Read Banggai 2 TOMUNDO-TOMUNDO 8 Bible Online

2 TOMUNDO-TOMUNDO 8 - Banggai bible

2 TOMUNDO-TOMUNDO 8

¹ Daano kotempono meeng ko TEMENENO olubatene kobalaa malaalan doi tano Israel pitu kotaun konakalumbit. Akiyon napolong dotempodoo Elisa lapamo pailukene dolanggedoo Boine moluwedoi Sunem konapau mo lapamo inotuboidoo. Elisa sumboliiyomo yana koidan nabiyol tukon kona kaluargaa doi tano bailon.

²Boinedoo tulutiyo oilamo Elisa nabinantil, tukon yana lengget taus doi lipu Filistin sulano nadungol idoo.

³Sambuno lapa doloonu mopitu kotaunoo yana abalimo doi Israel. Doibundu yana tukon napau ampakon doi tomundo tuuk mokabiyo sulano konabonua tukon konaasi nainabalikon doi yana.

⁴Doiya kosinggato Gehazi peleleanino Elisa lapamo tomundo kabiyo sulano nabasalitakene tentang langge-langge minasaindinggon mo lapamo Elisa lakukanggene.

⁵Tukon tapaat kotempono boinedoo moluwedoi Sunemoo nalubatan momangadap doi tomundo sulano napelenggene konakakabi, Gehasi daanoon mobasalitakene tentang bulaando Elisa naotuboiyano koidan komeeng kopau momatemo. Maka Gehazi bantile, “Tuan mo mulia, naiyamokai boinedoo, tukon naiyamo konapau Elisa mo otuboiyo koidan!”

⁶Maka dotomundodoo sadaiyo tukon boinedoo basalitakenemo tentang dopaudoo. Sambuno lapa doiya dotomundodoo uangemo komeeng konapagawe tukon parentakene sulano sasaibino boinedoo nalobo nainabalikon doi yana, tongusokon sasaibino konakombung-kombung hasilo olino doi tempo pitu kotaun yana nadaanoan doi tano bailon.

⁷Daano kotempo meeng Elisa ampakon doi Damsyik. Pododuang Tomundo benhadad daanoon momasakit. Salataa dotomundodoo ndongoliiyo baikon Elisa daano doi Damsyik,

⁸yana bantile doi Hazael, meeng konapagawe, “Makanggikene lobo mo bineekon doi nabidoo, tukon kabiyomokai sulano yana namasadaikene doi TEMENENO oilakai yaku nia naikon tangalin kai aki.”

⁹Hazael mangala 40 kounta tukon yana muwotiiyo tukon sasaibino kohasil kaliangano doi kota Damsyik, maka ampakon doi Elisa. Salataa polong doi Elisa natampat, Hazael bantile, “Komuata Tomundo Benhadad, sumboliiyaku tuuk momasadaikene oilakai yana naikon tangalin kai aki.”

¹⁰Elisa timbiliyo, “Ko TEMENENO bantilemo doiyaku baikon yana naikon mate. Bai bantilemo tolong doiyana baikon yana naikon tangalin.”

¹¹Doibundu Elisa sumboliyo Hazael tukon pambaleng moaki namonondok sampe Hazael teali aki nasanaang konoano. Sosinggot Elisa kokiilo.

¹²Hazael sadaiyo, “Bulaando Tuan mokokiil?” Elisa bantile, “Sabab yaku toiyo kokulokisan ikoo naikon molakukanggene doi Israel miano, ikoo naikon suayo kona kota-kota mo daano kobentengo, akateyo kotabo-tabo mo monondoki, tukon ikoo kemele kopau-pau lumboon tukon batayo kotiano sasaibino koboine modaanoon motianan.”

¹³ Hazael timbiliyo, “Ah, yaku nia mian mo akiyo koanggano, aki namungkin yaku modaano dakukuasa mohebatoo!” “Ko TEMENENO lapamo tudoikene doiyaku baikon ikoo naikon teali tomundo Siria.” Elisa timbiliyo.

¹⁴Salataa Hazael abali doi kamali, mansadaimokai Benhadad, “Oilamokai Elisa nabinatil?” Hazael timbiliyo, “Yana bantile baikon Tuan pasti naikon tangalino.”

¹⁵Bai modowakon kooloyono Hazael mangala meeng kotoik lungut, tukon yana sepeke doi paisu lalomo maka nadedekene dotoikoo doi tomundo duduso sampe yana mate molomos. Doibundu Hazael tealimo tomundo Siria mosoboliyo Benhadad.

¹⁶Yehoram Yosafat napau teali tomundo Yehuda doi tempo Tomundo Yoram Ahab napau bapamarenta doi Israel lima kotaun.

¹⁷Doiya kosinggato Yehoram konaumur tolu kolonomo lua kotaun, tukon yana maparenta doi Yerusalem alu kotaun konakalumbit.

¹⁸Yana osowaan tukon Ahab napau, tukon pokakana Ahab nakaluargaa nalinakukanggon, yana koidan baladosa doi TEMENENO buno kotomundo-tomundo Israel.

¹⁹ Bai ko TEMENENO aki naiyase mosilakaiyo ko Yehuda sabab yana lapamo paladandi doi napeleleani Daud, baikon kona katurunan naikon tataap teali tomundo.

²⁰ Yehoram nabapamarentaan lalomo, ko Edom tambuuno mopalabiyok molobosiyo ko Yehuda tukon ko Edom mokubaimo batomundoan susuungo.

²¹Tobikon doiya, ampakonkai Yehoram tukon sasaibino kona roda polobosi tukon yanila ampakon doi Zair. Indaa kopasukan Edom lobosiyo yana, bai doi napopookanoo yana tukon sasaibino kopasukan talengano momapake roda moola lawane komusuh nabenteng, tukon konapo suludadu-suludadu kapalano bulen tukon mule doi nabonua suwe-suwele.

²²Tambuun doiya ko Edom akimo nataaluuk doi Yehuda. Doi tempodoo koidan kokota Bibnakai tambuuno palabiyok tuuk molobosi.

²³Kosalitano bailonggon mengenai Yehoram lapamo tinulis doi Tomundo-tomundo Yehuda Nabuku Tundun lalomo.

²⁴Yana mate tukon tinadin doi tomundo-tomundo nakinibulan doi Daud nakota. Konapau Ahazia komo teali tomundo mosoboliyo yana.

²⁵Ahazia Yehoram napau teali tomundo Yehuda doi tempo Tomundo Yoram Ahab napau lapamo maparenta doi Israel songulo lua kotaun konakalumbit.

²⁶Doiya kosinggato Ahazia kona umur lua kolonomo lua kotaun, tukon yana maparenta doi Yerusalem meeng kotaun konakalumbit. Kotinano sambuno Atalya, Tomundo Ahab napau tukon Omri tomundo Israel natumbu.

²⁷Sabab naosowaanan, Ahazia daano konapotaamian kaluargaa tukon Tomundo Ahab nakaluargaa. Ahazia baladosa doi TEMENENO bunopokakana Ahab nakaluargaa nalinakukon.

²⁸Tomundo Ahazia malaing momolobosi polaing Yoram tomundo Israel molawane Hazael tomundo Siria. Yanila polobosi doi Ramot, doi Gilead lipuno. Yoram pakolon doi polobosianoo lalomo,

²⁹maka yana abali doi kota Yizreel sulano napinakuli, tukon Ahazia ampakon moduutiyo yana indaa.