Read Banggai 1 TUNDUNAN 17 Bible Online

1 TUNDUNAN 17 - Banggai bible

1 TUNDUNAN 17

¹Sambuno Tomundo Daud tataapo dungol doi kamali, doi meeng kooloyo yana uange Nabi Natan tukon bantile, “Kitayo, yaku nia dungol doi kamali mokinubai luwedoi kayung kauwalu Libanon, baikai ko TEMENENO Na Peti Perjanjian tolongo doi sandung lalomo!”

²Natan timbiliyo, “Lakukenemo sasaibino Tomundo naniat sabab ko Mian Bisa tulungiyomo Tomundo.”

³Bai doi popookoo ko Mian Bisa bantile doi Natan,

⁴“Tauso tukon pelenggenemo doi Daud Kupeleleanidoo Daku teteba nia, ‘Bolikon ikoo naikon komo kekendenge kobonua tuuk Yaku.

⁵Salataa ko Israel miano Yaku tobuatene luwedoi Mesir polong diabudodoo, akiyoon Kubiasa dungol doi meeng kobonua lalomo. Sidutu Yaku lausala tukon dungol doi meeng kosandung.

⁶Doi Kulausalaan lalomo polaing ko Israel miano akiyoon nabiasa Yaku masadai doi katua-katua molapamo Kupiliyo, oila kosababpo yanila moaki namokokondong meeng kobonua luwedoi kayung kauwalu Libanon tuuk Yaku.’

⁷Tobikon doiya, Natan bontiikene doi Daud kupeleleani baikon Yaku, TEMENENO Mo Babasalkonakuasa, bantil doi yana, ‘Ikoo lapamo kualayo doi mubalimangan mototoolian domba doi padang, tukon Kutealikene tomundo doi Israel kumian.

⁸Yaku lapamo tulungiyo ikoo doiyaando komu tausan tukon Yaku akabuse sasaibino komumusuh doi tempo mumolobosian. Ikoo naikon kubaiyo totingonii buno katua-katua mo babasal tuuno doi dunia.

⁹Tuuk Israel kumian lapamo Kusadiayo kotampat sulano nateali napo buta dungolan sulano yanila namalaat tuboan mo tanaang, aki naginanggu koidan. Tambuun yanila nalubatan doi buta nia loluk, tukon akiyoon nadaano konapo tomundo, komian-mian mokulokis konoano lobosiyo yanila. Bai doiya langgedoo akimo koidan nateali. Yaku paladandi naikon mokalayo sasaibino komu musuh, tukon Yaku naikon beekene komu katurunan.

¹¹Naikon, kalu laatemo komu matean tukon ikoo kinibul doi tumbumuyu nakinibulan, meeng komian luwedoi mumalane naikon Kuoduduke nateali tomundo. Yanamo naikon komo kekendenge kobonua tuuk Yaku. Konabatomundoan naikon Kukeenggele, tukon tuuk sidutu-posidutukon meeng komian luwedoi nakaturunan naikon maparenta salaku tomundo.

¹³ Yaku naikon teali tamano tukon yana naikon teali Kumalane. Yaku naikon tataap mokubai monondok doi yana pololoi tukon Kuperjanjian. Dakuperjanjian doi yana naikon tataap Kutaaniyo, aki Kulakukene buno doi Saul molapamo Yaku pusake luwedoi nabasambuan sulano mumoola teali tomundo.

¹⁴Mumalane Kulinilikoo naikon Kutealikene tomundo doi Kumian tukon Kubatomundoan tuuk sidutu-posidutukon, tukon pautumbu poisoboli koturunan naikon maparenta salaku tomundo.’ ”

¹⁵Natan popitoikene doi Daud sasaibino komo lapamo Mian Bisa okitakene doi yana.

¹⁶Maka Tomundo Daud usok doi TEMENENO Na Sandung lalomo. Yana osulang tukon sambeang, “Oh TEMENENO Mian Bisa, yaku tukon kukaluargaa aki napantas mantalima sasaibino komondokan mobadaangia Ikoo motudoikene doi yaku.

¹⁷Tukon Ikoo kubaiyo lobian badaang koidan doiya; Ikoo lapamo mokubai perjanjian doi kukaturunan tuuk tempo naikon molubat. Ikoo tutuu lakukene yaku salaku meeng komian babasal.

¹⁸Oilakai koidan komo moola kubantile doi-Koo, oh TEMENENO Mian Bisa? Ikoo toiyo sasaibino damupeleleani nia nandondoong, bai Ikoo beena pongodotiian doi yaku.

¹⁹Tolongo Mumongiasan susuu-Mu tukon tuuk kukapantingan Ikoo lakukene sasaibino kokokubai mobabasal nia tukon tontong-tontong tuuno.

²⁰Tolongo Ikoomo ko Mian Bisa, akiyo komo pokakana tukon Ikoo. Ikami toiyo dolanggedoo sabab lapamo binontiikon doi loolukoo.

²¹Doi posaapon kodunia akiyo kobangsa mobuno Israel. Israel doiyamo meeng kobangsa Ikoo mosodiiyo luwedoi baata-ataan sulano nateali Mumian susuu-Mu. Sasaibino kokokubai mobabasal tukon mominasaindinggon Ikoo molakukene tuuk yanila tealikene kosambu-Mu tiningonii doi posaapon kodunia. Ikoo sodiiyo Komumian luwedoi Mesir, tukon osodiiyo kobangsa-bangsa bailon doi tempo Komumian naampakonan molobosi.

²²Kobangsa Israel lapamo Ikoo tealikene Mumian susuu-Mu tuuk sidutu-posidutukon. Tukon Ikoo, oh TEMENENO, teali yanila na Mian Bisa.

²³Diabudodoo, oh TEMENENO Mian Bisa, moolamokai Mukenggele tuuk sidutu-posidutukon koperjanjian Ikoo mobantile tentang butonggu tukon kukaturunan. Moolamokai Mukubaiyo oila komo lapamo Ikoo paladandikene.

²⁴Doiyayaa komian naikon sidutu inakabasal kosambu-Mu tukon bantile, ‘TEMENENO Mo Babasalkonakuasa doiyamo Mian Bisa doi Israel.’ Tuuk sidutu-posidutukon meeng komian luwedoi kukaturunan naikon maparenta salaku tomundo.

²⁵Yaku kabaranikene kobutongguu molibakene nasambeangia doi-Koo, oh Mian Bisa, sabab Ikoo susuu-Mu lapamo bontiikanaku baikon dakupau tumbu potutundu koturunan naikon Ikoo tealikene tomundo doi bangsa nia.

²⁶Ikoo, TEMENENO, doiyamo Mian Bisa, tukon langge mo monondokoo lapamo Ikoo dondiikene doi yaku.

²⁷Tobikon doiya yaku kabiyo, namoolakai Mubalakaatiyo daku katurunan sulano nasidutu-posidutukon yanila natataap toupiyo ko Museang. Sabab, Ikoo lapamo balakatiiyo ko Mumian, oh TEMENENO, maka yanila naikon tataap binalakaati tuuk sidutu-posidutukon.”