Read Banggai 2 TOMUNDO-TOMUNDO 23 Bible Online

2 TOMUNDO-TOMUNDO 23 - Banggai bible

2 TOMUNDO-TOMUNDO 23

¹Sasaibino kokatua-katua doi Yehuda tukon doi Yerusalem Tomundo Yosia uwange yanila.

²Salataa yanila lubat yana ampakono polaing yanila doi TEMENENO Na Bonua, tukon sasaibino korayat, maukomo talalais maukai komo kaasa. Doi sasaibinoila salaano, doi naloolanian kosoliyok batu mo sinadiakon tuuk doi tomundo, Yosia kokondong tukon alalo mobabasal yana bacakanggene sasaibino dobuku perjanjianoo antoko mo pinososuunggono doi TEMENENO Na Bonua. Doibundu tomundo mokubai perjanjian tukon TEMENENO tuuk nataatan doi yana, tukon ambakonggene tukon totubo konoano polong sasaibino konatuboan sasaibino koparenta tukon Naukum-ukum. Tomundo Yosia yase koidan paladandi doi TEMENENO sulano yana naloingiyo ko TEMENENO naperjanjian sarato tukon konanian mototulis doi bukudoo lalomo. Sasamba korayat tulut paladandi sulano yanila nataatiyo doperjanjianoo.

⁴ Sambuno lapa doiya tomundo Yosia paletakene Imam Babasal Hilkia, sasaibino kopotombonii imam tukon sasaibino kopadagai mobatugas doi TEMENENO Na Bonua tataapono, sulano natobuatene luwedoi Bonuadoo sasaibino kopakakaso mo pinake tuuk mososubaiyan Pilogot Boine Asyera tukon bituwon-bituwon pauno. Sasaibino dololonggudoo Tomundo Yosia naikon suayo doi kota tonggulungo loolani ko Kidron Pepelako, maka koabuno binaba doi Betel.

⁵Yana belentiyo sasaibino koimam mo lapamo tomundo-tomundo Yehuda oduduke sulano nabatugas doi lipu basosubaiyan pilogot doi kota-kota Yehuda tukon doi kota-kota bailon doi Yerusalem, tukon koidan sasaibino koimam mo mososubakon sosubakon doi Pilogot. Oloyomatano, mandala tukon bituwon-bituwon pauno.

⁶Kopilogot boine Asyera timbalango yana tobuatenggene luwedoi TEMENENO Na Bonua, tukon binaba doi kota tonggulungo doi Kidron Pepelako. Indaa dotimbalangoo sinua, maka koayongo tinumbu-tinumbu alus, tukon koabuno tinipason doi batadinan umum.

⁷Sasaibino ko kombiang-kombiang doi TEMENENO Na Bonua mian balo-baloloa doi bonua bapilogotan mo pakeyo salaku basosubaiyan doi pilogot, doiya inakamanaso. (Doi kombiang-kombiangoo ko boine-boine motonun toik mopinake doi mososubaiyan lalomo doi pilogot boine.)

⁸Tomundo Yosia sumboliiyo sasaibino ko imam mo dungol doi kota-kota Yehuda sulano napo lubat doi Yerusalem, maka yana kanggilitiyo sasaibino ko pilogot nabalabaan-balabaan doi posaapon kotano Yehuda inaando doi imam-imamoo aki napinataikon sulano napo limange kobakaledaan doi TEMENENO Na Bonua. Yanila koidan, aki napinataikon kaane koroti moakiyo koragino molapamo tula-tulanoila sadiakene. Kabalabaan-balabaan mo sinadiamo tuuk basosubakonan doi pilogot loolani ko Tataapon Babasal Yosua, dotanodoo nawali kota, doiya koidan linubango. Dotataaponoo Babasal tangabos doi tambikon babo kotataapon Utama Babasal doiloloon usokan doi kota.

⁹

¹⁰ Tofet, daanokai meeng kolipu mososubaiyan pilogot doi Hinom Pepelako, doiya koidan kinanggilitimo. Tukon bunodoiya akiyono koidan ko mian mo moola sosubakene konapau-pau salaku sosubakon mosinuwa tuuk doi Pilogot Molokh.

¹¹Sasaibino koadalan mo lapamo ko tomundo-tomundo Yehuda sadiayayo tuuk mososubaiyan oloyomatano doiya kai inaisono, tukon ko loda-loda mopinake doi basosubakonanoo lalomo sasaibino sinuwa. (Sasaibino doloda-lodadoo tangabos doi TEMENENO Na Bonua basaleano — loolani kotataapon babasal — aki naodoon luwedoi Natan Melekh meeng kopagauwe motatandak nakombiang-kombiang dinungoli.)

¹² Kabalabaan-balabaan ko tomundo-tomundo Yehuda mo bangune doi Tomundo Ahas nokombiang-kombiang atono bungkono, inakamanas. Tukon koidan kobalabaan-balabaan Manasyo mo ekendenge doi looluakon ko TEMENENO Na Bonua basaleano, Yosua akamanase koidan, maka nainaison doi Kidron Pepelako.

¹³ Koidan kobalabaan-balabaan doi tambikon tolopot ko Yerusalem, taambikon lalom ko Bungko Kulokisan yana kanggilitiyomo. Dobalabaan-balabaanoo Salomo komo ekendenge tuuk mososubaiyan pilogot-pilogot mo minosikiton — doiyamo Asytoret bangsa Sidon pilogot boine, Kamos bangsa moab na pilogot, tukon Milkom bangsa Amon napilogot.

¹⁴Kopilogot bangunan-bangunano tukon kopilogot boine Asyera timbalango yana lubange, maka kobutano inaando dobangunan-bangunano nainokokondongan, Yosua tombuniyo tukon bangkapi buku-bukuno.

¹⁵ Tomundo Yosia koidan lusayo kolipu basosubaiyan doi Betel Tomundo Yerobeam Nebat napau mo kekendenge — tomundo mo mangaanikene ko Israel miano mokubai lalim. Sambuno lapa Yosia manase dolipu basosubaiyanoo, tukon yana suwayomo pososinggat ko pilogot boine Asyera timbalango mo daano idoo.

¹⁶ Sambuno lapa doiya Yosia mbaleng koidan, yana kitayo komoi-moiya ko bakibulan doi bunggul bungkono. Doibundu yana mosumbolikene mian molombayo dobakibulanoo, tukon domian-mianoo mo mate buku-bukuno yanila tobuatenggenemo doi kibuloo lalomo maka napo suwayo doi balabaan mo daanoon mokolot. Bunomodoiyakai konakubaiyano sulano dobalabaanoo teali manggilit. Sambuno buno doiya maka tealimokai oila komo lapamo ko TEMENENO nanabi tantukene doi tempo Tomundo Yerobeam daanoon mokokondong loolani doi balabaanoo pososinggat komeeng kolamean. Salataa lapa doiya Tomundo Yosia kitayo koidan komeeng kobakibulan bailon koidan.

¹⁷ Maka yana mansadai koidan, “Indee kibulo naiya?” Ko Betel miano timbiliyo, “Doiya meeng ko TEMENENO nanabi kibulo mo biasa lubat naimbaa moluwe doi Yehuda, tukon yana moola tantukene ko langge-langge mo soodo Tuan lakukene motuuk nai balabaan nia.”

¹⁸Doibundu dotomundodoo bantile, “Inai pobula-bulaakene do kibuloo. Batadikenemo kabuku-bukuno idoo, inai nabiniyol!” Sambuno dotomundodoo bantile buno doiya maka do TEMENENO nanabidoo moluwe doi Yehuda buku-bukuno akimo nabinula-bulaandokon, bunomo lakon koidan konabi moluwe doi Samaria motinadin idoo.

¹⁹Sasamba kota doi Israel, Tomundo Yosia lubange sasaibino kolipu mososubaiyan pilogot kotomundo-tomundo Israel mo kekendenge, tukon mo lapamo mangaanikene ko TEMENENO nggimal. Oila komo lapamo Tomundo Yosia lakukanggene doi Betel, doiya yana lakukanggene koidan tuuk doi balabaan-balabaan doi posaapon ko Israel.

²⁰Sasaibino koimam mo batugas doi lipu-lipu mososubaiyan pilogot yana akateyo doi balabaan-balabaan bungkono inaando konapo batugasan. Tukon doi sasamba dobalabaanoo Yosia tealikene lipu mosuwaan bangkapi momate buku-bukuno. Salataa lapa doiya yana mulemo doi Yerusalem.

²¹Doibundu Tomundo Yosia parentayo kona rayat sulano napo lamekene ko paskah pokakana komo totuliso doi buku Perjanjian TEMENENO lalomo. Tukon kalu bunodoiya yanila odotiiyo ko TEMENENO napo Mian Bisa.

²²Salataamo doi loonu ko talenga-talenga naparentaano ko bangsa Israel akiyoon naadaano ko tomundo Israel kai tomundo huda mo lamekene ko paskah pokakana doiya.

²³Tongo doi taun ko songulono alu Yosia nabapamarentaanoo maka nasodokai linamekon ko paskah koidan doi Yerusalem tuuk odotiiyano ko TEMENENO.

²⁴Doi laksanakangganano ko ukum-ukum mo totulis doi buku lalomo Imam Babasal Hilkia mo pososunggene doi TEMENENO Na Bonua, sasaibino komian motoiyo uwange komian malaekato tukon komo toiyo kopalantukon Tomundo Yosia siikayo yanah luwedoi Yerusalem tukon luwedoi posaapon ko Yehuda, maka nasakukene sasaibino konapo pilogot donapo bonua lalomo, tembel, tukon barang-barang mopinake tuuk mososubaiyan pilogot-pilogot.

²⁵Akiyon nadaano ko tomundo pokakana Tomundo Yosia mo mangga doi tuuno doi TEMENENO tukon tootubo konoano tukon tudoikene doiya nalenggang tukon nakokubai, pokokana tukon sasaibino ko TEMENENO naukum mo talaat doi musa nabuku lalomo. Salataa lapa Tomundo Yosia nabapamarentaan, akiyono koidan ko tomundo mo pokakana yana.

²⁶Bai Tomundo Manasye nakokubai lapamo olubatene ko TEMENENO nanggimalan mo tuuk doi Yehuda, tukon donanggimalanoo akiyoon naposo.

²⁷Ko TEMENENO bantile, “Oila komo lapamo ikoo lakukanggene mo tuuk doi Israel, doiya koidan yaku lakukanggene doi Yehuda. Ko Yehuda miano naikon yaku sakukene luwedoi tano yaku mo beekene doi yanila. Yaku naikon tolake ko Yerusalem, kukota linilik, tukon koidan naku Bonua nia, tukon menulut dokubantilan naikon teali lipu bakaledaan doiyaku.”

²⁸Tomundo Yosia mate doi polobosian lalomo doi Megido doi tempo naampakonan nalobosiano Nekho, tomundo Mesir, mo daanoon maju tukon kona pasukan sulano napo tomboniiyo kotomundo Asyur doi Efrat Paisunobatango bibilo. Sasaibino Tomundo Yosia napagawe yanila ndookiiyo Yosia bajano maka napo babayo mule tukon loda doi Yerusalem. Indaa yana tinadin doi batadinan tomundo-tomundo. Maka korayat Yehuda piliyo tukon oduduke konamalane Yoahas teali tomundo soboliyo kotamano. Kosalitano bailon mengenai Tomundo Yosia tinuliso doi Tomundo-tomundo Yehuda Nabuku Tundun lalomo.

²⁹

³⁰

³¹Yoahas teali tomundo doi Yehuda konaumur sodo 23 kotaun, tukon yana maparenta doi Yerusalem tolu kobituwon konakalumbit. Kotinano sambuno Hamutal Yeremia napau luwedoi kota Libna.

³²Yoahas baladosa doi TEMENENO pokakana ko tumbuno.

³³Kona pupusan Yoahas nabapamarentaan doi tempo Nekho tomundo Mesir nataanano yana doi Libla, doi daerah Hamat, tukon pakisaayo ko Yehuda miano sio nababeal lulu doi yana kona kadaang 3.400 kokilogram koperak tukon 34 kokilogram komosoni.

³⁴ Doibundu Tomundo Nekho yana oduduke Yosia namalane kosambuno Elyakin moteali tomundo doi Yehuda, tukon yana soboloiyo kosambuno Yoyakim. Yoahas yana binaba doi Mesir tukon yana mate indaa.

³⁵Tuuk nebabealan lulu tomundo Mesir mo tuntute, Tomundo Yoyakim matagih lulu doi rayat menulut napo kamampuan suwe-suwele.

³⁶ Salataa Yoyakim teali tomundo doi Yehuda, konaumur 25 kotaun, tukon yana maparenta doi Yerusalem 11 kotaun kona kalumbit. Kotinano kosambuno Zebuda, Pedaya napau moluwe doi kota Runea.

³⁷Yoyakim mokubai lalim doi TEMENENO pokakana kotumbunoila.