Read Banggai 2 TOMUNDO-TOMUNDO 7 Bible Online

2 TOMUNDO-TOMUNDO 7 - Banggai bible

2 TOMUNDO-TOMUNDO 7

¹Elisa timbiliyo, “Lengelekai oilamo ko TEMENENO nabinantil! Namodowa, uga-ugaate doi tempo pokakana nia, tongo meeng kodoy perak komian moola mongoli tolu kokilogram kogandum momonondok tuuno kai noom kokilogram kogandum kaliangano bailonggon.”

²Tomundo napongawal balese, “Aki namungkin! Doiya kala, maukai doi tempo nia koidan ko TEMENENO naobulusene koudan babasal tuuno mo luwedoi timbu!” Elisa timbiliyo, “Siokai naikon mukitayo dolanggedoo moteali, bai ikoo aki naikon mumantamis dokinaanoo mau natongo soisik.”

³Doi oloyodoo daano kosanggapo komian moseselon kokulito mo minosikiton yanila dungol doi Samaria tataapono mobabasal tonggulungo. Yanila pobontili meeng tukon bailon, “Oila kotakoso kita moosu-osulang naimbaa kita tongo montotiili matean?

⁴Kalu kita usok doi kota, kita naikon mate laal; tukon kalu kita tongo dungol naimbaa, kita naikon mate koidan. Kona monondokan kita ampakon doi Siria miano nabasandungan Paling-paling yanila akateyo kita. Bai daano konakamungkinan koidan kita aki nda binula-bulaandokonggon.”

⁵Sambuno kooloyo tambuuno kalipookan yanila ampakono doi Samaria miano nabasandungan, bai yanila aki namokita mau nabaino meeng komiankai idoo.

⁶Sabab, ko TEMENENO lapamo kubaiyo ko Siria miano yanila lengele koalal pokakana komeeng kopasukan babasal mo molokiti adalan tukon mo mapake roda. Do Siriadoo mian-miano yanila anggene kotomundo Israel lapamo tamboyo kotomundo Het tukon Mesir tukon sasaibino konasuludadu sulano nalobosiyo yanila.

⁷Tobikon doiya dopopookoo koidan yanila bulen mosalamatene kobutongo, tukon yanila tinggalemo kobasandungan, adalan tukon konapo keledai bunomodoiya koidan doi basandungan.

⁸Kosangkap komian moseselon kokulitodoo yanila polong doi basandungan bibilodoo, tukon yanila usokiyomo komeeng kosandung. Yanila kaan inum idoo tukon yanila mopulut mosoni, perak tukon pakean-pakean maka napo seekene. Sambuno lapa doiya yanila abali koidan tukon yanila usokiyomo kosandung bailon, maka yanila pulutiyo komian-mian nalolonggu-lolonggu.

⁹Yanila pobontili meeng tukon bailon, “Naiya nda kokubai nia aki namonondok. Nabilita nia bilita mo monondok tukon konatutuuwan kita sio nda popitoikene! Kalu kita totiiliyo polong namodowa, tantu kita inukum. Tadukai nda lapulkanggene nalangge nia doi tomundo nakamali.”

¹⁰Tobikon doiya yanila abali doi Samaria tukon yanila uwange kopadagai kota tataapono babasal, “Kami lapamo ampakon doi Siria miano nabasandungan, tukon kami laate indaa akiyo komian. Koadalan tukon konapo keledai kami laate daanoon motokooton doi natampat, tukon kosandung-sandung tongo inotinggal bunodoiya balo.”

¹¹Sasaibino dopadagaidoo yanila nggeleamonikene dobilitadoo, sampe komian pelenggenemo doi Tomundo nakamali.

¹²Doi tempodoo daanoon mopopook, bai dotomundodoo tobuat koidan luwedoi nakombiang mooloan tukon bantile doi sasaibino konapagawe, “Polengele! Yaku toiyo dopai Siria mianodoo natetel! Yanila toiyo kita daanoon doi malaalan lalomo, tobikon doiya yanila otinggale konapo basandungan tukon yanila ampakono mosapit doi padang sulano napoakakene kita nda tobuat momoumbolii kinaan. Salataa lapa doiya yanila tobuat tukon sosinggot lobosiyo kita tukon yanila dudukiyomo kokota.”

¹³Meeng kotomundo napagawe yana bantile, “Tuan, kita modaano nai kota kota nia, konda nasib pokakana tukon yanila mo matemo. Tobikon doiya tadukai nda mosumbolii moimoiya komian momolokiti lima koadalan moluwedoi antara koadalan-adalan mo daano, tukon napo ampakon indaa sulano napo kitayo oila komo tealimo.”

¹⁴Maka yanila molilik moimoiya komian, maka dotomundodoo sumboliiyo domian-mianoo sulano namolokiti lua koloda polobosian tukon yanila ampakon moondosuuke oila komo lapamo teali doi Siria nasuludadu.

¹⁵Yanila ampakon polong doi Yordan Paisunobatango. Doi popupuson kololoon yanila kitayo kopakean tukon pakakas-pakakas mo sasabul. Sasaibino doiya Siria miano tongo sakukene bunodoiya balo doi tempo napo bulengganano kobutongoila. Dobito-bitodoo mule tukon lapulkanggene doi tomundo oila komo lapamo tealidoo.

¹⁶Maka sasaibino ko Samaria tumbuno yanila obulen doi kota tonggulungo tukon yanila lambekemo ko Siria miano nabasandungan tukon sasaibino kobarang-barang mo daano koolino. Pokokonoi tukon oilamo ko TEMENENO nabinantil, tealikai baikon tolu kokilogram kogandum mo monondok tuuno kai noom kokilogram kogandum kaliangano bailonggon, koolino tongo meeng kodoy perak.

¹⁷Doiya kosinggato pososinggat kotomundo napangawal mo batugas sulano nadagaiyo kokota tataapono babasal. Yana mate idoo tukon korayat piikiyo kobajano. Doiya langgedoo teali pokokonoi tukon oila komo lapamo Elisa bantile doi tomundo doi tempo kotomundo nalubatan doi yana.

¹⁸Elisa lapamo bantile baikon uga-ugaate doi tempo mopokakanadoo namodowakon kooloyono, tolu kokilogram kogandum mo monondok tuuno kai noom kokilogram kogandum kaliangano bailon naikon binalukon doi Samaria tukon koolino tongo meeng kodoy perak.

¹⁹Tukon doiya kosinggato kotomundo napangawal pilibadidoo lapamo bantile, “Aki namungkin! Doiya mustahil, kalukai doi tempo nia ko TEMENENO moola naobulusene koudan mobabasal tuuno moluwedoi timbu!” Maka Elisa timbiliyo, “Ikoo naikon kitayo dolanggedoo moteali, bai ikoo aki naikon mumatamis dokinaanoo mau tongo soisik.”

²⁰Bunomokai doiya komo teali doimianoo — yana mate korayat pipiike kobajano doi kota tataapono babasal.