Read Banggai 1 TUNDUNAN 9 Bible Online

1 TUNDUNAN 9 - Banggai bible

1 TUNDUNAN 9

¹Sasaibino ko Israel miano tinuliso mololoi nakaluargaa suwesuwele. Dodaftaroo totulis doi Tomundo-tomundo Israel Nabuku lalomo. Salaku ukuman doi yanila nalalim-lalim, ko Yehuda miano inakut doi Masakukonan.

²Luwedoi yaniladoo komo abali tumbe-tumbeno doi napo tano doi kota-kota doiyamo sambu-sambu, imam-imam, Lewi miano, tukon mian mobalimang doi TEMENENO Na Bonua.

³Kosembeleng luwedoi Yehuda benseno, Benyamin, Efraim tukon Manasye abali maka dungol doi Yerusalem.

⁴Daano 690 kokaluargaa luwedoi Yehuda benseno komo dungol doi Yerusalem, tongusokon Yehuda napau-pau nakaturunan kosambuno Peres, Syela tukon Zerah. Peres nakaturunan Utai komo katuaiyo. Utai nakaturunan mololoi napotuunduwan luwedoi bilit batagakon doi babo doiyamo: Utai, Amihud, Omri, Imri tukon Bani. Syela nakaturunan Asaya komo katuaiyo. Yana doiyamo kaluargaa kapalano. Zerah nakaturunan Yeuel komo katuaiyo.

⁷Benyamin benseno mian-miano mo dungol doi Yerusalem daano ko 956 kokaluargaa. Komo kapalaiyo doi yaniladoo doiyamo: Salu Mesulam napau, Hadowya natumbu, Hasenua natotokon Yibnia Yeroham napau Ela Uzi napau, Mikhri natumbu Mesulam Sefaca napau, Rehuel natumbu, Yibnia natotokon.

¹⁰Imam-imam mo bailonggon nia dungol doi Yerusalem: Yedaya, Yoyarib tukon Yakhin Azarya Hilkia napau, kotumbunoila doiyamo Mesulam, Zadok, Merayot tukon Ahitub. (Azarya doiyamo komo kapalaiyo kopagawe doi TEMENENO Na Bonua.) Adaya Yeroham napau; kotumbunoila doiyamo Pasyhur tukon Malkia. Masai Adiel napau; kotumbunoila doiyamo Yahzerah, Mesulam, Mesilemit, Imer.

¹³Sasaibino koimam mo teali kaluargaa kapalano, sasaibino daano ko 1.760 komian. Yanila pandoi molakukene sasaibino limang kaliangano doi TEMENENO Na Bonua.

¹⁴Ko Lewi miano daango bailonggon nia dungol doi Yerusalem: Semaya Hasub napau, kotumbunoila doiyamo Azrikam Hasabya luwedoi Merari miano. Bakbakar, Heres tukon Galal Matanya Mikha napau; kotumbunoila doiyamo Zikri tukon Asaf Obaja Semaya napau; kotumbunoila doiyamo Galal tukon Yedutun Berekhya Asa napau, Elkana natumbu, yana dungol doi kota Netofa tanono.

¹⁷Kopototooli-pototooli TEMENENO Na Bonua modungol doi Yerusalem polaing konapo kaluargaa doiyamo: Akub, Talmon, Ahiman, tukon Salum pototooli kapalano.

¹⁸Polong doi oloyo nia komian-mian mo luwedoi yanila solipuan balimang dagaiyo kotataapon babasal tuuno talikon doi tolopot. Looluk komian-mian moluwedoi yanila solipuan balimang dagaiyo kotataapon-tataapon babasal mo sasalaane ko Lewi miano nabasandungan.

¹⁹Komo sinumbolii balimang modagaiyo kotataapon usokan doi TEMENENO Na Sandung doiyamo Salum polaing-laing komian-mian solipuan tukon yana, doiyamo Korah miano. (Salum doiyamo Kore napau Efyasab natumbu.) Loolukoo yanila nambumbu lakukene kolimangoo salataa yanila meleleleani doi TEMENENO Na Sandung.

²⁰Pinehas Eleazar napau — boliisi TEMENENO nalindungiyo yana! — biasa kapalaiyo yanila.

²¹Zakaria Meselemya napau koidan daanon pototooli TEMENENO Na Bonua tataapono babasal.

²²Sasaibino moililik tuuk padagai tataapon-tataapon babasal daano ko 212 komian. Yanila tinulis mololoi kampung-kampung yanila natampat dungolan. Tomundo Daud tukon Nabi Samuel beena dobasambuanoo doi tumbunoila.

²³Salataamo doiya yanila tukon napo katurunan tataap teali padagai TEMENENO Nabonua tataapono babasal.

²⁴Daano kosanggapo kotataapono: komeeng taalikon doi lembet, komeeng taalikon doi lalom, komeeng taalikon tolopot tukon komeeng taalikon doi talise. Doi sasamba dotataaponoo tinampatkanggon komeeng ko Lewi miano mo teali padagai kapalano.

²⁵Yanila namotolutusan dungol doi kampung-kampung, tomboniiyo yanila pai-paisoboli — doi meeng kominggu lalomo idan luunggon nabadagai.

²⁶Bai dopadagaidoo kapalano mosangkap tataap balimang. Yanilamo komo tanggung-jawape tukon moulusiyo sasaibino koruangan doi TEMENENO Na Bonua tukon lolonggu-lolonggu mo inabos idoo.

²⁷Yanila dungol loolani ko TEMENENO Na Bonua, sabab yanila sio nadagaiyo dobonuadoo tukon bukayo kotataapon-tataapon babasal sasamba kododowasoono.

²⁸Kosoobos ko Lewi miano bailon ulusiyo kopakakas-pakakas tuuk bakaledaan. Yanilamo komo aite doi tempo nakinaluaran tukon doi tempo nainabalinggonan.

²⁹Kosobos koidan kololonggu-lolonggu kaledaan tukon tarigu, anggur, zaitun lisisono, kamangian tukon lamba-lamba.

³⁰Bai komo ulusiyo moposombulikene dolamba-lambadoo doiyamo imam-imam.

³¹Komo ulusiyo komakubaiyan sosubakon moilalas doiyamo meeng ko Lewi miano kosambuno Matica, Salum napau langgongo luwedoi Korah pulino.

³²Komian-mian moluwedoi Kehat pulino ulusiyo kosadiaano koroti mokinaan tuuk TEMENENO samba kooloyo Tadean.

³³Kosoobos ko Lewi miano bailon balimang teali panani doi TEMENENO Na Bonua. Konapai kaluargaa kapa-kapalano dungol doi bubula kogedung doi TEMENENO Na Bonua. Yanila aki nabinee limang sabab yanila batugas oloyo tukon popook.

³⁴Komian-mian mobinantiloo doiyamo Lewi nakaluargaa kapa-kapalano mololoi napo katurunan. Yanila doiyamo katua-katua modungol doi Yerusalem.

³⁵Yeiel kekendenge kokota Gibeon, maka dungol idoo. Konaboloki kosambuno Maakha,

³⁶tukon konapau malaneno langgongo kosambuno Abdon; kobailonggon kosambuno Zur, Kis, Baal, Ner, Nadab,

³⁷Gedor, Ahyo, Zakaria tukon Miklot

³⁸Simea tamano. Konapai katurunan dungol doi Yerusalem polaing kokaluargaa-kaluargaa bailon mosolipuan tukon yanila.

³⁹Tomundo Saul tamano kosambuno Kis tukon konatauwa kosambuno Ner. Saul daano konapau malaneno: Yonatan, Malkisua, Abinadab tukon Esybaal.

⁴⁰Yonatan daano konapau malaneno kosambuno Meribaal, Mikha tamano.

⁴¹Mikha daano 4 konapau malaneno: Pitom, Melekh, Tahrea tukon Ahas.

⁴²Ahas napau kosambuno Yoada modaano ko 3 konapau malaneno: Alemet, Asmawet tukon Zimri. Mololoi Zimri nakaturunan doiyamo Moza,

⁴³Bina, Rafa, Elasa tukon Azel.

⁴⁴Azel daano ko 6 konapau malaneno; Azrikam, Bokhru, Ismael, Searya, Obaja tukon Hanan.