Read Banggai 2 TOMUNDO-TOMUNDO 6 Bible Online

2 TOMUNDO-TOMUNDO 6 - Banggai bible

2 TOMUNDO-TOMUNDO 6

¹Daano kooloyo meeng konabi-nabi Elisa mootunggule, yanila mondommuk. Yanila bantile, “Konda dungolan todudul madipot!

²Pataikenemokai mai ampakon momatape kayung batango doi napoloolanikonan ko Yordan Paisunobatango, tukon kami mongokkondong nda dungolan indaa.” Elisa timbiliyo, “Monondoko.”

³Daano komeeng komian moluwedoi yaniladoo susuliyo sulano Elisa nalainge yanila. Elisa satuju,

⁴maka yanila lengget polaing-laing. Salataa yanila polong doi Yordan Paisunobatango bibilo, tambuunokai yanila momatape kayung.

⁵Sosinggoton daano komeeng komian doi yaniladoo mootuwong kona olowang matano doi paisu lalomo. “Addo, Tama!” Yana nggeleamon doi Elisa. “Doiya olowang mo sinabol!”

⁶Elisa sadaiyo yana,, “Inaando kona tuwongan?” Domianoo tudoikene konatampat tuwongan, maka Elisa mangala meeng kokayung patolo maka nasakukene doi tampatoo. Sambuno lapa doiya maka lalatomo doolowangoo matano doi paisu bunggono.

⁷Elisa bantile, “Ndokiiyomo!” Domianoo ululemo kolimano maka napulute doolowangoo.

⁸Daano kotempo meeng ko Siria polobosi tukon Israel. Salataa yanila lapamo pomeenggon pikilan tukon sasaibino kosuludadu kapalano, tomundo Siria tantukanggenemo inaando konapo basandungan.

⁹Bai Elisa makapatu bilita doi tomundo Israel tuuk moingotiikene yana sulano inai naampakon doi tampatoo, sabab ko Siria miano biasa yanila loloiyo dololoonoo.

¹⁰Jadi kotomundo Israel ingotiikene komian mo dungol idoo sulano napo bada-badagai. Bunomokai doiya Elisa moimoiya luunggon naingotiikene doi tomundo.

¹¹Doiya langgedoo tomundo Siria aki naiyase, sampe yana uwange sasaibino konasuludadu kapalano tukon yana mansadai, “Pasti doi antara kita nia daano komo monghianat. Indee komiano? Ayo pailukenemo doi kami!”

¹²Daano komeeng komian moluwedoi sasaibino dosuludadudoo kapalano yana timbiliyo, “Akiyokai mau nabaino meeng komian, Tuan. Nabi Elisakai komo atambuune dolanggedoo. Yanamokai komo pelenggene doi tomundo Israel oilamo doi Tuan nabinantiloo, maukai doiya konabantilano doi kombiang mooloan lalomo.”

¹³“Posolidikiyomokai inaando yana,” tomundo naparenta, “sulano kulakoyo yana.” Daano komian mopailukene doi yana baikon Elisa daanoon doi Dotan.

¹⁴Maka kotomundo Siria makapatu indaa meeng kopasukan mo babasal linolaing adalan tukon roda polobosian. Yanila polong doi kotadoo kalipookano tukon yanila banggadudul molobosiyo dokotadoo.

¹⁵Modowakon, dowa-dowa tuuno salataa Elisa napeleleani bangun tukon tobuat, yana kitayo ko Siria nasuludadu molobosiyo dokotadoo tukon yanila sukup konapo adalan tukon roda polobosian. Jadi, yana abali doi Elisa tukon bantile, “Silaka kita, Tuan! Oilamo konda kinubai?”

¹⁶Elisa timbiliyo, “Inai matakut. Komo daano tambikon doi kita lobian konabadaangan luwedoi tambikon doi yanila.”

¹⁷Doibundu Elisa sambeang tukon bantile, “Oh TEMENENO, boliisi mubukayo dakupeleleani matano sulano namokita!” Ko TEMENENO talimayo Elisa nasambeang sampe salataa konapeleleanidoo mbaleng, yana kitayo dobunggulo moono tukon adalan tukon roda moaungan motikume Elisa.

¹⁸Salataa do Siria mianodoo molobosi, Elisa sambeang tukon bantile, “Oh TEMENENO, opiitemokai namian-mian nia!” Ko TEMENENO talimayo Elisa nasambeang, tukon sasaibino domian-mianoo tealimo piit.

¹⁹Elisa lubotiiyo yanila tukon bantile, “Komuyu taatapa. Naiya bolikon dokotadoo komuyu moumboliiyo. Maimo polaingaku, maka nasodo kuantekene komuyu doi mianoo komuyu moumboliiyo.” Maka Elisa antekene yanila doi Samaria.

²⁰Doi tempo napo usokiyano dokotadoo, Elisa sambeang tukon bantile, “Oh TEMENENO, okobilatekai komatanoila sulano napo mokita.” Ko TEMENENO talimayo Elisa nasambeang; yana bukayo domian-mianoo matano sampe yanila masainding mokitayo baikon yanila modaanomo doi kota Samaria.

²¹Sambuno kotomundo Israel kitayo dopai Siria mianodoo, yanila mansadai, “Elisa, kaimoola kuakateyo namian-mian nia?”

²²Elisa timbiliyo, “Inai! Sabea kosuludadu Tuan molakoyo doi polobosian lalomo bai Tuan aki naakateyo, oila koidan kalu tongo naiya. Beena kaan tukon inum doi yanila, maka sobiiyomo yanila naabali doi napo tomundo.”

²³Maka tomundo Israel mokubai lamean babasal tuuk yanila. Lapamo yanila kaan tukon inum, yana sumboliyo yanila mule doi tomundo Siria. Singgato doiya Siria mianno tademo moserange kotano Israel.

²⁴Bubula kotempo doibundu Benhadad tomundo Siria yana babayo sasaibino konasuludadu sulano nalobosiyo ko Israel. Yanila lobosiyo kokota Samaria,

²⁵tukon mangaanikene komalaalan mo hebat tuuno doi kota lalomo, sampe meeng kokeledai oluno koolino alu kolono kodoy perak, tukon lua koons kolapatiing natai koolino lima kodoy perak.

²⁶Doi meeng kotempo koidan salataa tomundo daanoon moamba-ambakon doi kota pagaro mobinetoon bunggono, daano komeeng koboine mo uwang, “Tuan, tulungiyaku!”

²⁷Do Tomundodoo timbiliyo doi yana, “Kalu ko TEMENENO aki natulungiyo ikoo, yaku koidan aki namoola tulungiyo ikoo? Yaku akiyo daku gandum kai anggur paisuno!

²⁸Oila komu sinusakon?” Boinedoo timbiliyo, “Natulanggu nia oluuliyakumo sulano mai kaane dakupau looluk, tukon namodowakon maka mai kaane konapau koidan.

²⁹ Tobikon doiya kami saange dakupau maka mai kaane. Modowakon kooloyono salataa yaku kabiyo sulano mai saange konapau, bai yana tongo seekene!”

³⁰Salataa Tomundo lengele dolanggedoo, yana siake konapakean sabab nasusaan. Komian-mian mo kokondong loolani doi pagaroo mobinetoon yanila moola kitayo baikon konabadukous tongo karung.

³¹Salataa tomundo kitayo doiya yana bantilo, “Doi oloyo nia Elisa sio namate. Sobiiyomokai ko Mian Bisa naukume yaku moto-motoong kalu yaku aki kuakateyo Elisa!”

³²Maka dotomundodoo mosumbolii meeng komian moloolukoniyo yana doi Elisa nabonua. Doi tempodoo Elisa daanoon doi nabonua, tukon moimoiya kotua-tua masyarakat modaanoon mopososuung idoo. Akiyon dotomundodoo nasosumbolii napolong, Elisa bantile doi tua-tua masyarakatoo, “Popalatikanggenekai! Dopangakatedoo mosumbolii mian sulano naakateyaku. Kalu domianoo polong, potataapikene kotataapon tukon inai popataikene yana nausok. Doibundukon naikon lubat tomundo susuungo.”

³³Elisa akiyoon nalapa basilingan, dotomundodoo polongo idoo tukon bantile, “Nasusaan nia TEMENENO komo tepokiikene doi kita! Jadi oila koidan konatotuuk yaku momoinikon kona tulungan?”