Read Banggai 2 TUNDUNAN 11 Bible Online

2 TUNDUNAN 11 - Banggai bible

2 TUNDUNAN 11

¹Salataa Tomundo Rehabeam polong doi Yerusalem, yana pototongikene ko 180.000 konasuludadu mo monondok luwedoi Yehuda benseno tukon Benyamin sulano nalobosiyo ko Israel miano tukon kindendeke kona kakuasaan doi bense-benseno taalikon doi lembet ko Israel.

²Bai ko TEMENENO sumboliiyo Nabi Semaya,

³mopelenggene nateteba nia doi Rehabeam tukon doi sasaibino komian doi Yehuda benseno lalomo tukon Benyamin.

⁴“Inaimokai molobosiyo koutus-utusomu Israel miano. Mulemo! Oila komo lapamo teali daanoon kumongiasan.” Maka yanila sasaibino tulutiyo ko TEMENENO naparenta tukon aki nateali taus lobosiyo Yerobeam.

⁵Rehabeam dungol doi Yerusalem tukon mosumbolii mian mobangune kobenteng-benteng tuuk kota-kota doi Yehudan tukon Benyamin nalipu, doiyamo:

⁶kota Betlehem, Etam, Tekoa,

⁷Bet-Zur, Sokho, Adulam,

⁸Gad, Mares, Zif,

⁹Adoraim, Lakhis, Azeka,

¹⁰Zora, Ayalon tukon Hebron.

¹¹Yana monggidagaikene tuuno dokota-kotadoo modaano kobentengo tukon tampatkanggene komeeng komian mokapalaiyo kopasukan doi sasamba dokotadoo. Suwe-suwele dokotadoo inobosi tukon palasadiaan kinaan zaitun lisisono tukon anggur,

¹²tombinde tukon pandong. Tukon buno doiya Yehuda tukon Benyamin nalipu tataap doi nakuasa lalomo.

¹³Koimam-imam tukon Lewi miano luwedoi sasaibino kolipu Israel taus pomeenggon tukon Rehabeam.

¹⁴Ko Lewidoo mian-miano tinggalemo konapai tampat dungolan tukon biyol doi Yehuda tukon Yerusalem, sabab Yerobeam tukon tomundo-tomundo mosoboliyo aki napataikene yanila mobalimang salaku TEMENENO naimam.

¹⁵ Yerobeam mongoduduk imam-imam susuungo sulano nameleleani doi tampat-tampat mososubaiyan pilogot tukon tuuk sosubaiyo kosetan-setan tukon saapi timbalango yana mokubaiyo susuungo.

¹⁶Komian-mian mo luwedoi sasaibino ko Israel benseno motutuu yase sosuba doi TEMENENO, Israel na Mian Bisa, biyol doi Yerusalem, lainge ko Israel mian-miano sulano namoola mososubakon sosubakon doi TEMENENO, tumbunoila na Mian Bisa sinosubai.

¹⁷Tukon bunodoiya ko Yehuda nabatomundoan teali moonggol tuuno. Tolu kotaun konakalumbit yanila dukunge Rehabeam Salomo namalanedoo nabapamarentaan, tukon tubo pokakana doi Tomundo Daud tukon Tomundo Salomo nalounu basambuan.

¹⁸Rehabeam osowaan tukon Mahalat; Mahalat tamano doiyamo Yerimot Daud namalane, tukon kotinano doiyamo Abihail Eliab napau, Isai natumbu.

¹⁹Yanila daano konapau malaneno tolu: Yeus, Semarya tukon Zaham.

²⁰Lapadoiya Rehabeam osowaan tukon Maakha Absalom napau. Yana malaat sangkap konapau malaneno: Abia, Atai, Ziza tukon Selomit.

²¹Rehabeam daano ko 18 konaboloki tukon 60 konaboloki piala, 28 konapau mala-malaneno tukon 60 konapau boineno. Luwedoi sasaibino konaboloki tukon naboloki pialadoo, konasineang tuuno doiyamo Maakha.

²²Tobikon doiya Abia Maaka napau yana seange tuuno lobiyoniiyo konaseangano luwedoi sasaibino konapau bailon, tobikon Abiamo koidan kona pinilih sulano nasoboliyo yana teali tomundo.

²³Tukon napandoiyan Rehabeam beena limang-limang doi namala-malane tukon tampatkanggene yanila doi kota-kota mo daano kobentengo doi posaapon kolipu Yehuda tukon Benyamin. Yana beena yanila kinaan molobi-lobian, tukon koidan sadiayo badaang koboloki tuuk yanila.