Read Banggai 2 TOMUNDO-TOMUNDO 5 Bible Online

2 TOMUNDO-TOMUNDO 5 - Banggai bible

2 TOMUNDO-TOMUNDO 5

¹ Naaman daanokai suludadu talengano doi Siria mosineseang tuuno tukon tomundo Siria odotiiyo yana. Sabab, lolo doi Naaman, ko TEMENENO lapamo beena kamanangan doi Siria nasuludadu. Naaman doiyamokai meeng kotalenga mobarani, bai yana takatolon.

²Doi meeng kotempo ko Siria miano lobosiyo kolipu Israel. Doi polobosianoo lalomo daano komeeng kopau boine Israel yana linako tukon binaba salaku mian motinaan, doibundu teali Naaman naboloki napeleleani.

³Doi meeng kooloyo bantilokai dopeleleanidoo doi na Tuan, “Nyonya, kalu andeno tuan ampakon pososuunggene konabi mo dungol doi Samaria, tantumokai donabidoo naikon tangalinggene tuan nasesel.”

⁴Salataa Naaman lengele dolanggedoo, yana ampakon doi tomundo tukon yana basalitakene oilamo boinedoo nabinantil.

⁵Do Tomundodoo bantile, “Monondok, ampakonokai doi tomundo Israel. Yaku naikon batulis surat doi yana.” Sambuno lapa doiya maka lenggetokai Naaman tukon mababa 30.000 kodoy perak, 6.000 kodoy mosoni, tukon 10 kopaar kopakean mo mono-monondok.

⁶Surat yana mo babayodoo konabantilan bunonaiya: “Lolo nai suratia yaku popitoikene daku suludadu kapalano, kosambuno Naaman, sulano Tuan namoola tangalinggene yana luwedoi nasesel.”

⁷Salataa dotomundo Israel basayo dosuratoo, yana sia-siake kona pakean sabab yana nggimal, tukon bantile, “Silaka, oila kosababpo dotomundo Siriadoo mokabiyo sulano kutangalinggene namian nia? Yaku bolikon Mian Bisa mo daano konakuasa momongotuboi kai moakateyo komian! Pasti dotomundodoo Siria tongo moumbolii sabaab tukon yaku!”

⁸Nabi Elisa lengele tentang dolanggedoo, tukon yana makapatumo teteba doi tomundo Israel konabantilano, “Bulaando Tomundo monggimal? Sumboliiyomo domianoo nalubat doiyaku sulano yana natoiyo baikon doi Israel nia daano komeeng konabi!”

⁹Tobikon doiya lenggetokai Naaman tukon naroda tuuk moampakon doi Elisa nabonua, tukon sambuno polong yana tade doi tataapon salaano.

¹⁰Elisa sumboliiyo komeeng kopeleleani sulano nabantile bunonaiya doi Naaman, “Tuan ampakonokai mumansau pitu luunggon doi Yordan Paisunobatango, pasti Tuan naikon tangalino.”

¹¹Salataa yana lengele doiya, Naaman nggimal tukon bantile, “Yaku pikikene yana naikon tobuat susuungo mopososuung yaku, tukon yana sambeang doi TEMENENO, na Mian Bisa, tukon napasekene kolimano doi babo taambikon doi butonggu mo masakit nia maka kuteali tangalin.

¹²Ko Abana tukon Parpar Paisunobatango doi Damsyik lobian kona monondokan tukon sasaibino kopaisubatango mo daano doi Israel! Yaku moola mansau indaa tukon teali tangalin!”

¹³Bai konapeleleani-peleleani koolaniyo yana tukon bantile, “Tuan, kalu andeno Tuan sinumbolii molakukene komeeng kolangge mo maaling, pasti Tuan naikon lakukanggene. Oilakai doiya koidan yana tongo sumboliiyo Tuan namansau sulano natangalin!”

¹⁴Tobikon doiya ampakonokai Naaman doi Yordan Paisunobatango maka usok tukon otombule kobutongo doi paisudoo batango lalomo pitu luunggon pokakana Elisa nasinumboliikon. Kobutongo tealimo sehat koidan pokakanamo kopau malane butongo.

¹⁵Maka yana tukon sasaibino komo lainge yana yanila abali doi Elisa. Naaman bantile doi Elisa, “Budodoiya yaku toiyo, baikon doi posaapon kodunia tongo daano komeeng ko Mian Bisa, doiyamo Israel miano na Mian Bisa sinosubai. Tobikon doiya siokai Tuan nasanaang motalimayo daku lobo bineekon doikoo.”

¹⁶Elisa timbiliyo, “Tukon TEMENENO sambuno motubo, yaku moleleaniyo, yaku aki naikon momantalima oilamo kolobono komo bineekon doiyaku.” Naaman susuliyo sulano Elisa naiyase talimayo konalobo bineekon, bai Elisa momeenggon tolake.

¹⁷Maka Naaman bantile, “Kalu Tuan akimo mutalimayo daku lobo bineekon, kabudoon pataikanakumo kumule momangalakit buta pomoonokon meeng kopaar daku keledai, sabab tambuun budodoiya yaku naikon mososubakono tongo tuuk doi TEMENENO, tukon bolikon tuuk doi ilah bailon.

¹⁸Kalukai yaku naikon sio kuloolainge tomundo siokai kutaus loolukon mosambeang doi Bonua Rimon Siria miano nabapilogotan, boliisi ko TEMENENO naompuniyaku.”

¹⁹Elisa bantile, “Ampakonokai tukon salamat.” Maka Naaman ampakono. Aki namalumbit Naaman nalenggetan,

²⁰Gehazi Elisa napeleleani, yana bapikir, “Ah, bulaando yana motongo sinobii ampakon aki nababeal? Konatutuuwan tuan yaku sio kutalimayo do Siria mianodoo nalobo bineekon! Tukon TEMENENO sambuno motubo, yaku sio kulelenggene yana tukon sio kumalaat meeng kolangge moluwedoi yana!”

²¹Maka Gehazi lelenggene Naaman. Salataa Naaman kitayo daano komian molubat, yana obulus luwedoi naroda tukon sadaiyo, “Daano kooila?”

²²Gehazi timbiliyo, “Maaf Tuan, yaku sinumbolii mobantile doi Tuan baikon sosodoan daano kolua konabi mongula molubat yanila luwedoi Efraim bunggulo. Yaku kabiyo sulano Tuan nabeenggu 3.000 kodoy perak tukon lua kopaar kopakean mo monondok tuuk doi nabidoo molua.”

²³Naaman bantile, “Tutuumo!” Tukon yana susuliyo sulano Gehazi namakanggi 6.000 kodoy perak. Naaman bungkuse dodoydoo doi lua kokandi lalomo, tukon mangala lua kopaar kopakean mo monondok. Sasaibino doiya yana beekene doi lua konapeleleani, yana mosumboliiyo ampakon loolukoniyo Gehazi.

²⁴Sambuno polong doi bunggul bunggono doi tampat Elisa nadungolan, Gehazi pulute dodoydoo tukon dopakeanoo moluwedoi Naaman napeleleani-peleleani, doibundu yana abesemo doi nabonua lalomo. Dopeleleani-peleleanidoo sinumboliimo mule,

²⁵maka nausok koidan doi bonua lalomo. Elisa sadaiyo, “Ikoo luwedoi yaando?” Yana timbiliyo, “Aki kuampakon doiyayaa Tuan!”

²⁶Bai Elisa bantile, “Konoanggu daano indaa salataa Naaman bulus luwedoi naroda sulano napososuung ikoo. Naiya bolikon kotempono sulano nda malaat doy tukon nda mongoli zaitun asino, anggur asino, domba tukon sapi tukon ata-ata!

²⁷Tobikon ikoo lapamo talimayo dolobodoo mobineekon, ikoo naikon komo talimayo koidan Naaman nasesel. Tukon koidankai tuuk sidutu-posidutukon doi mukatulunan naikon malaat doseseloo!” Salataa Gehazi tobuat luwe idoo, yana seselono kokulito-kokulito tealimo moute tuuno.