Read Banggai 2 TUNDUNAN 1 Bible Online

2 TUNDUNAN 1 - Banggai bible

2 TUNDUNAN 1

¹Salomo Tomundo Daud namalane lapamo teali tomundo momonggol kona kodudukan doi batomuan Israel lalomo, TEMENENO Mian Bisa balakaatio yana tukon tealikene yana balakuasa tuuno.

²Saibino kapala pasukan 1.000 tukon pasukan 100, saibino komo taanio kosambu, tukon saibino kokapala kalualga Israel Tomundo Salomo mamparetahkene,

³tuuk taus tukon yana doi tampat bakaledaan doi Gibeon. Yanila imbali, sabab idoomo kona talaatan ko TEMENENO Na Sandung Musa TEMENENO naata komo kabaiyo doi tempodoo doi padang bone. (

⁴ Bai ko TEMENENO na Peti Perjanjian daano doi Yerusalem doi Sandung lalomo Tomundo Daud mopaase tuuk doi Petidoo salataa yana biele luwedoi Kiryat-Yearim.)

⁵ Balaban tambaga Bezaleel Uri napau mo kabayo, Hur natumbu, koidan talaat doi Gibeon TEMENENO Na Sandung salaano. Tomundo Salomo tukon sasaibino korayat bakaledaan doi TEMENENO.

⁶Doi Sandungoo salano tomundo mososubakon doi balabaan tambaga bunggono 1000 koiyayon salaku sosubakon mosinua tuuk TEMENENO.

⁷Popookoo Mian Bisa okitakene kobutongo doi Salomo tukon bantile, “Salomo, makabimo oila komuinias, naikon kubeekene doi komuyu!”

⁸Salomo timbiliyo, “Ode Mian Bisa, ikoo lapamo Okitakene baikon ikoo seange tuuno kotamanggu Daud, tukon ikoo lapamo bingkate yaku teali tomundo soboliyo yana.

⁹ Diabudodoo, ode TEMENENO Mian Bisa, biliisi Ikoo Mutapatiyo komu perjanjian doi tamanggu. Ikoo lapamo bingkate teali tomundo tuuk doi bangsa babasal nia moaki natangait konakadaang.

¹⁰Tobikon doiya kalumoola beekenemo doi yaku kopandoiyan tukon montoiyan yaku mopalaluwo tuuk yanila nakatua. Kalu aki nabunodoiya, bulando konatealian yaku moola maparentah Muumat mobabasal nia?”

¹¹Mian Bisa timbilio doi Salomo, “Mukakabidoo mondok. Ikoo aki mumakabi kasaan kai buat kai mutotingonian kai mumusuh-musuh namatean kai umur namoloas tuuk butomu susumu, baino pandoiyan tukon motoian tuuk parentayo Daku umat mokuasaikene doi komuyu.

¹²Tobikon doiya kopandoian tukon montoiyan naikon kubeekene doi komuyu. Babailonggonoo yaku naikon tealikene ikoo lobian totingonii luwedoi tomundo doi Yayakai koidan mau doilolukoo maukai doi tempo naikon molubat,”

¹³Doibundu Salomo tinggalemo kotampat bakaledaan doi Gibeon indaamo konatalaatan ko TEMENENO Na Sandung, maka naabali doi Yerusalem. Luwe idoo yana jalanggene kona bapamarentaan doi Israel.

¹⁴ Yana osukupio kona angkatan polobosi tukon 1.400 kereta polobosi tukon 12.000 adalan polobosi. Kosembeleng yana tampatkanggene doi Yerusalem, tukon labino doi kota-kota bailon.

¹⁵ Doi tempo Salomo nabapamarentaan, mosoni tukon suasa bunokai barang mobiasa doi Yerusalem, pokakana buno batu; tukon kayung cemara Libanon badang tuuno buno kayung ara biasa.

¹⁶ Mololoi padagang-padagang motombonio kotomundo, linubaton koadalan luwedoi Mesir tukon Kewe,

¹⁷tukon kereta-kereta polobosi linubaton luwedoi Mesir, doibundu kinilim koidan doi tomundo-tomundo Het tukon tomundo-tomundo Siria tukon olino (anggano) 150 doi suasa tuuk meeng koadalan tukon leoo doi suasa tuuk meeng kokereta polobosian.