Read Banggai 2 TOMUNDO-TOMUNDO 3 Bible Online

2 TOMUNDO-TOMUNDO 3 - Banggai bible

2 TOMUNDO-TOMUNDO 3

¹Doi taun kosongulono alu Yosafat nabapamarentaan salaku tomundo doi Yehuda, Yoram Ahab napau tealimo tomundo Israel tukon maparenta doi Samaria songulo lua kotaun konakalumbit.

²Yana lakukanggene komo lokis doi TEMENENO napambaleng, bai aki napokakana Ahab tukon Izebel nakulokisan, dona orangtuadoo. Kotamano natimbalang kinubai tuuk mososubaiyan pilogot lapamo namanase.

³Maukai napokakana Tomundo Yerobeam Nebat napau mo baparenta akiyoon yana nateali tomundo, yanakai koidan mangaanikene ko Israel miano baladosa tukon aki natade molakukene dolanggedoo.

⁴Tomundo Mesa mo luwedoi Moab mopiala domba. Salaku koluluno doi Israel natomundo, sasamba kotaun yana sio nabeena 100.000 kodomba pauno tukon koidan domba buluno moluwedoi 100.000 kodomba langgilo buluno.

⁵Bai Salataa Tomundo Ahab mate, Mesa lobosiyo ko Israel.

⁶Tobikon doiya Tomundo Yoram soisobiton mootinggale ko Samaria tukon ampakon mosadiayo sasaibino konasuludadu.

⁷Yana kapatuwo konateteba nia doi Tomundo Yosafat moluwedoi Yehuda, “Tomundo Moab naikon lobosiomo yaku; kai ikoo yase mopolobosi polaing yaku molawane yana?” Tomundo Yosafat timbiliyo, “Monondok! Yaku tukon kusuludadu tukon daku pasukan mopake adalan naikon lainge ikoo.

⁸Inaandokai konda loloon linoloi kalu kita ampakon molobosi?” Yoram timbiliyo, “Kita mangala loloon mo loloiyo ko Edom padango moluas.”

⁹Sambuno buno doiya maka lenggetokai Yoram polaing kotomundo Yehuda tukon tomundo Edom. Sambuno yanila ambakon pitu kooloyo konakalumbit, kabuso konapo paisu, sampe konapo pasukan tukon iyayon pangakut napo lolonggu tukon donapo iyayonoo akimo namonginum paisu.

¹⁰Tomundo Yoram bantile, “Silakamo kita! Ko TEMENENO lapamo tantukanggene baikon kita tolukita yana salakanggenemo doi tomundo Moab!”

¹¹Tomundo Yosafat mansadai, “Oilakai naimbaa akiyo konabi mo moola mansadai doi TEMENENO tuuk doi kita?” Daano komeeng kosuludadu kapalano moluwedoi Tomundo Yoram nasuludadu yana timbiliyo, “Daano Elisa Safat napau! Yana loolukon Elia nawakil.”

¹²Tomundo Yosafat bantile, “Tutuu! Takainomo ko TEMENENO basalita lolo doi yana.” Sambuno lapa doiya ampakonokai dotomundodoo motoluila doi Elisa.

¹³“Bulaando komuyu momakabi tulung doi yaku?” Elisa nabantilano doi tomundo Israeldoo. “Poampakonokai doipo orang tua nanabi-nabi!” Yoram timbane, “Aki! Sabab TEMENENO komo tantukene sulano nasalakanggene kami tolukami doi Tomundo Moab.”

¹⁴Elisa timbiliyo, “Tukon TEMENENO motubo, yaku moleleaniyo, yaku bantile tukon natutuuwan, baikon kalu bolikon Tomundo Yosafat yaku moodotiiyo, yaku aki kuiyase poulus tukon tuan.

¹⁵Budodoiya babayomokai doisumai komeeng mo toiyo maenggene kokasapi.” Daanoon domianoo momaenggene kona kasapi, ko TEMENENO Na Roh kuasaiyomo Elisa,

¹⁶sampe yana bantile, “Naiyamokai ko TEMENENO nabinantil, ‘Kubaiyomokai kogot-got doi paisuno batango namotuulan.

¹⁷Maukai naaki pokitayo koudan molubat kai mbombuul mopuul, bai kopaisu tausono daano doi paisubatangodoo namotuulan. Komuyu tukon poiyayon piniala tukon iyayon pangakut pololonggu naikon malaat paisu mobadaang sulano pobiya-biyai momonginum. ’ ”

¹⁸Maka Elisa bantile koikoidan, “Bai doiya tongo langge poipoisik doi TEMENENO napambaleng. Yana naikon beena koidan kamanangan doikoo luwedoi Moab mian-miano.

¹⁹Sasaibino konapo kota mo daano kobentengo tukon mono-monondok naikon komuyu manase; sasaibino kokayung modaano saono komuyu tapeyo, komuyu tutupe sasaibino kopaisumatano, sasaibino konapo lolonggu sinakakon doi kombung momolu-molumbang komuyu naikon sakule tukon batu polong kabus manas sasaibino.”

²⁰Modowakon, doi tempo mososubakonan sosubakon dowadowa, lombakai kopaisu molubat taalikon doi Edom konoiyomo dopaisudoo batango momotuul.

²¹Salataa ko Moab miano lengele baikon dotomundodoo motolu lubato yanila banggadudul lobosiyo, maka sasaibino komian — luwedoi mo motua polong doi motabo-tabokon — mo moola makanggi pandong tukon tombinde yanila pinalentakon tukon inabos doi napokalalatanan.

²²Modowakon, salataa yanila bangun dowa-dowa, kooloyo matano kodiolongiyo dopaisudoo bunggono sampe tokita memela bunosau.

²³Yanila wookon, “Sau! Pasti dosuludadu-suludadu kapalano moluwedoi tolu komusuh napasukan yanila lapamo poakate daanomo komo inakate! Mau nda ampapakon ndikuke konapo basandungan!”

²⁴Bai salataa do Moab mianno doo polong doi sandung doo Israel mianno kepunge yanila mundur terus maju lelenggene tukon akateyo yanila

²⁵tukon minanas konapo kota-kota. Sasamba koasi momolumbang kololongguno yanila mololoiyo, yanila sokuliyo tukon batu. Tukon bunodoiya sasaibino doasidoo totombuki tukon batu. Ko Israel miano sosongiyo batu sasaibino kopaisu matano tukon tapeyo kokayung-kayung modaano kosaono. Komo totinggal baimokai kota Kir-Hareset motongoduduk doi Moab nabatomundoan. Bai doibundu dokotadookai linobosi tukon sinokuli batu luwedoi mian-mianoo momapake aiyali.

²⁶Salataa tomundo Moab rasaiyo baikon yana akimo namoola bataanggon koidan, maka yana babayomo ko 700 kosuludadu kapalano mopandoi mapake bakoko, maka yanila kakaate moumbolii loloon momoola polong doi tomundo Edom napalataanan, bai aki nateali.

²⁷Tobikon doiya yana ndokiiyo konamalane, maka nasosubakene doi kota pagaro mobinetoon bunggono salaku sosubakon motuuk doi Moab miano napilogot. Sambuno lapa Tomundo Moab kubaiyo donasosubakonoo maka ko Israel miano matakuto, sampe yanila babayo konapo pasukan abali luwedoi kotadoo maka mule doi napo tano.