Read Banggai 1 TUNDUNAN 16 Bible Online

1 TUNDUNAN 16 - Banggai bible

1 TUNDUNAN 16

¹Do Peti Perjanjianoo inabos doi sandung lalomo molapamo Daud Sadiayo tuuk do Petidoo. Maka Yanila sosubakene doi Mian Bisa kososubakon mosinua tukon sosubakon paladamean.

²Salataa Daud lapa mososubakene dososubakon-sosubakonoo, yana balakaatiyo konamian tukon TEMENENO sambuno,

³maka ebe-ebese kokinaan doi yanila sasaibino. Memeeng komian modaano idoo mau mala-malane maukai boine malaat meeng kopatolo kosail molinalas, roti tukon kukis kismis.

⁴Daud mongoduduk bubula ko Lewi miano tuuk mokatuaiyo kobakolobokiyan kaledaan doi TEMENENO, Israel na Mian Bisa doi Peti Perjanjianoo salaano, tukon nanian tukon ngga-nggalano ko TEMENENO.

⁵Asaf linilik salaku nakatua tuuno tukon Sakharia konawakil. Yeiel, Semiramot, Yehiel, Matica, Eliab, Benaya, Obed-Edom tukon Yeiel, pinalentakon momaenggene kosimbal,

⁶tukon lua komian koimam, doiyamo Benaya tukon Yahaziel, pinalentakon sulano natataap puuke kotorompet doi Peti Perjanjianoo salaano.

⁷Doiyamo kotumbeno luunggon Daud sumboliiyo Asaf mobalimang tukon tula-tulano tuuk mananikene kongganggaalano ko TEMENENO.

⁸Basukuurkai doi TEMENENO babilitakenekai Konakinabasalan, salitayokai Kona kokubai doi sasaibino kobangsa-bangsa.

⁹Mananikenekai konggaalano ko TEMENENO babilitakene sasaibino Konalimang mo minasaindinggon.

¹⁰Yanamo ko TEMENENO Mo Meeng; pobalasanaango, sabab kita Yana kotumbuno; sasaibino komo sosubaiyo Yana siokai natedes.

¹¹Kabiomo kobukuanan luwedoi Yana, sosubaiyomo Yana posidutukon.

¹²Eh Yakub nakaturunan, Mian Bisa naata! Eh Israel nakaturunan, Yana namian linilik! Neneeke sasaibino komo minasaindinggon Yana mokubai, inai motoliminggene Kona kaputusan-kaputusan.

¹⁴Ko TEMENENO sasaibino doiyamo nda Mian Bisa Kona kaputusan laku doi sasaibino kodunia.

¹⁵Yana sidutu neneeke naikon konaperjanjian, konaperjanjian polong sidutu-posidutukon.

¹⁶ Doperjanjianoo Yana kubaiyo tukon Abraham, koidan doibundu tukon Ishak,

¹⁷ sinahkanggono tukon Yakub teali perjanjian mo posidutukon doi Israel miano.

¹⁸Konabantilano, “Kobuta Kanaan naikon Kubeekene doi komuyu teali mupusaka.”

¹⁹Looluk ko TEMENENO namian tubo salaku mian lubat indaa soisikkai yanila nakadaang.

²⁰Yanila lausala paipaisoboli kobangsa, biyol luwedoi meeng kolipu taus doi lipu bailon.

²¹ Bai ko TEMENENO aki nabatadikene indeemo komiano nalailainggene yanila; tuuk yanila, kotomundo-tomundo binee pangawasan,

²²“Inai pogangguwe komian-mian Kulinilik, inai pomokubai lokis doi Ku nabi-nabi.”

²³Mananimo tuuk TEMENENO; eh posaapon kodunia, samba kooloyo pelenggene kobilita mo monondok baikon Yana lapamo salamatene kita.

²⁴Salitayo konakinabasalan doi bangsa-bangsa, tukon nakokubai-kokubai mobarani doi umat manusia.

²⁵Sabab babasalokai ko TEMENENO tukon tanggaal tuuno; Yana sio naminatakuton lobian luwedoi sasaibino kopilogot.

²⁶Kobangsa bailon natemeneno tongo pilogot timbalango bai ko TEMENENO doiyamo komo pasitakayo kodapang mobabasal.

²⁷Yana inobosikon komonondokan tukon moliyousan, konabonua moono kuasa tukon sanaangan.

²⁸Nggaalemo ko TEMENENO, he bangggapi miano! Nggaalemo konamonondokan tukon bukuanan.

²⁹Nggaalemo kosambuno mo moliyous, tukon babayomo kososubakon doi nabonua lalomo. Sosubaiyomo ko TEMENENO tukon mapake pakean kaledaan!

³⁰Mbombokono doi salaano, eh posaapon kodunia! Dunia momoonggol moaki natounggot.

³¹Eh timbu tukon dunia, potedesokai! Babilitakenekai doi bangsa-bangsa baikon do TEMENENO doo Tomundo!

³²Momuukokai eh ikoo kotobun tukon koantoko! Balasanaango eh padang tukon sasaibino kopasakaino!

³³Kayung-kayung doi bonggulung naikon nggenggeleamon sabab lubato ko TEMENENO sulano namaparenta doi dunia.

³⁴ Basyukurkai doi TEMENENO, sabab yana monondok; konaseang sidutu posidutukon.

³⁵Bantilemokai, “Oode Mian Bisa, mai pasalamat, salamatenemo kami luwedoi bangsa-bangsa nakakuasaan tukon pototongikene kami koidan sulano mai moola basyukur tukon nggaale kosambu-Mu mo moliyous!”

³⁶Nggaalemo ko TEMENENO, Israel na Mian Bisa, diabudodoo tukon sidutu-posidutukon! Lapadoiya sasaibino ko Israel miano bantile, “Amin”, maka yanila nggaale ko TEMENENO.

³⁷Lapadoiya Tomundo Daud beena limang Asaf tukon Lewi miano bailon sulano natataap ulusiyo kolangge-langge mopalaluu doi bakaledaan doi tampat TEMENENO Na Peti Perjanjian nainabosan. Sasamba kooloyo yanila sio nabalimang idoo,

³⁸Yedutun Obed-Edom napau komo tomboniiyo tukon 68 komian bailonggon mo meeng kopuli tukon yana. Obed-Edom tukon Hosa doiyamo padagai tataapon-tataapon babasal.

³⁹Bai Zadok tukon imam-imam bailon binee limang sulano natataap uluse kobakaledaan tampat kaledaan doi Gibeon.

⁴⁰Samba kododowa tukon kinobian yanila sio namososubakon sosubakon mosinua doi balabaan bunggono pokokonoi tukon TEMENENO nahukum-hukum bineekon doi Israel miano.

⁴¹Imam Zadok tukon imam-imamoo Heman tukon Yedutun komo tomboniiyo tukon mian bailonggon molinilik tangalaas tuuk mananikene konanian panggaal doi TEMENENO sabab naseang mosidutu-posidutukon.

⁴²Heman tukon Yedutun koidan limange kotorompet, simbal tukon pakakas musik bailonggon mo minaenggon tuuk pololoi mana-mananian panggaal. Anggota-anggota Yedutun pulino binee limang sulano nadagaiyo kotataapon-tataapon babasal.

⁴³ Lapadoiya sasaibino komian mulemo doi bonua suwe-suwele. Bunomo koidan Daud mule tuuk kitayo kona kaluargaa.