Salataa Hulda ndongoliiyo konapo katarangan,

¹⁵yana sumboliiyomo yanila moabali doi tomundo tukon yanila pelenggene

¹⁶doi yana na TEMENENO nia nabantilan: “Yaku naikon ukume ko Yerusalem tukon sasaibino kotumbuno pokakana komo totulis doi bukudoo lalomo mosodo tomundo bacayo.

¹⁷Yanila otinggalakumo tukon yanila mososubakon sosubakon doi temeneno-temeneno bailon. Sasaibino konapo linakukanggon olubatene Daku nggimalan. Yaku nggimoliiyo ko Yerusalem, tukon Daku nggimalanoo aki namoola inatade.

¹⁸Bai mengenai Tomundo Yosia, naiyamokai Dakuteteba, TEMENENO Israel na Mian Bisa, ‘Salataa ikoo ndongoliiyo oila komo totulis doi bukudoo lalomo,

¹⁹ikoo manasal tukon sio mupependeyo kobutomu doi salaanggu. Yaku naikon osilakayo tuuk moukume ko Yerusalem tukon kotumbuno. Yaku tealikene dokotadoo meeng kolangge mombinaleng mo minosikiton, tukon kosambu Yerusalem naikon Yaku tealikene sambu mo kinutuk. Bai salataa ikoo ndongoliiyo tentang Daku osilakaanodoo ikoo kokiil tukon siake komupakean salaku paloosan susa. Yaku lengelemo komusambeang,

²⁰tobikon doiya ko Yerusalem ukumano aki naikon Kuotuwongikene kalu ikoo daanoon motubo. Ikoo naikon mate tukon salamat.’ ” Salataa lapa ko TEMENENO mobasalita maka abalimokai dobito-bitodoo doi Tomundo Yosia tukon yanila polongikene do TEMENENO doo Nateteba.