Read Banggai 1 TUNDUNAN 10 Bible Online

1 TUNDUNAN 10 - Banggai bible

1 TUNDUNAN 10

¹Ko Filistin miano polobosi tukon Israel miano. Yanila polobosi doi Gilboa bunggulo. Badaang ko Israel miano mo mate idoo, tukon kolabino tongusokon Tomundo Saul tukon namala-malane dampasene kobutongo.

²Bai ko Filistin miano tunduwe yanila tukon tolu komian doi Saul namala-malane inakate, doiyamo Yonatan, Aminadab tukon Malkisua.

³Dopolobosianoo todudulo hebat doi Saul potikunggon, tukon yana susuungo kanakon musuh napanah sampe yana pakolon.

⁴Maka Saul bantile doi pamuda mo babayo kona sanjata, “Kibutemo komu sabel tukon tobokakumo sulano ko Filistin miano mo aki natingoniiyo ko TEMENENO doo nabaino balamaengganaku.” Bai dopamudadoo aki naiyase tebeke Saul sabab yana matakut tuuno. Tobikon doiya Saul alayo konasabel susuungo tukon lubanggene kobutongo doi nasabel bunggono.

⁵Salataa dopamudadoo kitayo baikon Saul momatemo, yana koidan lubanggene kobutongo doi nasabel bunggono, maka mate.

⁶Maka matemo Saul polaing kona malane tolu tukon doiya pupuso lakon kona basambuan.

⁷Salataa sasaibino ko Israel miano mo dungol doi Yizreel pepelakono ndongoliiyo baikon ko Israel nasuludadu modampasenemo kobutongo, tukon baikon Saul tukon namala-malane momatemo, yanila obuleno tukon otinggalemo konapo kota-kota. Maka ko Filistin miano dungoliyo dokota-kotadoo.

⁸Modoakon salataa ko Filistin miano lubat tuuk mondikuke dobajan-bajanoo, yanila poloonggene Saul tukon dona malane motoluila mo matemo doi Gilboa bunggulo.

⁹Yanila liate Saul nabokukum polobosian, tukon patele kooluno, maka yana babayo taus. Lapadoiya yanila mobintokon bito-bito posaapon kolipu Filistin tuuk mopelenggene kobilita mondokoo doi yanila nabangsa tukon doi napo temeneno.

¹⁰Saul nabokukum polobosianoo inabos doi napo bonua sosubaan lalomo, tukon dinallu kooluno doi Dagon nabonua lalomo, doi napo ilah.

¹¹Salataa ko Yabes tumbuno doi Gilead ndongoliiyo oila komo lapamo Filistin miano lakukene doi Saul,

¹²komian-mian mobarani tuuno doi yaniladoo taus moalayo Saul bajano, tukon namala-malane maka kinanggi doi Yabes. Yanila kibule yana doi meeng kokayung babasal suukano, lapadoiya yanila bapuasa pitu kooloyo konakalumbit.

¹³ Saul mate sabab aki setia doi TEMENENO tukon aki nataatiyo konapalenta-palenta. Yana aki namakabi otunggul luwedoi TEMENENO, bai kai baino doi mian momate naroh-roh. Tobikon doiya ko TEMENENO hukume yana tukon salakanggene kona batomundoan doi Daud Isai napau.