Read Banggai 2 TOMUNDO-TOMUNDO 9 Bible Online

2 TOMUNDO-TOMUNDO 9 - Banggai bible

2 TOMUNDO-TOMUNDO 9

¹Doi tempodoo Nabi Elisa uwange komeeng komian moluwedoi antara sasaibino konabi mo inotunggul tukon bantile, “Bato-batotobomokai sulano poampakon doi Ramot doi Gilead, tukon babayomokai nabotolia moinontoki tukon zaitun lisisono.

²Kalu ikoo polongo indaa umboliiyokai Yehu Yosafat napau tukon Nimsi natumbu. Oluuliyokai yana susuungo sulano naampakon doi meeng kokombiang,

³tukon kundongiikenemokai nalisisonia doi oluno sulleano; maka mubantile, ‘TEMENENO bantile baikon Yana oduduke ikoo teali tomundo doi Israel.’ Salataa lapa ikoo molakukanggene dolanggedoo, otinggalemokai dotampatoo moso-mosobit.”

⁴Nabi motataboonoo lengget tukon taus doi Ramat,

⁵maka nalaate Yehu tukon sasaibino kopanglima bailonggon mo daanoon mopopikili indaa. Do Nabidoo bantile, “Tuan, yaku mababa bilita tuuk doi Tuan.” Yehu timbiliyo, “Tuuk indee?” Donabidoo balese, “Tuuk Tuan susuungo.”

⁶ Doibundu yanila luaila usoko doi bonua lalomo, tukon donabi motabokonoo kundongiikenemo dozaitunoo lisisono doi Yehu oluno sulleano maka nabantile, “Ko TEMENENO Israel na Mian Bisa bantile, ‘Yaku lantike ikoo moteali tomundo doi kuumat Israel.

⁷Ikoo naikon akateyo kabus komu Tuan Ahab nakaluargaa. Tukon kalu buno doiya yaku ukume Izebel molapamo akateyo dakunabi-nabi tukon kuata-ata bailonggon.

⁸Sasaibino konakaluargaa tukon Ahab napau tumbu sio namate. Sasamba komalane mau motua maukai mo tabokon naikon sio kuakateyo kabus.

⁹Konakaluargaa sio kulakukanggene pokakana komo kulinakukanggon doi Yerobeam nakaluargaa tukon Baesa nakaluargaa, tomundo-tomundo Israel.

¹⁰ Izebel aki naikon natinadin. Kobajano naikon asu kaane doi Yizreel lipuno.’ ” Salataa bantile sasaibino doiya, donabi-nabidoo motabokon tobuat maka obulen.

¹¹Yehu abalimo doi tula-tulano, maka yanila mansadai doi yana, “Daano kobilita oila? Mianokon mo tando oila kopo iniyas?” Yehu timbiliyo, “Ah, komuyumo.”

¹²Yanila timbiliyo, “Ah, kami akimai toiyo! Yo bontiikanggamimo!” Yehu timbiliyo, “Yana pelenggene ko TEMENENO nateteba baikon ko TEMENENO odudukemo yaku teali tomundo Israel.”

¹³Tukon mosobit sasaibino Yehu tula-tulano yanila bukayo konapo jubah tukon yanila beleatene doi tukal doi Yehu salaano. Maka yanila puuke kotolompet tukon yanila wowookon, “Yehu tealimo tomundo!”

¹⁴Bunomokai doiya Yehu naposokongian molawane Tomundo Yoram mo doiya kosinggato yana daano doi Yizreel. Yoram ampakon indaa sulano namalaat papakuli konapakol-pakol mo laate doi polobosian lalomo doi Ramot lawane Hazael tomundo Siria. Yehu bantile doi tula-tulano sasaibino kopanglima, “Kalu komuyu satuju sulano kuteali tomundo, dagaiyokai sulano inai nadaano komeeng komiankai motobuat luwedoi Ramot sulano napopitoikene doi Yizreel mian-miano.”

¹⁶Sambuno lapa doiya yana lokitiyomo kona roda polobosian maka lengget taus doi Yizreel. Doiya kosinggato Yoran akiyoon natangalin, tukon Ahazia tomundo Yehuda daano indaa moduutiiyo yana.

¹⁷Salataa kopadagai kota Yizreel nabonua badagaiyan kitayo Yehu tukon kotula-tulano molubat, yana nggeleamon, “Daano komeeng komian tambuno mobadoisumaikon!” Yoram timbiliyo, “Mosumbolii meeng kosuludadu kapalano namolokiti adalan sulano naampakon moondosuuke oilakai yaniladoo tulanggita kai nda musuh.”

¹⁸Dosuludadudoo kapalano ampakon tukon molokiti adalan tuuk molaate Yehu tukon bantile, “Tomundo yase toiyo oilakai Tuan lubat salaku tulando.” Yehu timbiliyo, “Doiya bolikon muulusan! Ayo polaing-laingo yaku.” Dobonuadoo badagaiyan padagaino kitayo dosuludadudoo lubat polainglaing tukon mianoo tambuno, bai yana aki naabali. Maka yana lapurkanggenemo dolanggedoo doi tomundo,

¹⁹maka dotomundodoo sumboliiyo koidan komeeng kosuludadu bailonggon. Nasuludadu nia mansadai buno doiya koidan doi Yehu, tukon Yehu timbiliyo koidan, “Doiya bolikon muulusan! Ayo polaing-laingo yaku!”

²⁰Dopadagai bonua badagaiyan lapurkanggene koidan doi Tomundo Yoram baikon dobito-bitodoo yana polongo doi mianoo tambuno bai akimo naabali. Maka yana suungiyomo konabantilan, “Uga-ugaatene Yehu kokatuano domianoo tambuno, sabab yana lokitiyo konakeledai polobosian buno mian motando.”

²¹Tomundo Yoram maparentakene, “Sadiayo daku roda polobosian.” Dorodadoo sinadiamo, doibundu Yoram tukon Tomundo Ahazia yanila lengget napososuunggene Yehu, yanila suwe-suwele makanggi naroda polobosian. Yanila pososuunggene Yehu doi asi doiyamo Nabat naasi laingo.

²²Yoram sadaiyo doi Yehu, “Oilakai ikoo nia lubat salaku tulanggita?” Yehu timbiliyo, “Aki namungkin yaku nia salaku tulamu, sabab naimbaa daano komo sosubaiyo kopilogot, tukon daano badaang kotalapu-talapu motinambuun luwedoi tinamu Izebel?”

²³“Ahazia! Naiya mian mo lokis!” Yoram nggeleamon tukon palese kona roda maka nabulen.

²⁴Yehu bubute konapanah tukon beebuku maka yana panayo Yoram doi tonggulungo tadul doi pupulosono. Yoram tolubang, tukon mate doi naroda lalomo.

²⁵ Maka Yehu bantile doi naajudaan, Bidkar, “Oilakai ikoo daanoon moneneeke, doi tempo nda molokitian adalan momalaing Ahab, Yoram tamano? Doiya kosinggato ko TEMENENO bantile doi Ahab, ‘Yaku toiyo indee komo akateyo Nabot tukon napau-pau kolubabi, tukon yaku paladandi naikon moukume ikoo doi asi nia koidan.’ ” “Sabab doiya,” Yehu bantile koikoidan doi naajudaanoo, “Lambitenemo doi Yoram bajanodoo doi Nabot naasi, sulano nateali ko Mian Bisa naukuman doi yana.”

²⁷Ahazia kitoyomo oila komo lapamo teali, maka yana bulenggene konaroda polobosi pakatuuwo kokota Bed-Hagan. Yehu lelenggene yana tukon wookoniyo kona suludadu, “Akateyo yana koidan!” Yanila panayo yana tukon yanila pokoloniyomo doi loloon mo pakatuuwo ko Gur, loolani kota Yibream. Bai yana luput sabab yana dampasene kobutongo polong doi Megido, tukon idoo yana matemo.

²⁸Konapagawe-pagawe ndokiiyo kobajano tukon yanila alakite doi roda maka napo babayo mule doi Yerusalem, maka napo tadine doi tomundo-tomundo natinadinan doi Daud na Kota.

²⁹Ahazia teali tomundo Yehuda doi tempo Yoram Ahab napau lapamo parentayo ko Israel songulo meeng kotaun konakalumbit.

³⁰Yehu polongokai doi Yizreel. Salataa Izebel lengele tentang oila komo teali, yana kindeke konabuuk tukon mapake seet mopook, maka namontotile doi bilit luwedoi nakamali lolombongo.

³¹Salataa Yehu loloiyo kombamba babasal, Izebel uwang, “Eh Zimri, pangakate! Oila komuiniyas molubat doisumai?”

³²Yehu lelengea taambikon doi lolombong, tukon bantile, “Indee komo ala doiyaku?” Linongol doiya, lua tolu kopagawe doi kamali yanila montotile doi bilit.

³³Yehu bantile doi yanila, “Lambitenemo yana doi bilit!” Maka yanila sakukenemo Izebel doi bilit maka yana pinisaikon koroda sampe palapiit kosauno doi betoon tukon doi adalan-adalannoo rodano.

³⁴Maka Yehu usok doi kamali lalomo tukon yana kaan. Doibundu yana bantile, “Boinedoo yana kinutuk. Maukai nabuno doiya, bai potadinekai kobajano, sabab yana tomundo naboine.”

³⁵Bai salataa kopai mian ndokiiyo kobajano sulano napo tadine, yanila tongo pososuunggene kooluno botongo, tukon lolosuano buku-bukuno tukon aino.

³⁶ Salataa yanila lapurkanggene dolanggedoo doi Yehu, bantilokai yana, “Naiya TEMENENO lapamo tantukanggene, doi tempodoo yana bantilemo bunonaiya lolo doi Napeleleani Eli: ‘Izebel bajano naikon asu kaane doi Yizreel lipuno,

³⁷tukon dobajanodoo labi-labino naikon tasasabul pokakana koiyayon natai sampe akiyo komeeng komiankai moola tingoniiyo indee bajano ndoiya.’ ”