Read Banggai 1 TUNDUNAN 5 Bible Online

1 TUNDUNAN 5 - Banggai bible

1 TUNDUNAN 5

¹ Ruben doiyamo Yakub napau langgongo. Bai sabab Ruben lapamo salakene komeeng komian kotamano naboloki piala maka konahaak salaku pau langgong inakiyonggon tukon bineekon doi Yusuf. Maukai nabuno doiya bai komo bukuan tuuno luwedoi Yakub nakaturunan bolikon Yusuf nabenseno bai Yehuda benseno. Tukon komo tumbe-tumbeno moteali tomundo doi sasaibino ko Israel miano daano luwedoi Yehuda nabensenodoo.

³Ruben Yakub napau langgongo, daano kosanggapo konapau malaneno: Henokh, Palu, Hezron tukon Karmi.

⁴ Naiyamokai kona potutunduan Yoel nakaturunan: Semaya, Gog, Simei, Mikha, Reaya, Baal tukon Beera. Beera komo katuaiyo Ruben nabenseno doi tempo Tiglat-Pileser tomundo Asyur nalakowano yana, tukon binaba doi nasinakukonan.

⁷Doi salita lalomo daano mototulis koidan kokatua-katua moluwedoi Ruben nabenseno doiyamo: Yeiel, Zakharia,

⁸tukon Bela Azas napau, Sema natumbu luwedoi Yoel pulino. Ruben benseno dungol doi Aroer taalikon doi lembet polong doi Nebo tukon Baal-Meon.

⁹Yanila motooli badaang tuuno koiyayon piniala doi Gilead lipuno. Tobikon doiya, yanila dungoliyo kotampat taalikon doi tolopot polong doi padang lalomo moluas motebeleaton popupuson ko Efrat Paisunobatango.

¹⁰Doi tempo Tomundo Saul nalounu, Ruben benseno lobosiyo tukon akalayo ko Hagri miano doi taalikon tolopot ko Gilead, maka dungoliyo dolipudoo.

¹¹Doi taalikon lembet Ruben nabenseno nalipu dungol Gad benseno doi tano Basan polong popupuson ko Salkha taalikon doi tolopot.

¹²Luwedoi Gad bensenodoo Yoel daanokai mian mototingonii nambumbu, tukon Safam mian mototingonii koluano. Yaenai tukon Safat doiyamo mian badaang bailon tumbunoila.

¹³Komian-mian bailon luwedoi Gad nabenseno tongusokon doi lalom pitu kobenseno koidan nia: Mikhael, Mesulam, Syeba, Yorai, Yakan, Ziya tukon Eber.

¹⁴Yanila Abihail Huri napau naturunan. Konapololoiyan kosalitano luwedoi bilit tinaakon doi babo daanoon bunonaiya: Abihail, Huri, Yaroah, Gilead, Mikhael, Yesisai, Yahdo, Bus.

¹⁵Bense-bensenodoo kapalano doiyamo Ahi Abdiel napau, Guni natumbu.

¹⁶Yanila dungol doi Basan lipuno tukon Gilead, tukon kota-kota doi lipudoo tukon doi posaapon kopadang mobulungon doi Saron.

¹⁷Nasalita nia nakinubaiyan doi Yotam nalounu tomundo Yehuda, tukon Yerobeam tomundo Israel.

¹⁸Doi Ruben nabenseno lalomo, Gad tukon Manasye benseno taalikon doi tolopot ko Yordan Paisunobatango daano ko 44.700 kosuludadu mo talatih tukon daano kona pangalaman mapakean tombide, sabel tukon panah.

¹⁹Yanila polobosi molawane Yetur benseno, Nafis tukon Nodab, yaniladoo bense-benseno doi bangsa Hagli lalomo.

²⁰Suludadu-suludadudoo anggayomo ko Mian Bisa tukon mangkabi tolong doi yana, maka Mian Bisa daanokene konapai kakabi tukon beena kamanaangan doi yanila luwe doi Hagri miano daango tukon napomeenggonan.

²¹Sabab polobosianoo teali luwedoi Mian Bisa namongiasan, maka badaang konapo musuh inakate. Yanila koidan kanggiyo ko 100.000 komian, tukon malambas 50.000 kounta, 250.000 kodomba tukon 2.000 kokeledai. Salataa lapa doiya yanila tataap dungol doi lipudoo polong doi tempo ko Israel miano natinaanan tukon kinanggi doi nasinakukonan.

²³Sembeleng Manasye benseno dungol doi Basan lipuno polong doi taalikon lembet potimbang ko Baal-Hermon, Senir tukon Hermon Bunggulo. Yanila pololokon malumbit pololokon tosuungi badaang.

²⁴Naiyamokai konapo benseno kapa-kapalano: Hefer, Yisei, Eliel, Azriel, Yeremia, Hodawya tukon Yahdiel. Yanila sasaibino daanoon suludadu-suludadu mo tambongan barani.

²⁵Ko Israel miano akimo nasetia doi tumbunoila na Mian Bisa sinosubai. Yanila tinggalemo yana tukon bakaledamo doi bangsa-bangsa molapamo Mian Bisa siikayo doi lipu Kanaan na temeneno-temeneno.

²⁶ Tobikon doiya ko Mian Bisa bukayo Pul noano tomundo Asyur, maka tausokai yana molobosiyo dolipudoo. Pul koidan tiningonii salaku Tiglat-Pileser. Maka Ruben benseno, Gad tukon Manasye benseno taalikon doi tolopot ko Yordan yana akute salaku mian motinaan tukon sinakukon doi Halah, Habor, Hara tukon doi meeng kotampat mo loolani ko Gosan Paisunobatango. Yanila dungol tukon manataap indaa polong doi oloyo nia.