Read Banggai 2 TOMUNDO-TOMUNDO 4 Bible Online

2 TOMUNDO-TOMUNDO 4 - Banggai bible

2 TOMUNDO-TOMUNDO 4

¹Daano kooloyo meeng komeeng kobalu moluwedoi meeng konabi ampakon doi Elisa tukon bantile, “Tama, dakulangkai matemo! Tukon Tama toiyo yana koidan mian mo taat doi Mian Bisa, bai yana basamea doi meeng komian. Budodoiya domianoo lubat sulano naalayo looluakon dakupau tukon tealikene yana ata, salaku pebeal tamanoila nasamea.”

²Elisa sadaiyo, “Bulaando konamoolaan yaku motulungiyo Tina?” Boinedoo timbiliyo, “Akiyo daku oioila, alaasene zaitun lisisono meeng kobotol mopoipoisik.”

³Elisa bantile, “Ampakono mumasabol botol kosong bada-badaang doi Tina napoloolanikonan.

⁴Kalu lapamo doiya siokai Tina tukon Tina napau-pau pousok doi bonua lalomo tukon potataapikene kotataapon. Kundongiikenemokai dolisisonoo moluwedoi botolpoipoisikoo doi botol-botoloo, tukon poalaasene komo moonomo.”

⁵Sambuno lapa doiya maka boinedoo mulemo doi nabonua. Salataa yana tukon napau-pau usok tukon tataaponikene kotataapon, yana alayomo dobotol poipoisikoo mo daano ko Zaitun lisisonodoo, maka yana kundongiikene dolisisonoo doi botol-botoloo lalomo napau-pau mobeekene doi yana.

⁶Sambuno lapa moono dobotol-botoloo sasaibino, yana makabi meeng kobotol koidan. “Kabuso,” luwedoi meeng konapau napotimbili. Maka dolisisonoo akimo nalomba koidan.

⁷Doibundu dotinanoiladoo ampakon koidan doi Nabi Elisa, tukon Elisa bantile, “Balukenemokai dolisisonoo sulano koolino mukubaiyo pebeal sasaibino Tina nasamea, tukon kolabino moola naotuboiyo Tina tukon Tina napau-pau.”

⁸Doi Sunem dungol komeeng koboine mokaasa. Daano kooloyo meeng salataa Elisa ampakon doi Sunem, boinedoo uangemo yana mokaan. Tambuun doiya sasamba luunggon Elisa nalubat doi Sunem yana kaan doi boinedoo nabonua.

⁹Doibundu boinedoo bantilo doi nalangkai, “Yaku anggayo baikon do Tamadoo mo biasa lubat-lubat naimbaa tutuu yana meeng komian Mian napeleleani.

¹⁰Tadukai ndamokubai meeng kokombiang mo poipoisik doi ndabonua lotengo babo, tukon masadiakene tampat mooloan, meja, kulusii, tukon lampu sulano namoola dungol idoo sasamba luunggon nalubotiiyo kita.”

¹¹Doi meeng kooloyo Elisa lubat koidan doi Sunem. Sambuno yana liba doi nakombiang sulano nabalasanaang,

¹²yana sumboliiyo kona peleleani, kosambuno Gehazi, sulano naampakon uange boinedoo. Salataa lubat boinedoo,

¹³Elisa bantile doi Gehazi, “Sadaikene doi yana bulaando daku moolaan mobalese konapoo susaan tuuk doi kita. Ugaatene yana yase sulano kuampakon doi tomundo kai mobabasalkene kosuludadu tukon popikilikene konakapalaluuwan.” Boinedoo timbiliyo, “Yaku podungoli tukon dakukaluargaa tukon akiyo komai kakulangan.”

¹⁴Maka Elisa sadaiyo koidan Gehazi, “Kalubunodoiya, oilakai daku linakukon motuuk doi yana.” Gehazi timbiliyo, “Yana akiyo konapau, Tama, tukon konalangkai motuamo.”

¹⁵Elisa bantile, “Uangemokai boinedoo,” Gehazi ampakon mouwange boinedoo doibundu boinedoo lubat tukon kokondong doi tataapon.

¹⁶ Maka Elisa bantile doi yana, “Taun doi salaando, doi tempo pokakana nia, Tina lambinemo komeeng kopaulumboon mala-malaneno.” Boinedoo timbane, “Tama, inai mobakala-kala! Tama ikoo Mian Bisa napeleleani!”

¹⁷Bai tutuukai oilamo doi Elisa nabinatil. Taun doi salaando, uga-ugaate doi tempo mo pokakana boinedoo mosuungo meeng kopau malaneno.

¹⁸Salataa dopaudoo babasalo, daano kooloyo meeng doi lounu bapupuiyan, dopaudoo ampakon doi tamano mo daanoon doi kombung mo podungoli sasaibino konatolopupu.

¹⁹Sosinggoton dopaudoo monggeleomoniiyo kotamano, “Addoh! Masakit koolunggu.” “Babayomokai napaunia doi tinano,” bunomokai doiya kotamano doi meeng konapeleleani.

²⁰Dopaudoo binabamo doi tinano, maka kotinano abinemo Yana. Doi nakinobianan kooloyo dopaudoo matemo.

²¹Kotinano babayomo doi babo, doi Elisa nakombiang, tukon yana okooloyomo doi tampat mooloan bunggono. Salataa lapa doiya yana tobuat tukon tataapikene kotataapon,

²²maka ampakonokai Yana moduutiyo konalangkai. Yana bantile, “Mosumboliimokai meeng kopeleleani sulano nalubat doisumai tukon namababa meeng kokeledai. Yaku sio kumosobit-sobit moampakon doi Nabi Elisa, tukon yaku naikon mosobit abali.”

²³Konalangkai sadaiyo Yana, “Bulaando mosio muampakon diabudodoo? Naoloyo nia bolikon oloyo Tadean tukon koidan bolikon Oloyo Bituwon Boolu.” Yana timbiliyo, “Aki nabulaandokon.”

²⁴Salataa yana konoikene dokeledaidoo pombosiino, yana bantile doi napeleleani, “Umbasemokai nakeledai nia sulano naobulen tukon mosobit; inai mobeengiyo konasuutanan kalu aki kusumboliikon.”

²⁵Maka lenggetokai boinedoo moampakon doi Karmel Bunggulo doi Elisa natampat. Luwedoi nadodoonan Elisa kitayomo boinedoo molubat. Elisa bantile doi Gehazi, “Kitayo, ndabolokidoo moluwedoi Sunem yana lubat!

²⁶Mosoisobiton muampakon pososuunggene Yana tukon mansadaikene bulaando kondondoongo yanila meeng kokaluargaa.” “Sasaibino monondok,” boinedoo nabantilano doi Gehazi.

²⁷Bai salataa yana polong doi Elisa salaano, yana somba tukon lebeke Elisa aino. Gehazi adukon saakene yana luwe idoo, bai Elisa bantile, “Batadikenemokai tolong! Konatokitaan yana susah tuuno. Bai ko TEMENENO aki napopitoikene oioila doiyaku!”

²⁸Boinedoo bantile, “Tama, yaku aki kumakabi pau doi Tama. Lapamo kubantile koidan doi Tama sulano inai momebee moinian mo kala doiyaku.”

²⁹Elisa mbalenge doi Gehazi maka bantile, Mosobit! “Mosobit! Ndokiiyo dakutongkat tukon ampakonokai banggadudul doi boloki nia nabonua. Inai motade tuuk mebeean adat doi indeemokai komiano komu pinososuunggon doi loloon. Kalu komian beena adat doikoo, inai moaisene kotempo tuuk balasano konaadat. Kalu ikoo polongo, obosikenemokai dakutongkat doipaudoo butongo.”

³⁰Boinedoo bantile, “Tama Elisa! Tukon TEMENENO sambuno motubo tukon Tama butongo, yaku aki naikon kutinggale Tama!” Tobikon doiya lenggetokai Elisa polaing boinedoo doi nabonua.

³¹Gehazi lapamo loolukoniyo yanila sulano yana naabese doi Elisa natongkat doi paudoo butongo, bai dopaudoo akiyo koalalo kai tanda-tanda bailon baikon dopaudoo daanoon motubo. Maka ampakonokai Gehazi mopososuunggene Elisa tukon bantile, “Dopaudoo aki nabangun.”

³²Salataa yanila polong doi boinedoo nabonua, Elisa usok susuungo doi nakombiang lalomo tukon iyana kitayomo dopaudoo bajano daanoon motongokoolo doi tampat mooloan bunggono.

³³Sambuno bunodoiya Elisa tataaponikenemo kotataapon maka nasambeang doi TEMENENO.

³⁴ Sambuno lapa doiya yana pisaiyo dopaudoo bajano doi bunggut tukon yana alapete kobabano, komatano tukon kolimano doi babano, doi paudoo matano tukon limano. Salataa yana lakukanggene bunodoiya, maka dopaudoo butongo tealimo matalanas.

³⁵Sambuno lapa doiya Elisa banguno tukon amba-ambakon dombaa dombulo doi kombiangoo lalomo; doibundu koidan yana pisaiyo dopaudoo butongo doi bunggut. Doibundu dopaudoo yana sambaing pitu luunggon, tukon bukayomo komatano.

³⁶Elisa sumboliiyo Gehazi nauwange dopaudoo tinano, tukon sambuno dopaudoo tinano usok, bantilokai Elisa doiyana, “Naiya Tina napau.”

³⁷Dopaudoo Tinano somba doi Elisa salaano maka nabingkate tukon babayo donapaudoo doi tonggulung.

³⁸Daano kotempo meeng teali kobalaa malaalan doi posaapon kotano. Maka Elisa abali doi Gilgal. Doi tempo yana daanoon yana mootunggule komeeng konabi tambuno, yana sumboliiyo kona peleleani mangala balanga mo babasal tukon masaang kinaan motuuk doi yanila.

³⁹Daano komeeng moluwedoi nabi-nabidoo tobuat doi kombung momoumbolii nosuon, maka yana pososuunggene komeeng kokaliangano kodikat mosolot. Badaang tuuno kona inala dotanamanoo saono, tukon yana mulekenemo. Yana aki natingoniiyo oila dotanamanoo saono, yana poto-potoliyomo tukon yana saangemo doi balangadoo lalomo.

⁴⁰Salataa moyoomo, yana obo-obosikenemo doi nabi-nabidoo. Bai sodo napo tamise dokinaanoo, yanila nggeleamon doi Elisa, “Tama, naiya lasum!” Yanila akimo napo yase mokaane.

⁴¹Maka Elisa mosumbolii sulano naminangalakon soisik kotarigu, doibundu yana tiposiikene doi balangadoo lalomo. Sambuno lapa doiya yana bantile, “Ebesemo koidan dokinaanoo.” Salataa yanila kaane dokinaanoo akimo naminelukon.

⁴²Doi meeng kotempo mo bailon, daano komeeng komala-malane mo lubat luwedoi Baal-Salisa. Yana mababakene Elisa gandum mosodo pinatol tukon koidan lua kolono koroti mokinubai luwedoi gandum mosodo pinupui salaku hasil bapupuiyan tumbeno doi taunoo, tukon koidan gandum mosodo pinotoli. Elisa sumboliiyo kona peleleani moebe-ebese dorotidoo doi nabi-nabidoo,

⁴³bai dopeleleanidoo bantile, “Aki namungkin mosukup tuuk sakat komian!” Elisa timbiliyo, “Ebesemokai sulano napo kaan, sabab ko TEMENENO bantile baikon yanila naikon kaan tukon kalu lapamo yanila kaan daanoon kolabino.”

⁴⁴Dopeleleanidoo ebesemo dokinaanoo doi yanila, tukon yanila sasaibino kaano. Salataa lapa kaan daano kolabino pokakana ko TEMENENO mo lapamo bantile.