Read Banggai 1 TUNDUNAN 22 Bible Online

1 TUNDUNAN 22 - Banggai bible

1 TUNDUNAN 22

¹Maka Daud bantile, “Nai tampat tia sio nakinokondong ko TEMENENO Mian Bisa Na Bonua. Tukon nia balabaan nia ko Israel miano sio namososubakon doi TEMENENO sosubakon mosinua.”

²Tomundo Daud sumboliiyo mopototongikene sasaibino komian lubat mo dungol doi lipu Israel, maka yana monggibalimanggene yanila. Songobos luwedoi yanila mangamaat batu tuuk bangunano ko TEMENENO Na Bonua.

³Tuuk mokubai paku tukon hengsel tuuk tataapon-tataapon babasal doi TEMENENO Na Bonua, Daud mokombul badaang tuuno kobesi-besi. Yana koidan mokombul badaang tuuno kotambaga, sampe aki naloi tinimbang.

⁴Luwedoi Tirus tukon Sidon miano yana moteteba badaang tuuno kokayung kauwalu Libanon.

⁵Daud lakukene sasaibino doiya sabab yana pikikene bunonaiya: “Yaku sio kusadiayo oila komo pinalaluu tuuk bangunano ko TEMENENO Na Bonua. Sabab dakumalane Salomo daano momuda tukon kinduung konapangalaman, baimokai TEMENENO Na Bonua nabinangunan sio namonondok tuuno tukon tongotoimo doi sasaibino kodunia.” Maka akiyoon Daud namate, yana sadiayo badaang tuuno kopakakas bangunan.

⁶Daud uwange konamalane, Salomo, tukon palentayo yana sulano nabangune kobonua tuuk TEMENENO Israel miano na Mian Bisa sinosubai.

⁷Daud bantile doi Salomo, “Ikoo dakupau, malumbito daku baniatan mokekendenge komeeng kobonua tuuk odotiiyano ko TEMENENO ku Mian Bisa.

⁸Bai ko TEMENENO bantile baikon yaku todudul sidutu molobosi tukon lapamo akateyo komian badaang. Tobikon doiya Yana aki napataikanaku mo mokokondong bonua tuuk Yana.

⁹Maukai nabuno doiya, Yana lapamo beekene doiyaku naperjanjian nia: ‘Ikoo naikon malaat meeng komalane naikon momaparenta tukon monondok, sabab Yaku naikon tomboniiyo sampe akiyono komusuh molobosiyo yana. Yana naikon sinombuikon Salomo sabab doi tempo namaparentaan, Yaku naikon beekene kokaamanan tukon monondokan posaapon ko Israel.

¹⁰Komumalane doiyamo naikon komo kekendenge kobonua tuuk doi Yaku. Yana naikon teali Kupau tukon Yaku teali Tamano. Ko Israel nasambu batomundoan naikon tataap doi nakaturunan tuuk sidutu-posidutukon.’ ”

¹¹Maka Daud bantile koidan, “Diabudodoo, ikoo dakupau, boliisi ko TEMENENO mu Mian Bisa nasidutu tomboniikon. Tukon boliisi mumoola kekendenge kobonua tuuk TEMENENO pokakana komo lapamo yana dondiikene.

¹²Tukon boliisi TEMENENO Mian Bisa nabeena pandoiyan tukon pangalatian doi komuyu tuuk palentayo ko Israel pokokonoi tukon nahukum-hukum.

¹³Kalu ikoo taatiyo sasaibino ko TEMENENO Nahukum bineekon doi Musa tuuk bangsa Israel, ikoo naikon berhasil. Ikoo sio muanggayo tukon barani. Inai momatakut mosasalaane oilamo koidan.

¹⁴Tentang TEMENENO Na Bonuadoo yaku lapamo kakaate tutuuno tuuk mokombule ko 3.400 kotoon komosoni tukon lobian 34.000 kotoon kosuasa. Sangalaasan doiya daano kotambaga tukon besi moaki natangait konakadaang. Kayung tukon batudoo lapamo kusadiakanggene, bai ikoo sio musuungiyo koidan.

¹⁵Ikoo daano mobadaang komu polimang. Daano komo moola balimang doi bakalian batu, daano kotukang kayung, tukang batu, tukon badaang tuuno kotukang mopandoi momokubai

¹⁶mosoni, salaka, tambaga, tukon besi. Jadi, tambuunemo mosobit! Boliisi ko TEMENENO natulungiyo ikoo.”

¹⁷Maka Daud sumboliiyo sasaibino ko Israel katuano motomboniiyo Salomo.

¹⁸Konabantilano, “TEMENENO mu Mian Bisa lapamo tulungiyo komuyu, tukon beena dame tukon namonondokan doi posaapon kolipu. Yana lapamo moolakene yaku lungguiyo sasaibino kobangsa loolukoo mo dungol doi lipu nia. Dia budodoo yanila taaluk doi komuyu tukon doi TEMENENO.

¹⁹Jadi, siokai potaat doi TEMENENO mu Mian Bisa tukon tootubo konoamu tukon mutuboan. Tambuuno mobangune kobonua tuuk TEMENENO, sulano kona Peti Perjanjian tukon sasaibino kopakakaso bailon mopinake tolong tuuk kaledaan moola nainabos idoo.”