Read Banggai 2 TUNDUNAN 10 Bible Online

2 TUNDUNAN 10 - Banggai bible

2 TUNDUNAN 10

¹Rehabeam taus doi Sikhem sabab saibino korayat Israel taikon doi lembet lapamo pototongi indaa tuuk lantike yana teali tomundo.

²Doi tempo doo Yerobeam Nabat napau daanon doi Mesir sabab dampasene kobutongo luwedoi Tomundo Salomo. Salataa yana molongol Rehabeam kaliangano, yana abali doi Israel.

³Rakyat taikon doi lembet undange Yerobeam, maka yanila polaing yana taus mangadap Rehabeam, yanila bantile,

⁴“Salomo Tomundo tamano lupamo beena tanggungan mo babalat doi kami. Kalu kai tomundo mimilanggenemo komai tanggungan tukon kurongiiyo komai sakisawan, ikami naikon taluuk doi Tomundo.”

⁵Rehabeam timbiliyo, “Yaku sio kubapikil looluk. Tolu ko oloyo koidan polubato.” Maka domianoo mobadaang mulemo.

⁶Maka Rehabeam mangkabi otunggul doi mian momotua-motuamo motealimo pongotunggul Salomo Rehabeam tamano, “Bulandomo naikon daku potimbili domianoo mobadang?” Rehabeam masadai, “Oila kopo otinau?”

⁷Yanila timbilio, “Kalu Tomundo yase kabaiyo komondok doi narayat, tukon yanila noano sanang, beena potimbili momondok doi yanila naikon setia doi Tomundo sidutu-posidutukon.”

⁸Bai domianoo momotu-motuamo Rehabeam aki napalatikanggene. Kobaliko, yana taus doi mian daango mongala mo puluwekon tukon yana tukon modiabudodoo tombonio yana.

⁹Doi yanila yana masadai, “Oila kopo otinau motuuk doi yaku sulano kumoola jawabpe korayat timbiliyo nanakabi sulano konapo tanggungan namoola yaku mbengiyo?”

¹⁰Yanila timbilio, “Bunomonia konakanan Tomundo bantile doi yanila, ‘Mau nabulandomo daku lematan, yaku daano molobiyoniiyo kotamanggu nabukuanan.

¹¹Tamanggu beenggu baban mobabalat doi komiu, bai yaku naikon beena molobian babalat koidan. Yana umbase ikomiu tukon cambuk, bai yaku naikon bobokikene ikomiu tukon cambuk moano konaduli besi!’ ”

¹²Tolu kooloyo doibundu Yerobeam tukon saibino domianoo abalimo mangadap Tomundo Rehabeam, buno molapamo yana mampalenkene.

¹³Aki napokonoi tukon domianoo momotu-motua naotinau, korayat molubat doi yana doo tolongo bontiliyo tukon bantilan mokasar.

¹⁴Pokonoi tukon otinau mian daango mongula, yana bantile, “Tamanggu beena doi komiu beban mo babalat, bai yaku naikon beena doi komuyu tanggungan molobian kona babalat koidan. Yana bobokio tukon cambok, bai yaku naikon umbase ikomiu tukon cambok moano kona besi!”

¹⁵Korayat nakakabi aki napinalatikanggon. Bai doiya bisa TEMENENO Mian Bisa namongiasan. Oila ko TEMENENO nabinantil lolo doi Nabi Ahia luwedoi Silo tentang Yerobeam Nebat napau sio nateali.

¹⁶ Salataa rayat Israel kitayo baikon tomundo aki naiyase mondongoli yanila, yanila nggeleamon, “Mau naaki nda popusinggon tukon Daud tukon nakaturunan! Yanila akiyoon naidan namokubai oioila tuuk doi kita. Israel miano pomaimo nda mule! Sodiikene Rehabeamoo nauluse kobutongo susuungo!” Maka mulemokai ko Israel miano,

¹⁷tukon Rehabeam teali tomundo tolongo doi Yehuda nalipu.

¹⁸Maukai nabuno doiya Tomundo Rehabeam daanokai mosumboliiyo, meeng komian mokapalaiyo kobalimangan moakiyo kotambono, sulano namanangkanggene korayat. Bai yanila sakule yana tukon batu sampe mate. Rehabeam susuungo moola lolos tukon mosoisobit lakit doi nakereta, maka dampasene kobutongo doi Yerusalem.

¹⁹Tambuun doi tempodoo korayat taalikon doi lembet ko Israel nabatomundoan nggimoliiyo kotomundo-tomundo Daud nakaturunan.