Read Banggai 1 TUNDUNAN 18 Bible Online

1 TUNDUNAN 18 - Banggai bible

1 TUNDUNAN 18

¹Bubula kotempo molapa Tomundo Daud molobosi tukon lungguiyo ko Filistin miano tukon lambase kokota Gad tukon kampung-kampungo doi potikunggonan.

²Daud koidan lungguiyo ko Moab miano sampe yanila taaluk tukon babeal lulu doi yana.

³Lapa doiya Daud lungguiyomo Hadadezer, tomundo doi Zoba loolani ko Hamat lipuno doi tano Siria. Doi tempodoo Hadadezer daanoon doi ampakonan lalomo sulano nakuasaiyo kolipu loolani ko Efrat Paisunobatango naluwean.

⁴Daud lambase ko 1.000 koloda polobosian, tukon taane ko 7.000 komian kosuludadu modaano konaadalan tukon 20.000 komian kosuludadu moampakon aiai. Yana ekelemate sasaibino koadalan, alaasene pokuakon, baimo sukup tuuk 100 koloda polobosian.

⁵Ko Siria miano mo luwedoi Damsyik kapatuwo konasuludadu sulano natomboniiyo Tomundo Hadadezer, bai Daud lungguiyo yanila tukon akateyo ko 22.000 komian.

⁶Lapa doiya yana kekendenge kosuludadu nabasandungan doi napolipu tukon yanila taaluk tukon babeal lulu doi yana. Ko TEMENENO beena kamanangan doi Daud doiyaandomo kona polobosian.

⁷Tombide-tombide mosoni Hadadezer nasuludadu mopakeyo Daud lambase tukon babayo doi Yerusalem.

⁸ Sangalaasan doiya koidan badaang kotambaga Daud moalayo moluwedoi Tibhat tukon Kun, kokota-kota modoi loolukoo Hadadezer mokuasaiyo. (Oloyo doibundu dotambaga-tambagadoo Salomo pakeyo tealikene mangabosan paisu, maka sudong-sudong tukon pakakas kaledaan doi TEMENENO Na Bonua.)

⁹Tomundo Tou luwedoi Hamat lengele baikon Daud lapamo lungguiyo sasaibino Hadadezer nasuludadu.

¹⁰Maka yana sumboliiyo Yoram namalane sulano napelenggene kosalam doi Tomundo Daud tukon bantile salamat doi namanaanganoo, sabab Hadadezer lapamo polobosi idan tukon Tou. Yoram lubat doi Daud tukon babayo badaang kopalaseeng mosoni, salaka tukon tambaga.

¹¹Tomundo Daud sosubakene sasaibino dopalaseengoo doi TEMENENO tuuk pinake doi liturgi bakaledaan. Bunodoiya koidan konakinubaiyan tukon barang-barang mosoni tukon salaka mo lapamo yana lambase luwedoi Hadadezer tukon bangsa-bangsa nalinungguidoo, doiyamo bangsa Edom, Moab, Amon; Filistin tukon Amalek.

¹² Abisai (kotinano sambuno Zeruya) lungguiyo tukon akateyo ko 18.000 ko Edom miano doi Asin Pepelakono

¹³maka kekendenge kosuludadu nabasa-basandungan posaapon ko Edom. Maka taaluuko ko Edom mian-miano doi Tomundo Daud. TEMENENO beena kamanangan doi Daud doi yaandomo konapolobosian.

¹⁴Bunomokai doiya Daud namaparentaan posaapon ko Israel tukon dagaiyo sulano korayat nasidutu linakukanggon adil tukon monondok.

¹⁵Naiyamo kopagawe-pagawe motatandak kona pangkat Daud mooduduke: Suludadu talengano: Yoab Abisai utuso langgongo. Sekretaris doi kamali: Yosafat Ahilud napau. Imam-imam: Zadok Ahitub napau tukon Ahimelekh Abyatar napau. Jurutulis negara: Sausa. Tomundo napololaing pribadi: Benaya Yoyada napau. Daud namala-malane mataani sambu mo penting doi bapamarentaan lalomo.