Read Banggai 1 TUNDUNAN 23 Bible Online

1 TUNDUNAN 23 - Banggai bible

1 TUNDUNAN 23

¹ Salataa Daud lakaimo tuuno yana oduduke Salomo teali Israel natomundo.

²Tomundo Daud pototongikene sasaibino ko Israel nakatua-katua, imam-imam tukon Lewi miano,

³maka yana aite sasaibino komala-malane doi Lewi benseno motolu kolonomo lobian kotaun konaumur. Sasaibino daano ko 38.000 komian.

⁴Maka 24.000 komian doi yaniladoo binee limang sulano nalimange kobalimangan doi TEMENENO Na Bonua, 6.000 tuuk ulusiyo kolimang doi kantor tukon palakala-palakala doi pangadilan,

⁵4.000 tuuk padagai, tukon 4.000 koidan tuuk monggaale ko TEMENENO tukon mapake pakakas-pakakas musik molapamo sinadiakon.

⁶Daud ebe-ebese ko Lewi mian-mianodoo tolu kotambuno pokokonoi kopai benseno, doiyamo Gerson Kehat tukon Merari namian.

⁷Gerson daano kolua konapau malaneno: Ladan tukon Simei.

⁸Ladan napau mala-malaneno daano kotolu komian: Yehiel, Zetam tukon Yoel.

⁹Yanila doiyamo Ladan nakaturunan kapala-kapalano. (Selomit, Haziel tukon Haran doiyamo Simei napau mala-malaneno.)

¹⁰Sangkap Simei napau mala-malaneno mololoi napotutunduan kona umur doiyamo: Yahat, Ziza, Yeus tukon Beria. Yeus tukon Beria nakaturunan aki nabadaang, jadi yanila inaanggon meeng kotambuno komian.

¹²Kehat daano kosanggapo konapau mala-malaneno: Amram, Yizhar, Hebron tukon Uziel.

¹³ Amram doiyamo Harun tukon Musa tamano. (Harun tukon nakaturunan tuuk sidutu-posidutukon lapamo inalaas tuuk mouluse kopakakas-pakakas kaledaan, mosua kamangian tuuk TEMENENO, leleaniyo ko TEMENENO tukon balakaatiyo korayat lolo TEMENENO sambuno.

¹⁴Musa Mian Bisa napeleleanidoo konapau-pau mala-malaneno inusokon doi Lewi benseno lalomo.)

¹⁵Musa daano kolua konapau mala-malaneno, doiyamo Gersom tukon Eliezer.

¹⁶Komo teali katuano doi Gersom napau-pau doiyamo Sebuel.

¹⁷Eliezer tolongo meeng konapau malaneno kosambuno Rehabya. Bai Rehabya badaang tuuno konapau.

¹⁸Yizhar, Kehat napau koluano, daano konapau mala-malaneno kosambuno Selomit; yanamo komo kapalaiyo kokaluargaa.

¹⁹Hebron, Kehat napau kotoluno, daano kosanggapo konapau malaneno: Yeria kolanggongo, tundu Amarya, Yahaziel tukon Yekameam.

²⁰Uziel, Kehat napau kosanggapo, daano kolua konapau mala-malaneno: Mikha kolanggong, tukon Yisia.

²¹Merari daano kolua konapau mala-malaneno kosambuno Mahli tukon Musi. Mahli daano konapau mala-malaneno lua, doiyamo Eleazar tukon Kish,

²²bai Eleazar mate akiyo konapau malaneno; tolongo moluko konapau-pau mopokila tukon yanila tolidano, doiyamo Kish napau-pau,

²³Musi, Merari napau koluano, daano konapau malaneno tolu: Mahli, Eder tukon Yeremot.

²⁴Doiyamo kosambu-sambuno Lewi nakaturunan mototulis benseno kapalano sambuno tukon nakaluargaa suwe-suwele. Yanila konaumur lua kolono lobian kotaun tukon malaat limang doi TEMENENO Na Bonua.

²⁵Daud bantile, “TEMENENO Israel na Mian Bisa lapamo beena katanangan doi naumat, tukon Yana susuungo dungol doi Yerusalem tuuk sidutu-posidutukon.

²⁶ Tobikon doiya, ko TEMENENO Na Sandung tukon sasaibino kopakakaso mopinake tuuk kaledaan akimo napalaluu koidan ko Lewi miano tanggunge.”

²⁷Luwedoi Daud napalenta-palenta doibundu, sasaibino ko Lewi miano, kalukai 20 kotaun kona umur, sio nadinaftar sulano nabalimang.

²⁸ Yanila sio natomboniiyo koimam-imam Harun nakaturunan molakasanakene koliturgi bakaledaan doi TEMENENO Na Bonua lalomo, pialayo kokintal-kintalo tukon kombiang-kombiango doi TEMENENO Na Bonuadoo, tukon dagaiyo sulano sasaibino kolobo molapamo inalaas tuuk TEMENENO aki nateali lokis.

²⁹Yanila koidan bertanggungjawab doi limang nia: roti mosinosubakon doi Mian Bisa, tarigu mopinake tuuk mosinosubakon doi TEMENENO, kukis momanipi mokinubai aki napake ragi, sosubakon mo linalas, tukon tarigu mosinambulo tukon zaitun lisisono. Yanila sio koidan natimbange tukon takale kososubakon-sosubakon mobinaba doi TEMENENO Na Bonua.

³⁰Sangalaasan doiya yanila sio namanani tuuk nggaale ko TEMENENO sasamba kododowa tukon sasamba kopopook;

³¹koidan sasamba kotempo kalukai daano kososubakon mosinua tuuk TEMENENO doi oloyo Tadean, doi balameanan Bituwon Boolu, tukon balameanan-balameanan bailonggon. Tentang Lewi miano nakadaang doi sasamba luunggon kobalimangan, koidan lapamo kinubai koparaturano. Tuuk sidutu-posidutukon ko Lewi miano sio nalaksanakanggene dolimangoo.

³²Yanila koidan binee tanggungjawab sulano napialayo ko TEMENENO Na Sandung tukon TEMENENO Na Bonua tukon tuuk tomboniiyo koutus-utusoila, doiyamo sasaibino koimam Harun nakaturunan, molakukene kobakaledaan doi tampatoo.