Read Banggai 1 TUNDUNAN 19 Bible Online

1 TUNDUNAN 19 - Banggai bible

1 TUNDUNAN 19

¹Bubula kotempo doibundu Nahas Tomundo Amon mate, tukon namalane Hanun teali tomundo.

²Maka bantilo Tomundo Daud, “Nahas doiyamo kusobat mosetia, jadi mau yaku sio nabunodoiya doi Hanun, donapaudoo.” Tobikon doiya Daud bintekene kona sosumbolii doi Amon nalipu sulano nahibure yana sabab tamano namatean. Salataa yanila polong doi Amon,

³sasaibino kokatua doi lipudoo bantile doi Tomundo Hanun, “Inaikai Tomundo napikikene Daud bintekene kona sosumbolii doi Amon nalipu sabab yana yase moodotiiyo Tomundo tamano! Yana bintekene komian-mian doisumai salaku mata-mata tuuk solidikiyo kondalipu, sulano namoola lambase!”

⁴Tomundo Hanun lakeyo sasaibino Daud nautusanoo, maka daluwo konapo janggut, potoliyo konapo pakean potimbang koowako, tukon sumboliiyo taus.

⁵Bai yanila mammaa tuuk momule, jadi yanila taus doi Yerikho. Salataa dolanggedoo binontiikon doi Daud, yana kapatuwo kona teteba sulano domo binintokonoila nadungol doi Yerikho sampe tubo koidan konajanggut.

⁶Maka Tomundo Hanun tukon Amon miano sadariyo baikon yanila nakokubai tealikenemo Daud musuwo yanila. Tobikon doiya yanila kapatuwo ko 34.000 kokilogram kosuasa doi lipu Mesopotamia Bunggono, tukon doi Maakha tukon Zoba doi Siria tuuk matambo 32.000 koloda polobosi tukon suludadu mo pake adalan. Maka lubato tomundo Maakha nasuludadu tukon sasaibino koloda polobosi motinambodoo maka basandung loolani ko Medeba. Lubat koidan ko Amon miano luwedoi sasaibino konapo kota tuuk polobosi.

⁸Salataa Daud lengele dolanggedoo yana sumboliiyo Yoab tukon sasaibino konasuludadu momaju lawane komusuh.

⁹Tobuat ko Amon miano tukon ature konapai barisan doi Raba tataapono babasal salaano, yanila nakota babasal, tukon kotomundo-tomundo molubat sulano natomboniiyo yanila, ature konabarisan doi padang.

¹⁰Yoab kitayo baikon komusuh nasuludadu dapitemo yanila doi salaano tukon doi tonggulungo. Tobikon doiya yana piliyo ko Israel nasuludadu momonondok tuuno tukon yanila tinampatkanggon posasalaan tukon Siria nasuludadu.

¹¹Ko Israel nasuludadu labino bailonggon sinalakanggon doi Abisai Yoab utuso piyoto, mo ature yanila nabarisan posasalaan tukon Amon nasuludadu.

¹²Yoab bantile doi utusodoo piyoto, “Kalu akimo kumoola bataanggon luwedoi Siria nasuludadu, mosobit lubat tombonii yaku. Bunomo koidan, kalu ikoo aki musanggup molawane ko Amon nasuludadu, yaku naikon lubat motomboniikon.

¹³Keenggele konoamu! Mai nda berjuang tukon kabaranikon tuuk ndabangsa tukon tuuk nda Mian Bisa nakota-kota. Boliisi ko TEMENENO nalaksanakene oila Konamongiasan.

¹⁴Yoab tukon napasukan maju momolobosi sampe dampas ko Siria nasuludadu.

¹⁵Salataa ko Amon miano kitayo ko Siria nasuludadu modampasene kobutongila, yanila koidan obulen luwedoi Abisai tukon undur doi kota lalomo. Sambuno lapa molobosiyo ko Amon miano, Yoab mule doi Yerusalem.

¹⁶Ko Siria miano sadariyo baikon ko Israel miano lapamo lungguiyo yanila. Maka yanila uange konapai suludadu moluwedoi Efrat Paisunobatango lipuno taalikon doi tolopot tukon sumboliiyo konasuludadudoo namolobosi tukon Sobakh Hadadezer Tomundo Zoba nasuludadu talengano komo katuaiyo.

¹⁷Lengele dolanggedoo, Daud pototongikene sasaibino ko Israel napasukan, maka pintosiiyo ko Yordan Paisunobatango tukon ature konabarisan posasalaan tukon Siria miano. Maka yanila polobosimo,

¹⁸tukon mundur ko Siria nasuludadu Israel nasuludadu molobosiyo. Daud tukon napasukan mangakate 7.000 komian kopakanggi loda polobosi tukon 40.000 kosuludadu mololo aiai. Sobakh do Siriadoo nasuludadu talengano koidan inakatemo.

¹⁹Salataa Hadadezer natomundo-tomundo kinuasai kitayo baikon ko Israel nasuludadu lungguiyomo yanila, yanila kabiyo podame tukon Daud tukon somba doi yana. Lapa doiya ko Siria miano akimo koidan naiyase motomboniiyo ko Amon Miano.