Read Banggai 1 TUNDUNAN 29 Bible Online

1 TUNDUNAN 29 - Banggai bible

1 TUNDUNAN 29

¹ Maka Tomundo Daud bantile doi sasaibino komian mopototongi idoo, “Luwedoi sasaibino dakumalane, Salomokai ko Mian Bisa nalinilik. Bai yana daano mopamudakon tuuno tukon daano mokurang kona pangalaman, sabeakai nalimang nia babasal tuuno. Tukon koidan naikon komo binangunoo bolikon kamali tuuk doi banggapi, baikai bonua tuuk doi TEMENENO Mian Bisa.

²Tuuk dobonuadoo pakakaso tukon lolongguno lapamo Yaku sadiakanggene pokokonoi tukon kungginoolakon. Yaku lapamo sadiayo komosoni, suasa, tambaga, besi, tukon batu-batu permata, batu-batu mobadaang kobotiko moteali pobubungaino tukon badaang tuuno kobatu pualam.

³Tukon koidan tolongo sabab kukikilaano daku Mian Bisa Nabonuadoo yaku lapamo salakanggene koidan kosuasa tukon mosoni luwedoi kubuat susuunggu:

⁴mosoni momonondok 100 lobian kotoon, tukon suasa tulen 240 kotoon teali palapiso TEMENENO Na Bonua sanggalo, tukon tuuk buat-buat mosio mian mo pandoi komo limange. Nah, diabudodoo indee komian koidan komoiyase mososubakon doi TEMENENO tukon sanaang konoano?”

⁶Maka sasaibino kobenseno kapalano, mobalakaikene kopuli, sasaibino kokatua tukon mo tanggung jawabpe tomundo nabuat nyatakanggene baikon yanila koidan yase momonyumbang.

⁷Maka yanila tuundu mobeekene nabuat-buat nia tuuk TEMENENO Na Bonua nabinangunanoo: mosoni 170 lobian kotoon, suasa 340 lobian kotoon, tambaga kabi 620 kotoon, tukon besi 3.400 lobian kotoon.

⁸Komian-mian modaano konabatu-batu permata salakanggene doi Yehiel sulano nainusokon doi TEMENENO Na Bonua doi tampat bangabosan buat lalomo. (Yehiel doiyamo meeng ko Lewi miano luwedoi Gerson benseno.)

⁹Korayat mebeekon tukon noa monondok doi TEMENENO tukon yanila laba sabab badaango konapai sinosubakon. Koidan mau Tomundo Daud bai labamo tuuno.

¹⁰Doi mianoo mobadaang salaano Tomundo Daud nggaale ko TEMENENO. Konabantilano, “Oh TEMENENO mai mbumbu Yakub na Mian Bisa sinosubai, Ikoo nggimaal sidutu-posidutukon!

¹¹ Ikoo tutuu babasal, tukon balakuasa. Ikoo monondok, sanaang tukon inodotii. Sasaibino kolobo doi timbu tukon doi buta doiyamo koo-Mu. Ikoo tomundo mo inodotii, mokuasaiyo sasaibino kolobo.

¹²Sasaibino kokaasaan tukon komonondokan luwedoi Komuyu; sasaibino kolobo Ikoo kuasaiyo tukon bukuanan; Ikoo balakuasa kubaiyo indeekai komo teali mian babasal tukon bukuan.

¹³Diabudodoo, oh komai Mian bisa, kami basukur doi-Koo, tukon nggaale kosambu-Mu mokinabasal.

¹⁴Yaku tukon dakurayat nia konatutuuwan aki nateali mebeekon oioila doi-Koo, sabab sasaibino Ikoo komo beekanggami tukon oila komai bineekon nia doiya koidan Koomu.

¹⁵Ikoo toiyo oh TEMENENO, baikon buno sasaibino komai mbumbu; kamikai ompokoniiyo natuboan nia salaku mian lubat tukon mian sangalaasan. Komai tuboan bunokai pialung moalo, tukon kami aki mai moola luput luwedoi matean.

¹⁶Oh TEMENENO, mai Mian Bisa, sasaibino kolangge modaano koanggano nia kami pototongikene dimbaa sulano mai mokokondong meeng kobonua buat Ikoo, sulano mai moola odotiiyo kosambu-Mu mo moliyous. Bai sasaibino doiya kami talimayo luwedoi Koo susuu-Mu tukon Koomumo koidan doiya.

¹⁷Yaku toiyo Ikoo ujiyo sasamba komian noano tukon Ikoo yase komian mo bilisii konoano. Lolodoi namoloyosan tukon nasanaangan konoanggu yaku sosubakene sasaibino nia doi-Koo. Yaku sakisiiyomo susuunggu baikon naiya Muumat nia mo pototongi dimbaa mebeekon sosubakon doi-Koo tukon noa sanaang.

¹⁸Oh TEMENENO Mian Bisa, tumbunggami Abraham, Ishak tukon Yakub nasinosubai, boliisi Ikoo mudagaiyo sulano naiya Muumat natataap seseange Ikoo pokakana diabudodoo nia tukon tulungiyo sulano yanila nasidutu setia doi-Koo.

¹⁹Beekenemo doi Salomo, kumalane komongiyasan motutuu sulano natulutiyo sasaibino Komupalenta tukon sulano nabangune dobonua kaledaanoo molapamo yaku laksanakanggene komo siniapkanggon.”

²⁰Sambuno lapa mosambeang bunodoiya, Daud bantile doi mian badaang mo pototongi idoo, “Nggaalekai ko TEMENENO mu Mian Bisa!” Maka sasaibino domianoo ngga-nggaale ko TEMENENO, nambumbuila na Mian Bisa sinosobai. Maka yanila somba tuuk moodotiiyo ko TEMENENO tukon tomundo.

²¹Oloyo koluano yanila mokolot iyayon sulano nasinosubakon salaku sosubakon doi TEMENENO maka inobosikon doi sasaibino korayat. Sangalaasan doiya daano ko 1.000 kosapi langgilo, 1.000 kodomba langgilo tukon 1.000 kodomba mongula mokinolot tukon mosinua tuuk doi balabaan bunggono. Yanila mososubakon koidan anggur mo pinake tuuk doi sosubakon-sosubakonoo.

²²Doi oloyodoo yanila kaan inum tukon sanaang doi TEMENENO salaano. Maka tuuk koluano luunggon pelenggemo baikon Salomo doiyamo tomundo. Mangatas doi TEMENENO sambuno, yanila resmikanggenemo yana teali napai tomundo tukon Zadok teali imam.

²³ Maka salaku posobolino kotamano Daud, Salomo tealimo tomundo pokakana komo lapamo TEMENENO tataapkanggene. Yanomo kotomundo mo moola sukses tukon minatakuton doi posaapon kobangsa Israel.

²⁴Sasaibino kopamarenta doi basambuanoo tukon suludadu polong doi Daud nama-malane bailon koidan akuiyomo Salomo nakakuasaan salaku tomundo.

²⁵Ko TEMENENO tealikene sasaibino korayat odotiiyo Tomundo Salomo tukon tealikene tomundo hebat tuuno lobiyoniiyo kotomundo bailon mobiasamo maparenta doi Israel.

²⁶Daud Isai napau maparenta doi Israel

²⁷ sangkap kolono kotaun konakalumbit. Doi Hebron yana maparenta 7 kotaun konakalumbit tukon doi Yerusalem 33 kotaun konakalumbit.

²⁸Yana kaasa tukon tongodotii tukon mate doi tempo namotuaan. Konamalane Salomo teali tomundo mosoboliyo yana.

²⁹Tomundo Daud natuboan salitano luwedoi tumbeno polong doibundu lapamo tinulis doi Nabi Samuel Nakitab lalomo, Nabi Natan tukon Nabi Gad.

³⁰Doi kitabpoo lalomo sinalita tentang kona basambuan kona kauasaan tukon sasaibino komo teali doi butongo, doi Israel tukon batomundoan-batomundoan doi potikunggon ko Israel.