Read Banggai 1 TUNDUNAN 28 Bible Online

1 TUNDUNAN 28 - Banggai bible

1 TUNDUNAN 28

¹Tomundo Daud maparentakene sulano sasaibino ko Israel katuano napototongi doi Yerusalem. Jadi sasaibino kobenseno kapalano, sasaibino kosambu moulusiyo kobasambuan, sasaibino kobenseno kapalano, sasaibino komo dagaiyo kobuat tukon tomundo naiyayon piniala tukon namala-malane — konapalusan sasaibino komo bakatuakene kokamali, suludadu kapalano tukon mian mopenting, sasaibino pototongi doi Yerusalem.

² Daud kokondong doi salaanoila tukon bantile, “Utus-utusonggu mo pomeenggon bangsa, ndongoliiyo! Malumbito dakuniat momokokondong meeng kobonua mobinetoon tuuk Peti Perjanjian, nda TEMENENO Mian Bisa nabatudangan. Yaku lapamo sadiakene sulano nakinokondong komeeng kobonua tampat sosubaan doi yana.

³Bai ko TEMENENO pantane yaku molakukene dolobodoo sabab yaku meeng kosuludadu mobadaango daku sau kinundang.

⁴Ko TEMENENO Israel na Mian Bisa sinosubai, lapamo lilike yaku tukon kokaturunan tuuk palentayo ko Israel sidutu posidutukon. Tuuk mosiapkanggene komeeng komian mobakatuai yana lilike Yehuda benseno, tukon luwedoi bensenodoo yana lilike kotamanggu nakaluargaa. Tukon luwedoi sasaibino kotamanggu naanggota kaluargaadoo yana pokonoi molilike yaku tukon tealikene yaku tomundo doi sasaibino ko Israel.

⁵Yana beena badaang kopau doi yaku tukon luwedoi sasaibino dakupaudoo yana lilike Salomo tuuk maparenta doi Israel, TEMENENO nabatomundoan.

⁶Ko TEMENENO bantile doi yaku bunonaiya: ‘Salomo mupau naikon bangune Dakubonua. Yaku lapamo lilike yana teali Kupau, tukon Yaku naikon teali Tamano.

⁷Kalu yana tukon bisa-bisa banggadudul tulutiyo sasaibino kohukum tukon Daku parenta-parentah pokakana konakinubai diabudodoo nia, Yaku naikon tataapkanggene kona batomundoan sidutu-posidutukon.’ ”

⁸Maka Daud bantile koidan, “Jadi diabudodoo, eh dakurayat doi nda Mian Bisa salaano tukon doi Israel napototongian nia salaano, TEMENENO nia naumat yaku kabiyo komuyu tukon bisa-bisa tulutiyo sasaibino konda TEMENENO Mian Bisa napalenta. Tukon buno doiya komuyu moola tataap milikiyo nalipu nia momonondok tukon tetebaikene doi mukaturunan tuuk sidutu-posidutukon.”

⁹Maka doi Salomo, Daud bantile, “Kupau, tadukai muakuiyo tamamu na Mian Bisa sinosubai, salaku mu Mian Bisa. Ikoo sio muanggayo Yana tukon moloyos tuuno tukon konoamu yase. Sabab Yana toiyo sasaibino kopikilan tukon namian naminooton. Kalu ikoo unggoliiyo Yana, ikoo naikon pososuunggene, bai kalu ikoo tinggale Yana naikon tolake ikoo tuuk sidutu-posidutukon.

¹⁰Neneekekai namono-monondok baikon ko TEMENENO lapamo lilike ikoo sulano nakekendenge kobonua moinalaas tuuk Yana. Nah, diabudodoo limange doiya tukon noamu tootubo.”

¹¹Sambuno lapa doiya Daud salakanggene doi Salomo konarencana mobangune ko TEMENENO Na Bonua, konagudang-gudang sasaibino kokombiango, tukon Kombiang Moliyous tuuno, tampat potolosan lalim.

¹²Daud salakanggene sasaibino konarencana molapamo yana pikikene tuuk paraturan-paraturan tukon kombiang-kombiang moboilingiyo, tukon tuuk godang-gudang palasadiaan TEMENENO Nabonuadoo tukon gudang-gudang tampat mangabosan langge-langge mobineekon tuuk TEMENENO.

¹³Yana koidan salakanggene korencana nainobosan koimam-imam tukon Lewi miano, limang-limang kaliangano mo sio napailimange, doiyamo yanila nalimang doi TEMENENO Na Bonua tukon sasaibino kopakakas bakaledaan napinialaan.

¹⁴Yana beena otunggul-otunggul cara kaliangano kokubaiyano komosoni tukon suasa tuuk mokubai pakakas-pakakas

¹⁵tuuk sasamba kolampu tukon lampu aino,

¹⁶tuuk meda-meda luwedoi suasa, tukon tuuk samba komeda mosoni tampat roti kinaan tuuk doi Mian Bisa.

¹⁷Tukon koidan otunggul-otunggul kaliangano konakadaang komosoni tulen napinake tuuk mokubai porok, manggo tukon mangabosan paisu, kosuasa kaliangano nakadang tukon mosoni tuuk mokubai pinggan-pinggan.

¹⁸Nakadang kaliangano mosoni tulen tuuk kinubai balabaang tampat mosuan dupa tukon mokubai kareta tuuk kerub timbalango tukon kapilo tobinggakon doi Peti doo Perjanjian TEMENENO bunggono.

¹⁹Maka Tomundo Daud bantile, “Doiya sasaibino tongusokon doi rencanadoo lalomo mo lapamo totulis pokokonoi tukon otunggul TEMENENO susuungo mobeekene doi yaku sulano nalinaksanakanggon.”

²⁰Doibundu Tomundo Daud bantile koidan doi namalane Salomo, “Ikoo sio muanggayo tukon barani. Tambuunemo dolimangoo tukon inai mombombokon doi oilamo koidan. Ko TEMENENO Mian Bisa kusinosubai naikon tomboniiyo ikoo. Yana aki naikon natinggale ikoo. Yana naikon loolainge ikoo sampe sasaibino dolimangoo lapa.

²¹Kolimang bakaledaan doi TEMENENO Na Bonua lalomo nainobosan lapamo tinantukon doi antara imam-imam tukon Lewi miano. Kopolimang-limang mopandoi doi balimangan lalomo suwe-suwele naikon tomboniiyo ikoo tukon sanaang konoano, tukon sasaibino kokatua polaing sasaibino korayat naikon loingiyo komuparentah.”