Read Banggai 1 TUNDUNAN 11 Bible Online

1 TUNDUNAN 11 - Banggai bible

1 TUNDUNAN 11

¹Sasaibino ko Israel miano nakatua-katua lubat doi Daud doi Hebron tukon bantile, “Kami nia Tomundo nasobat.

²Doiloolukoo, kai salataa Saul daano mopalentayo kami, tomundokai komo katuaiyo ko Israel nasuludadu doi sasamba lunggon yanila namaju mopolobosi. Koidanggon Tomundo na TEMENENO Mian Bisa lapamo paladandi baikon Tomundo naikon komo katuaiyo Konamian tukon teali napo tomundo.”

³Maka Daud mokubai perjanjian tukon katua-katua Israeldoo. Maka yanila oduduke yana teali tomundo Israel buno komo lapamo TEMENENO dondiikene doi Samuel.

⁴ Daano komeeng kotempo Tomundo Daud tukon sasaibino kona suludadu Israel taus molobosiyo kokota Yerusalem. Doi tempodoo dokotadoo kosambuno Yebus, tukon Yebus miano komo dungoliyo, doiyamo kolipu tumbuno tuuno doi kotadoo.

⁵Ko Yebus mian-miano lapamo bantile doi Daud, baikon yana aki namoolakene mousokiyo konapo kotadoo. Bai Daud nggolayomo molambase konapai benteng mosinombuikon Sion. Doi tempodoo Daud lapamo pelenggene doi nasuludadu baikon komian tumbeno moakateyo komeeng ko Yebus miano naikon teali talenga. Maka sabab Yoabkai kotumbe-tumbeno molobosiyo ko Yebus miano, yanamo komo inoduduk teali talenga. (Yoab tinano kosambuno Zeruya.) Sambuno lapa molambase kobenteng Sion, Daud dungol idoo. Doiyamo kosababpo doi tempodoo dobentengoo sinombuikon “Daud Na Kota.”

⁸Daud bangune koidan dokotadoo tambuun doi tampat mokinatandak tukon buta taikon doi bunggul; doibundu Yoab tulusanggene polong polapakon.

⁹Daud pololokon malumbit pololokon bukuan, sabab ko TEMENENO Mo Balakuasa tulungiyo yana.

¹⁰Naiyamo kosambu-sambuno sasaibino Daud nasuludadu kapalano mo minotoonanggon. Polaing sasaibino ko Israel miano, yanila lapamo berjuang sulano Daud nateali tomundo buno komo lapamo TEMENENO dondiikene. Tukon yanila banggadudul moekeenggele kona basambuan.

¹¹Kosuludadu kapalano motumbeno doiyamo Yasobam Hakhmoni miano, yana katuaiyo ko “Triwira”. Idano doi meeng kopolobosian yana lawane ko 300 komian tukon akateyo yanila sasaibino tukon nasosiduk.

¹²Komian koluano doi Triwiradoo doiyamo Eleazar Dodo napau luwedoi Ahohi miano.

¹³Doi polobosian lalomo doi Pas-Damim yana kakaate tuuno motomboniiyo Daud lawane ko Filistin miano. Salataa kosuludadu Israel tambuuno modampas, yana tukon nasuludadu bataanggono doi meeng kogandum asino tanga-tangano maka namolobosi molawane ko Filistin miano daangodoo. Maka TEMENENO beena kamanangan mobabasal doi yana.

¹⁵Daano kooloyo meeng 3 komian luwedoi 30 Daud nasuludadu kapalano mobinalaanggon, taus mopososuung Daud doi meeng kotampat mo daano konabenteng doi meeng kobunggul batu loolani koleeng Adulam. Doi tempo doiya ko Filistin miano basandung doi Refaim Pepelakono, tukon meeng kopasukan luwedoi yanila modungoliyo ko Betlehem.

¹⁷Daud neneekemo dona lipudoo tukon bantile, “Eh, kalu yaku binee monginum paisu luwedoi bubung moloolani kotataapon mo babasal doi Betlehem.”

¹⁸Ndongolii doiya, tolu dosuludadudoo kapalano usokiyo ko Filistin miano nabasandungan maka mangauk paisu luwedoi bubungoo, lapadoiya maka nababayo doi Daud. Bai Daud aki naiyase talimayo, baimokai kundange salaku sosubakon doi TEMENENO.

¹⁹Yana bantile, “Tukon Mian Bisa, yaku aki kumoola inume napaisu nia! Kalu yaku monginum, bunopokakana yaku moinume komian sauno mo lapamo kakaatekene kobutongo.!” Jadi Daud tutuu aki naiyase momonginum dopaisudoo. Doiyamo dopejuangoo motolu mobarani najasa-jasa.

²⁰Domo tolu kolonodoo kosuludadu kapalano mo minotoonanggon sinumbuikon koidan “Tridasawira.” Abisai, Yoab utuso pioto komo katuaiyo yanila. Biasamo yana akateyo ko 300 komian tukon nasosiduk, tukon tobikon doiya yana teali minotoonanggon. Bai yana aki napokakana do Triwiradoo kona hebatan.

²²Meeng kosuludadu kapalano bailonggon mominotoonanggon doiyamo Benaya Yoyada napau, Kabzeel miano. Yana barani tuuno. Lua kotalenga mo babasal luwedoi Moab lapamo yana akateyo. Idano doi oloyo meeng mokoukoputon yana usok doi meeng koleeng buango lalomo tukon akateyo kosinga idoo.

²³Yana idano koidan naakateyo komeeng ko Mesir miano mobabasal kobutongo; konakatandak lobian lua kometer. Domianoo konasanjata sosiduk mobabasal tuuno, bai Benaya sasalaane tolongo tukon tongkat Pandong mo daano doi Mesiroo miano limano yana alayo maka yana pakeyo teali pangakate domianoo.

²⁴Doiyamo Benaya najasa-jasa meeng komian moluwedoi Tridasawira.

²⁵Doi kolompokoo lalomo, Benaya komo barani tuuno, bai yana aki napokakana konahebatan Triwira. Daud angkabe yana teali kapala pangawal Daud.

²⁶Tuundu naiya doiyamo suludadu kapa-kapalano bailon mototoi: Asael Yoab utuso pioto Elhanan Dodo napau Betlehem miano Samot Harod miano Heles Peloni miano Ira Ikes napau Tekoa miano Abiezer Anatot miano Sibkai Husa miano Ilai Ahohi miano Maharai Netofa miano Heled Baana napau Netofa miano Itai Ribai napau Gibea miano doi Benyamin benseno nalipu Benaya Piraton miano Hurai Gas pepe-pepelako miano Abiel Araba miano Azmawet Bahurim miano Elyahba Saalbon miano Hasyem Gizon miano Yonatan Sage napau Harari miano Ahiam Sakhar napau Harari miano Elifal Ur napau Hefer Mekherati miano Ahia Peloni miano Hezrai Karmel miano Naarai Ezbai napau Yoel Natan utuso Mibhar Hagri napau Zelek Amon miano Naharai Beerot miano, Yoab napakanggi senjata Ira tukon Gareb Yetri miano Uria tukon Het Zabad Ahlai napau (...)