Read Banggai 2 TOMUNDO-TOMUNDO 24 Bible Online

2 TOMUNDO-TOMUNDO 24 - Banggai bible

2 TOMUNDO-TOMUNDO 24

¹ Doi tempo Tomundo Yoyakim nabapamarentaan, Nebukadnezar tomundo Babel yana lubatiiyo tukon lawane tomundo Yoyakim tukon lungguiyomo ko Yehuda. Tolu kotaun konakalumbit Yoyakim nasomboan doi Tomundo Nebukadnezar.

²Ko TEMENENO Kapatuwo kogelombolan-gelombolan mo mapake sinapan moluwe doi bangsa Babel, Siria, Moab tukon Amon sulano nalawane Yoyakim tukon naakamanase ko Yehuda, pokokonoi oila komo lapamo Yana bantile lolo. Doi sasaibino konabi dona pelepekaindoo.

³Takainomo doiya langgedoo sio nateali, sabab ko TEMENENO lapamo bantile baikon ko bangsa Yehuda naikon sinakukon luwedoi tano TEMENENO mobeekene doi yanila. Sabab sasaibino Manasye nalalin kinubai mangaanikene yanila sinakukon;

⁴kotamano tuuno sasaibino ko mangakatean yana molakukanggene doi mian-mian mo akiyo konasalah. Ko TEMENENO aki naiyase moompuniyo Manasye sabab dona kokubai-kokubaidoo.

⁵Sasaibino kolipu, moluwe doi Efrat Paisunobatango polong doi napokalalatonan ko Mesir taambikon utala mo tongusokon ko tomundo Mesir nalipu bapamarentaan, tomundo Babel kuasaiyomo.

⁷Tobikon doiya kotomundo Mesir akimo nabiasa tobuat luwedoi natano tuuk moampakon polobosi. Kosalitano bailon mengenai Tomundo Yoyakim tinuliso doi Tomundo-tomundo Yehuda Nabuku Tundun lalomo. Salataa Yoyakim mate, konamalane ko sambuno Yoyakhin teali tomundo mosoboliyo yana.

⁸Salataa Yoyakhin yana teali tomundo doi Yehuda, konaumur 18 kotaun, tukon yana maparenta doi Yerusalem tolu kobituwon konakalumbit. Kotinano kosambuno Nehusta Eluatan napau, moluwe doi Yerusalem.

⁹Pokakana kotamano, Yoyakhin kai baladosa doi TEMENENO.

¹⁰Doi tempo Yoyakhin nabapamarentaan kopasukan Babel Nebukadnezar nasuludadu polobosian komo katuaiyo, yanila maju molubatiiyo tukon lobosiyo ko Yerusalem, tukon yanila lobosiyo dokotadoo.

¹¹Salataa dokotadoo linobosi Nebukadnezar susungo lubat doi Yerusalem,

¹² maka Tomundo Yoyakhin polaing kotinano, konapau-pau konasuludadu polobosian tukon napagauwe-pogauwe doi nakamali yanila somba doi Nebukadnezar. Maka Yoyakhin tinaano. Dolanggedoo natealian doi taun kowaluno Nebukadnezar nabapamarentaan.

¹³Sasaibino kopakakas mosoni tomundo Salomo mo kubaiyo tuuk doi TEMENENO Na Bonua, Nebukadnezar lusayo. Maka sasaibino kolangge modaano koolino mo talaat doi TEMENENO Na Bonuadoo tukon doi lemari inakut binaba doi Babel. Sasaibino doiya teali pokokonoi oila komo lapamo TEMENENO bantile akiyoon nateali.

¹⁴ Tomundo Yoyakhin, kotinano, konabolo-boloki, konapagawe-pagawe, tukon Katua-katua Yehuda — sasaibino yanila daano ko 7.000 komian mo totingoni — tinaan tukon inakut doi Babel. Tukon koidan sasaibino kopolimang mo ahli tukon pandoi mottuk kalamas konakadaang 1.000 komian, sasaibino mian mo buku-bukuan tukon barani-barani polobosi. Komian-mian mo kotulunan tomundo, tukon mian-mian kai mo totingoni inakut koidan doi bangaisonan — sasaibino daano 10.000 komian. Adukon sasaibino ko Yerusalem miano inakut, komo totinggal bainokai rayat mo talalais tuuno.

¹⁷ Doibundu Nebukadnezar oduduke Matauya, Yoyakhin napinatama, teali tomundo doi Yehuda, tukon boliiyo kosambuno teali Zedekia.

¹⁸ Zedekia teali tomundo doi Yehuda salataa konaumur 21 kotaun. Yana maparenta doi Yerusalem 11 kotaun kona kalumbit. Kotinano kosambuno Hamutal, Yeremia napau moluwe doi kota Libua.

¹⁹Tomundo Zedekia koidan bala dosa doi TEMENENO pokakana Tomundo Yoyakhin.

²⁰ Ko TEMENENO nggimoliiyo tuuno ko Yerusalem miano tukon ko Yehuda miano sahingga ko TEMENENO akimo koidan napalaatikanggene yanila.