Read Banggai 1 TUNDUNAN 13 Bible Online

1 TUNDUNAN 13 - Banggai bible

1 TUNDUNAN 13

¹Tomundo Daud mokubai rapat tukon sasaibino kona suludadu kapalano mokatuaiyo kopomeenggonan-pomeenggonan 1.000 komian tukon pomeenggonan-pomeenggonan mo 100 komian.

²Maka yana bantile doi sasaibino domianoila, “Kalu utus-utus satujuiyo, tukon ko TEMENENO yase, nda Mian Bisa, tadukai nda mobintokon bito-bito doi sasaibino koimam tukon Lewi miano daango doi napo kampung-kampung, tukon sasaibino konda mian bailon tuuk mosumboliiyo yanila nalubat pototongi tukon kita dimbaa.

³Nalapa doiya kita taus mondokiiyo ko Mian Bisa na Peti Perjanjian, molapamo binatadikon natotinggal malumbit doi tempo Tomundo Saul nabasambuan.”

⁴Sasaibino ko Israel miano mopototongidoo sanaang tukon dousullo tukon yana satujuiyomo.

⁵ Maka Daud pototongikene ko Israel miano doi posaapon kolipu, luwedoi Mesir kalalatano taalikon doi lalom polong doi Hamat loloono taalikon lembet sulano nandinokii do Peti Perjanjianoo luwedoi Kiryat-Yearim, maka nabinaba doi Yerusalem.

⁶ Maka Daud taus polaing yanila doi kota Baala, doiyamo Kiryat-Yearim, doi Yehuda benseno nalipu tuuk alayo ko Mian Bisa na Peti Perjanjian do Petidoo sinombuikon, “TEMENENO moosulang doi kerub bunggono.”

⁷Sambuno polong doi Baala, yanila alayomo do Peti Perjanjianoo luwedoi Abinadab nabonua, maka yana libakene doi koroda bunggono moboolu. Uza tukon Ahyo polainggene dorodadoo,

⁸tolongokai Daud tukon sasaibino ko Israel miano osu-osuleng tukon mana-manani tukon kokobukuan tuuno, tuuk odotiiyo ko Mian Bisa pinolainggon kokasapi, rebana, simbal tukon torompet.

⁹Salataa yanila polong doi Kidon natampat batudongiiyan gandum, dosapi-sapidoo motandane dorodadoo sambit, maka Uza ulule kolimano tukon taaniyo do Peti Perjanjianoo sulano naaki natuwong.

¹⁰Doi tempodoo ko TEMENENO nggimoliiyo doi Uza sabab dona kokubaidoo pokakana kototulai doi TEMENENO. Maka yana akateyo Uza idoo. Maka tambuuno doiya kosinggato dotampatoo sinombuikon “Peres-Uza”. Daud nggimal sabab ko TEMENENO moakateyomo Uza.

¹²Bai Daud matakut koidan doi Mian Bisa tukon bantile, “Diabudodoo bulaandomo kona moolaan kubabayo do Peti Perjanjian?”

¹³Tobikon doiya Daud akimo nateali mobabayo do Peti Perjanjianoo doi Yerusalem, bai yana abese doi Obed-Edom nabonua, Gat miano.

¹⁴ Tolu kobituwon konakalumbit do Petidoo natotinggalan idoo tukon ko TEMENENO balakaatiyo Obed-Edom nakaluargaa tukon sasaibino konatinotooli.