Read Banggai 1 TUNDUNAN 12 Bible Online

1 TUNDUNAN 12 - Banggai bible

1 TUNDUNAN 12

¹Salataa Daud dampasene kobutongo luwedoi Tomundo Saul, yana biyol doi Ziklag. Badaang kopejuang mo molole tukon daano konapangalaman molubat pototongi tukon Daud.

²Yanila luwedoi Benyamin benseno pokakana Saul. Yanila pandoi bapanah tukon masakukon batu — mau tukon limano bakalinga maukai tukon limano bobo.

³Komo katuaiyo yanila doiyamo Ahiezer tukon Yoas Sema napau-pau moluwedoi Gibea. Naiyamo dopejuang-pejuangoo: Yeziel tukon Pelet Asmawet napau-pau Berakha tukon Yehu Anatot miano Yismaya Gibeon miano, pejuang motiningoniimo mo teali meeng kokatua doi kolompok “Tridasawira”. Yeremia, Yehaziel, Yonatan tukon Yozabad Gedera miano Eluzai, Yerimot, Bealya, Semarya tukon Sefaca Harufi miano Elkana, Yisia, Azareel, Yoezer tukon Yasobam luwedoi Korah miano Yoela tukon Zebaja Yeroham napau-pau Gedor miano

⁸Doi tempo nadaanoan doi natampat basandungan doi padang lalomo, badaang kopojuang mo totingonii tukon daano konapangalaman luwedoi Gad benseno lubat mopototongi tukon yana. Yanila daano kopojuang-pojuang motoiyo tuuno pakeyo kotombide tukon pandong; yanila tokita barani-barani buno singa tukon yanila napalabiok mosobit buno dunga.

⁹Naiyamo kopaisambunoila mosinusun pokana kopangkat: Ezer, Obaja, Eliab, Mismana, Yeremia, Atai, Eliel, Yohanan, Elsabad, Yeremia Makhbanai.

¹⁴Songobos luwedoi Gad miano daangodoo doiyamo suludadu kapalano motatandak mokapalaiyo ko 1.000 komian; kosongobos koidan suludadu kapalano mokapalaiyo ko 100 komian.

¹⁵Idano nateali doi bituwon komeengo, salataa ko Yordan Paisunobatango daano moeabaon dosuludadu-suludadudoo kapalano pintosiiyo dopaisudoo tukon siikayo komo dungoliyo kopepelakon-pepelakon mau motaalikon doi tolopot maukai komo taalikon talise dopaisudoo.

¹⁶Daano kotempo meeng luwedoi Benyamin tukon Yehuda benseno taus doi Daud nabasandungan tampat dungolan.

¹⁷Daud pososuung yanila tukon bantile, “Kalu komuyu lubat salaku mian tulano tuuk motombonii yaku, moola popototongi tukon kami. Kami talimayo komuyu tukon sanaang konoanggami. Bai kalu kopomaksuud kulokisene yaku doi musuh, maunaaki kumakabai lokis doi komuyu, ko Mian Bisa tumbunggita mososubaiyo Yana toiyo, tukon Yana naikon hukume komuyu.”

¹⁸Meeng komian luwedoi yanila, doiyamo Amasai, doibundu teali katua kolompok mobinantiloo “Tridasawira”, Mian Bisa Na Roh kuasaiyo maka bantile, “Daud, Isai napau! Kami tomboniiyo ikoo! Boliisi ikoo tukon yanila motomboniikon naberhasil. Ko Mian Bisa ala doikoo!” Maka Daud talimayo yanila tukon oduduke yanila teali suludadu kapalano doi polobosian lalomo.

¹⁹Doi tempo Daud polaing ko Filistin miano nalobosiano Tomundo Saul, songobos luwedoi Manasye benseno nasuludadu bapintasono taalikon doi Daud. Konabisaan Daud aki natomboniiyo ko Filistin mianodoo. Sasaibino ko Filistin katu-katuano sumboliiyo yana namule doi Ziklag sabab yanila matakutene inai-inaikene naikon napototongi tukon Tomundo Saul maka namusuwo yanila.

²⁰Naiyamo sasaibino kopojuang sambu-sambuno moluwedoi Manasye benseno mopintas doi Daud salataa yana doi naamapakonan lalomo taus doi Ziklag: Adnah, Yozabad, Yediael, Mikhael, Yozabad, Elihu tukon Ziletai. Suwe-suwele 100 kosuludadu kona kinapalai.

²¹Yanila suludadu mobarani tukon motomboniiyo Daud molawane kogorombolan. Oloyo doibundu yanila teali suludadu kapa-kapalano doi Israel naangkatan polobosian lalomo.

²²Kabi nasasamba kooloyo daano komian mosodo lubat mopomeenggon tukon Daud, tobikon aki namalumbit Daud napasukan teali babasal tuuno.

²³Salataa Daud doi Hebron badaang kopojuang mojagomo mopomeenggono tukon yana. Yanila tomboniiyo yana sulano yana namoola teali tomundo mosoboliyo Saul, pokokonoi tukon ko TEMENENO Naperjanjian. Buno naiya konapai kadaang: Luwedoi Yehuda benseno: 6.800 komian, lengkap tukon napo tombinde maka nasosiduk. Luwedoi Simeon benseno: 7.100 komian molinatimo. Luwedoi Lewi benseno: 4.600 komian. Yoyada nasuludadu katuaiyo Harun nakaturunan: 3.700 komian. Zadok namotolutusan, meeng kopojuang mongula mobarani: 22 komian — sasaibino kapalaiyo kokaluargaa. Luwedoi Benyamin benseno (Tomundo Saul benseno): 3.000 komian; badaang doi Benyamin benseno tataap setia doi Saul. Luwedoi Efraim benseno: 20.800 komian motololongol doi suwe-suwele kobenseno lalomo. Luwedoi Manasye benseno motaalikon doi talise ko Yordan Paisunobatango: 18.000 komian motinudo sulano natobatene Daud teali tomundo. Luwedoi Isakhar benseno: 200 kokatua polaing kona suludadu; nakatua-katua (...)

³⁸Sasaibino dopojuangoo taus doi Hebron kondondoongo baranimo tukon basadiamo mopolobosi tukon konatetel tuuk oduduke Daud teali tomundo posaapon ko Israel. Tukon sasaibino ko Israel miano bailon pomeenggono sulano nalakukene dolanggedoo.

³⁹Tolu kooloyo konakalumbit dopojuang-pojuangoo napodungolian Daud idoo maka balamean tukon kaane kokinaan tukon moininum, Israel miano bailonggon mosadiayo tuuk yanila.

⁴⁰Luwedoi bense-benseno taalikon doi lembet moodoon doiyamo luwedoi Isakhar benseno, Zebulon tukon Naftali, komian polubotii tukon molokiti keledai, unta, bagal tukon sapi mo moono tukon lolokitono lobo mokinaan: tarigu, ara saono, kismis, anggur tukon zaitun lisisono. Yanila koidan mababa saapi tukon domba tuuk kinolot tukon kinaan. Sasaibino doiya tudoikene bulaando sasaibino ko Israel miano nalaba-labaan.