Read Banggai 1 TUNDUNAN 21 Bible Online

1 TUNDUNAN 21 - Banggai bible

1 TUNDUNAN 21

¹Ko Iblis yase mosilakaiyo ko Israel miano; tobikon doiya yana oluuliyo Daud sulano nakubaiyo kobangaitan mian.

²Maka Daud bantile doi Yoab tukon sasaibino konasuludadu kapalano, kubaiyo kobangaitan mian doi posaapon ko Israel polong doi nakampung-kampung, sabab yaku yase toiyo bulaa konakadaang ko Israel miano.”

³Yoab timbiliyo, “Boliisi TEMENENO nasuungiyo badaang ko Israel miano polong sakat luunggon paku luwedoi yanila nakadaang diabudodoo nia. Bolikonkai, totoimo baikon komian mo tatandak konapangkat yanila taaluk doi tomundo? Bulaando mosio nakinubai kobangaitan mian? Totiili, sabab domo saladoo, sasaibino kobangsa tanggunge koakibato!”

⁴Bai tomundo tataap taaniyo donaparentahdoo, jadi Yoab taus doi posaapon ko Israel, polong doi kampung-kampung, doibundu abali doi Yerusalem,

⁵tukon pelenggene doi tomundo Daud dobangaitannoo hasilo. Komala-malane nakadaang mo moolamo natinealikon suludadu daano ko 1.100.000 doi Israel miano tukon 470.000 komian doi Yehuda.

⁶Bai ko Lewi benseno tukon Benyamin benseno aki natongusokon konakadaangoo. Yoab aki nakubaiyo kobangaitan mian doi yaniladoo sabab yana aki naiyase moampakonggene doi tomundodoo napalenta.

⁷Ko Mian Bisa aki nasanaang tukon dobangaitannoo mian tukon yana hukume ko Israel miano.

⁸Maka Daud sambeang doi Mian Bisa konabantilano, “Oh Mian Bisa, yaku baladosamo tuuno! Ompuni yaku, sabab dakukokubaidoo longas tuuno.”

⁹Ko TEMENENO bantile doi Nabi Gat, moteali pososuunggene Daud tukon TEMENENO,

¹⁰“Tauso tukon bontiikene doi Daud baikon Yaku beekene tolu komopilian doi yana. Oilamo tolong kona pinilih naikon Yaku kubaiyo.”

¹¹Maka Gat tauso doi Daud tukon pelenggene ko TEMENENO natetebadoo, konabantilano, “Yaando ko Tomundo nalinilik:

¹²Natano nia kanakon malaalan balaa tolu kotaun konakalumbit, kai Tomundo dampas musuh molelelelenggene tolu kobituwon konakalumbit, kai posaapon natano nia tolu kooloyo konakalumbit ko TEMENENO nalobosiano tukon nasabel pokakana kopanakit mobadonggiti, tukon Konamalaekat babayo komatean doiyayaa. Putusiyomo diabudodoo oila komo sio kupelenggene doi TEMENENO.”

¹³Daud timbiliyo, “Aduh, silakamo yaku! Bai kalu banggapi komo hukumaku, tadukai TEMENENO komo hukumaku, sabab babasal Konamaasi.”

¹⁴Maka ko TEMENENO lubatene kopanakit mobiyol-biyol doi mian bailon doi Israel miano tobikon matemo ko 70.000 komian doi yaniladoo.

¹⁵Maka ko TEMENENO bintekene komeeng komalaekat sulano namanase ko Yerusalem. Bai doi tempo domalaekatoo napolongan doi naloolanian Arauna Yebus miano nabatudongiiyan gandum, ko TEMENENO boliiyo Konakaputusan tuuk mohukume dobangsadoo. Yana bantile doi malaekatoo, “Sukupo! Tademo!”

¹⁶Daud kitayo domalaekatoo mobenga doi napotangaiyan kotimbu tukon buta. Tukon mataani bakoko doi limano, domalaekatoo basadiamo sulano namanase ko Yerusalem. Maka Daud tukon pau-paulakai, mo doi tempodoo daanoon momapake karung salaku paloosan manasalan, somba doibuta.

¹⁷Daud sambeang, konabantilano, “Oh Mian Bisa, yakumo komo sumboliiyo mokubaiyo dobangaitanoo mian. Nabangsa nia tutuu akiyo konasala! Oh TEMENENO, ku Mian Bisa hukumemo yaku tukon kukaluargaa, bai dedeenggene nasusaan nia luwedoi Muumat.”

¹⁸Maka ko TEMENENO namalaekat sumboliiyo Gat nabantile doi Daud baikon yana sio naliba doi Arauna nabatudongiiyan gandum tukon mokokondong balabaan idoo tuuk TEMENENO.

¹⁹Maka lenggetokai Daud pokokonoi tukon TEMENENO napalenta mo pinolonggon doi yana lolo doi Gat.

²⁰Doi tampat batudongiiyannoo gandum Arauna tukon sangkap konapau mala-malaneno daanoon mobabanting gandum. Sambuno Arauna namalane mosangkapoo kitayo domalaekatoo yanila obulen tukon sapit.

²¹Salataa Arauna kitayo Tomundo Daud molubat, yana lolobotiyo Daud tukon somba doi salaano.

²²Daud bantile doi yana, “Yaku yase bangune kobalabaan nai tampat nia tuuk TEMENENO, sulano kopanakit mobadonggiti nia natade. Tobikon doiya balukenemo nabuta nia doi yaku. Bantilemo bulaa koanggano, yaku naikon beale.”

²³Arauna timbiliyo, “Ah, alayomokai, Tomundo, tukon lakukenemo oioila Tomundo nainaanggon monondok. Naiya sapi-sapi nia teali sosubakon sinua, tukon tuuk Tomundo nakayung sinua tomundo moola naalayo naiya babantingan nia dopi-dopino. Moola koidan mangala gandum tuuk mosinosubakon. Yaku beekene sasaibino, maunaaki Kutuan nabeale.”

²⁴Bai Tomundo timbiliyo, “Inai! Yaku yase mooliyo tukon anggano mopantas. Yaku aki kuiyase mososubakene doi TEMENENO oila komu langge kai meeng kolangge motongo yaku sinabeaton.”

²⁵Maka Daud beale doi Arauna 600 kodoy mosoni tuuk tampatoo.

²⁶Maka Daud kekendenge komeeng kobalabaan idoo tuuk TEMENENO, tukon mososubakon sosubakon mosinua tukon sosubakon podamean. Doibundu yana sambeang tukon TEMENENO timbiliyo konasambeangoo tukon obulusene koaung luwedoi timbu mosuayo dososubakonoo doi balabaanoo bunggono.

²⁷Maka ko TEMENENO sumboliiyo domalaekatoo nasalunggene konasabel, maka domalaekatoo lakukene ko TEMENENO napalentadoo.

²⁸Salataa Daud kitayo baikon ko TEMENENO timbiliyo konasambeang sabab donasosubakonoo, maka yana sosubakene koidan kososubakon doi balabaanoo.

²⁹Doi tempodoo ko TEMENENO Na Sandung Musa mokubaiyo doi padang bone tukon balabaan tuuk sosubakon mosinua daano doi tampat bakaledaan doi Gibeon.

³⁰Bai Daud aki nabarani taus dombalaa sulano nabasilingan tukon Mian Bisa, sabab yana matakutene ko TEMENENO namalaekat nasabel.