Read Banggai 1 TUNDUNAN 25 Bible Online

1 TUNDUNAN 25 - Banggai bible

1 TUNDUNAN 25

¹Tuuk mokatuaiyo kobakaledaan, Tomundo Daud tukon sasaibino ko Lewi miano katuano lilike ko Lewi bense-benseno tuundu nia: Asaf, Heman tukon Yedutun. Yanila binee tugas tuuk mopelenggene koteteba luwedoi Mian Bisa tukon pinolainggon komusiik kasapi, gambus tukon simbal. Tuuk mokatuaiyo kobakaledaan tukon kona upacara suwe-suwele, ililik koregu-regu buno naiya:

²Asaf napau malaneno sangkap: Zakur, Yusuf, Netanya tukon Asarela. Komo katuaiyo yanila doiyamo Asaf, mopelenggene koteteba luwedoi Mian Bisa, kalukai tomundo sumboliiyo.

³Noom Yedutun napau malaneno: Gedalya, Zeri, Yesaya, Simei, Hasabya tukon Matica. Tukon tamanoila komo katuaiyo, yanila pelenggene koteteba moluwedoi Mian Bisa pinolainggon komusiik kasapi, tukon yanila mananikene konanian panggaal tukon bantilan syukur doi TEMENENO.

⁴Heman napau malaneno songulo sangkap: Bukia, Matanya, Uziel, Sebuel, Yerimot, Hananya, Hanani, Eliata, Gidalti, Romamti-Ezer, Yosbekasa, Maloti, Hoti tukon Mahaziot.

⁵Heman doiyamo tomundo susungo nanabi. Ko TEMENENO beena songulo sangkap kopau malanenodoo tukon tolu konapau boineno doi Heman sabab ko TEMENENO lapamo paladandi tuuk mobeena sambu motongodotii doi yana.

⁶Sasaibino Heman napau maenggene komusiik simbal, kasapi tukon gambus tamanoila komo katuaiyo tuuk napolainggene koupacara kaledaan doi TEMENENO Na Bonua. Asaf, Yedutun tukon Heman malaat limang pokokonoi tukon tomundo naotunggul.

⁷Domo lua kolono sangkap yanila napau malanenodoo tukon napai montolutusan doiyamo mian molinatimo tukon mopandoi maenggene komusiik. Yanila sasaibino daano ko 288 komian.

⁸Tuuk motantukanggene kona paisobolian kobatugasan, yanila sasaibino mokubai undian — mau momuda maukai momotua, mau mopangalamano maukai mosodo tambuun balajar.

⁹Domo 288 komianoo inobos lua kolono sangkap kotambuno mololoi kaluargaa suwe-suwele. Sasamba kotambuno 12 komian tukon meeng komian komo katuaiyo. Naiyamo kosambunoila napotuunduan mololoi undian: 1. Yusuf luwedoi Asaf nakaluargaa — 13. Subael 2. Gedalya — 14. Matica 3. Zakur — 15. Yeremot 4. Yizri — 16. Hananya 5. Netanya — 17. Yosbekasa 6. Bukia — 18. Hanani 7. Yesarela — 19. Maloti 8. Yesaya — 20. Eliata 9. Matanya — 21. Hatir 10. Simei — 22. Gidalti 11. Azareel — 23. Mahaziot 12. Hasabya — 24. Romanti-Ezer