Read Banggai 1 TUNDUNAN 14 Bible Online

1 TUNDUNAN 14 - Banggai bible

1 TUNDUNAN 14

¹Tomundo Hiram moluwedoi tano Tirus bintekene konabito-bito doi Daud, koidan kauwalu Libanon tukon tukang-tukang kayu tukon tukang pokubai tela sulano mokubai kamali.

²Tobikon doiya Daud anggayo tuuno ko TEMENENO mo lapamo tataapkanggene yana salaku tomundo Israel tukon keenggele kona batomundoan tuuk TEMENENO namian nakapalaluuwan.

³Daud mangala koidan bubula koboloki doi Yerusalem, tukon malaat pau-pau koidan.

⁴Kona mala-malane mosinuung doi Yerusalem doiyamo: Syamua, Sobab, Natan, Salomo,

⁵Yibhar, Elisua, Elpelet,

⁶Nogah, Nefeg, Yafia,

⁷Elisama, Beelyada tukon Elifelet.

⁸Salataa ko Filistin miano lengele baikon Daud molapamo inoduduk teali tomundo Israel, yanila lubat molakoyo yana. Tobikon doiya Daud tobuat sulano napolobosi tukon yanila.

⁹Daanoon mopolobosi ko Filistin miano polongo doi Refaim Pepelakono tukon pondikuko doi pepelakonoo.

¹⁰Daud ndongoliiyo doiya yana masadai doi Mian Bisa, “TEMENENO, kai sio kulobosiyo ko Filistin miano daangodoo? Oilakai TEMENENO naikon beekene komanaangan doiyaku?” Ko TEMENENO timbiliyo, “Oode, lobosiyomo! Yaku naikon beena kamanaangan doi komuyu!”

¹¹Maka Daud tukon napasukan lobosiyomo ko Filistin miano doi Baal-Perasim tukon lungguiyo yanila. Daud bantile, “Ko Mian Bisa lapamo pakeyo yaku tuuk mousokiyo komusuh napalataanan buno eaba molubange sasaibino kolobo doi meeng kotempo lalomo.” Doiyamo kosababpo dotampatoo sinombuikon Baal-Perasim.

¹²Salataa ko Filistin napasukan bulen, yanila aki natodan mobabayo konapo pilogot lambe-lambeano. Daud maparentakene sulano dolambe-lambeadoo nasinua.

¹³Aki namalumbit doibundu ko Filistin miano lubat tukon lambase koidan ko Refaim Pepelakono.

¹⁴Idan koidan Daud makabi otunggul luwedoi Mian Bisa, tukon ko Mian Bisa timbiliyo? “Inai molobosiyo yanila luwedoi dimbaa, bai ampakono boilingiyo tukon lobosiyo yanila luwedoi sembeleng, lolani komurbei batang-batango.

¹⁵Kalu ikoo ndongoliiyo kolalo buno mian nalaakonan babaris doi kayung-kayungoo tubono tuuno, pomajumo, sabab yaku naikon ampakon doi salaamu tuuk molungguiyo ko Filistin nasuludadu.”

¹⁶Daud laksanakanggene oila ko Mian Bisa napinalentakon doi yana. Yana tukon napasukan kalayo ko Filistin nasuludadu tambuun luwedoi Gibeon polong doi Gezer.

¹⁷Maka tololongolo Daud sambuno doi sasamba kolipu tukon ko TEMENENO kubaiyo sasaibino komian matakutene Daud.