Read Banggai 2 TOMUNDO-TOMUNDO 25 Bible Online

2 TOMUNDO-TOMUNDO 25 - Banggai bible

2 TOMUNDO-TOMUNDO 25

¹ Doibundu Zedekia kakaate molawane Nebukadnesar tomundo doi Babel. Tobikon doiya Nebukadnezar tukon sasaibino konasuludadu lubat tukon lawane ko Yerusalem doi tanggal kosongulono bituwon kosongulono doi taun kosiyono Zedekia nabapamarentaan. Yanila mongokkondong benteng batanggonan doi kota tonggulungo, yanila mabangun pagal binetoon molobosian.

²Tukon banggadudul yanila molobosiyo dokotadoo polong doi taun kosongulono meeng Zedekia nabapamarentaan.

³Doi tanggal kosiyono bituwon kosanggapo doi taunoo koidan doi tempo kabalaa malaalau bunomo doiya kona hebatan sahingga korayat akiyono koidan konapo kinaan.

⁴ Kopagal binetoon musuh manase lusayo. Dopopookoo, maukai do Babel mianodoo daanon lobosiiyo dokotadoo sasaibino kosuludadu Yehuda yanila dampas doi Yordan Pepelako. Yanila mangala loloon mololoiyo kokanali mosinakai bubunga, maka yanila tobuat lolo doi tataapon babasal mo potaamikene looluakon dopagal betonoo doi lipudoo.

⁵Bai kosuludadu Babel lelenggene Tomundo Zedekia, tukon yanila lakoyo doi Yerikho seanono. Sasaibino konasuludadu bulen otinggale yana.

⁶Doibundu Tomundo Zedekia yanila babayo doi Tomundo Nebukadnezar doi kota Ribla, maka nainotuwongikon koukuman mate.

⁷ Konapau inakate doi matano salaano. Sambuno lapa doiya Zedekia tinuwek komatano, maka nabinoboi kolimano tukon binaba doi Babel.

⁸Doi tanggal kopituno bituwon kolimano doi taun kosongulono sio doi Nebukadnezar nabapamarentaan salaku Tomundo doi Babel, lubatokai doi Yerusalem komeeng komian kosambuno Nebuzaradan. Yana daanokai pongotunggul tukon Nebukadnezar nasuludadu talengano.

⁹ Nebuzaradan suayo ko TEMENENO Na Bonua, kotomundo nakamali, tukon sasaibino kokatua-katua nabonua doi Yerusalem.

¹⁰Tukon sasaibino konasuludadu lubange dokotadoo pagaro binetoon.

¹¹Doibundu korayat mo daano doi kotadoo, doiyamo sasaibino kopolimang ahli mo totinggal, mian-mian mo talalais tukon mian-mian mo lapamo bulen ala doi Babel miano, sasaibino Nebuzaradan akute doi Babel.

¹²Bai kosoobos korayat mo masikiin tuuno tukon komo akiyo konabuat yana otinggale doi Yehuda tukon yana sumboliiyo momolimang anggur asino tukon asi-asi bailon.

¹³ Kosudong-sudong tambaga tukon roda-roda doi TEMENENO Na Bonua polaing-laing tukon sombe tambaga ko Babel miano pasaiyo, tukon sasaibino kotambagano yanila kanggiyo doi napo tano.

¹⁴ Yanila koidan akute nabarang-barang nia: Sikoop-sikoop, bangabosan balabaan abuno, posi pakakas-pakakaso, manggo-manggo moteali motunekonan iyayon sauno mo tinembel tuuk sosubakon, manggo-manggo tuuk mosuwaan kamangian, tukon sasaibino kopakakas tambaga bailon mo pinake tuuk bakolobokiyan doi kaleda.

¹⁵Kopakakas mosoni tukon suasa, tongusokon komanggo-manggo poipoisik tukon pinggan-pinggan bangabosan bilat balano doiya sasaibino Nebuzaradan susuungo komo alayo.

¹⁶Pakakas tambaga Tomundo Salomo mo kubaiyo tuuk doi TEMENENO Na Bonua, doiyamo looluakon dosudongoo, roda-roda tukon sombetambaga babasal, sasaibino doiya babalat sahingga aki natotimbang.

¹⁷Looluakon dosudong tambagadoo pokakana; suwe-suwele konakatandak 8 kometer tukon meeng kosudong oluno moluwedoi tambaga konakatandak 1,3 kometer. Doi potikunggon sasamba dosudongoo oluno daano konainanaman tukon binubungai delima saono moluwedoi tambaga.

¹⁸Sangalaasan doiya, Nebuzaradan lakoyo Imam Babasal Seraya, Sefanya potombonii imam, tolu komian pototooli TEMENENO Na Bonua tataapono, lima kotomundo napongotunggul pribadi mo daanoon doi kota, talenga, talenga nawakil mo uluse kosuludadu nakapalaluuwan, tukon 60 komian mo babasalkene kosuludadu bailon.

²⁰Sasaibino domianoo yana babakene doi Tomundo Nebukadnezar doi kota Ribla,

²¹doi lipu Hamat. Yanila sinakisaa indaa maka napo inakate. Bunomokaidoiya ko Yehuda mian-miano nainakutan luwedoi napo tano tukon napo binabaan doi bangaisonan.

²² Sambuno lapa doiya Tomundo Nebukadnezar oduduke Gedalya Ahikam napau tukon Safan natumbu, teali gubernur doi Yehuda sulano yana naparentayo sasaibino komian modaano mo dungol indaa.

²³Salataa sasaibino kosuludadu kapalano tukon sasaibino kosuludadu polobosian doi Yehuda mo akiyoon natulut doi Babel yanila lengele tentang Gedalya mo inoduduko teali gubernur, yanila sasaibino lubotiiyo Gedalya doi Mizpa. Do suludadu-suludadudoo kapalano doiyamo Ismael Netanya napau, Yohanan Kareah napau, Seraya Tanhumet napau moluwedoi kota Netofa, tukon Yazanya luwedoi kota Maakha.

²⁴Doibundu Gedalya bantile doi yanila sasaibino, “Komuyu inai pomatakutene kosambu-sambu doi Babel. Podungolokai tolong nai nda tano nia tukon potealimo tomundo Babel naata. Yaku tanggunge kopokasalamatan.”

²⁵ Bai doi bituwon kopituno dotaunoo Ismael Netanya napau tukon Elisama modaanoon tomundo nakatulunan, yana ampakon polaing ko 10 komian doi Mizpa. Yanila lubat tukon lobosiyo tukon akateyo Gedalya tukon Yehuda miano tukon ko Babel miano mo daano polaing Gedalya idoo.

²⁶ Maka sasaibino korayat Yehuda, mo kaasa maukai mo talalais, polaing-laing tukon sasaibino kosuludadu kapalano yanila bulen doi Mesir sabab yanila matakutene ko Babel miano.

²⁷Doi tanggal kolua kolonono pitu bituwon kosongulono lua doi taun kotolu kolonono pitu sambuno lapa Yoyakhin binaba doi bangaisonan, Ewil-Melodakh teali tomundo doi Babel. Doi taunoo koidan yana otudoikene konamaasi doi Yoyakhin, tukon sobiiyomo yana luwedoi talunggu lalomo,

²⁸tukon yana lakukanggene tukon monondok. Yoyakhin yana binee sambu mo loboian tatandak luwedoi tomundo-tomundo bailon mo inaison koidan doi Babel.

²⁹Yoyakhin akimo koidan namapake pakean talunggu tukon yana biasa kaan doi tomundo nakamali tukon yana binee doy mo tuuk doi natuboan.