Read Banggai 2 TUNDUNAN 12 Bible Online

2 TUNDUNAN 12 - Banggai bible

2 TUNDUNAN 12

¹Salalapa Rehabeam salaku tomundo moonggolo kona batomundoan, yana tukon sasaibino konarayat Israel akimo natulutiyo ko TEMENENO nahukum,

²tukon akimo nasetia doiyana. Tobikon doiya ko TEMENENO hukume yanila. Doi taun kolimano Rehabeam nabasambuan, Sisak tomundo Mesir lobosiyo ko Yerusalem

³tukon 1.200 kokereta polobosi, 60.000 kosuludadu mo lolo adalan, tukon meeng kotambuno kosuludadu mo aki natangait kona kadaang, tongusokon ko Libia napasukan, Suki tukon Sudan.

⁴Yana lambase kokota-kota modaano kobentengo doi Yehuda maju polong Yerusalem.

⁵Doi tempodoo Tomundo Rehabeam tukon sasaibino ko Yehuda katuano lapamo pototongi doi Yerusalem sabab dampasene kobutongo luwedoi Sisak. Nabi Semaya lubat doi yanila tukon bantile, “Bunonaiya ko TEMENENO nabantilen, ‘Komuyu tinggalemo Yaku, jadi diabudodoo yakukai tinggalemo komuyu tukon Sisak kuasaiyomo komuyu.’ ”

⁶Tomundo tukon sasaibino kokatua akuiyo baikon yanila baladosamo. Yanila bantile, “Oila ko TEMENENO nalinakukon doiya adil.”

⁷Salataa ko TEMENENO kitayo yanila molapamo mangakukene kobutongo, Yana basilingan koidan doi Semaya, konabantilano, “Sabab yanila akuiyo konapai lalim, maka Yaku aki naikon Kusilakaiyo yanila. Yaku naikon mosobit oluputene yanila; ko Yerusalem aki naikon namanas. Mau nabuno doiya, Sisak

⁸naikon kuasaiyo yanila sulano napai toiyo konaposasalaan antara maangga doiya-Ku tukon maangga doi mokuasaiyo kodunia.”

⁹ Maka lubato Tomundo Sisak molobosiyo ko Yerusalem tukon lambase kolangge-langge modaano koanggano motangabos doi TEMENENO Na Bonua tukon doi kamali babasal, tukon koidan tombide-tombide mosoni Tomundo Salomo mo kubaiyo.

¹⁰Salaku posobolino Rehabeam mokubai tombidetambaga, tukon salakanggene doi sasaibino kosuludadu kapalano mo dagaiyo kokamali tataapono mobabasal.

¹¹Sambaluunggon Tomundo nataus doi TEMENENO Na Bonua, sasaibino kopadagai makanggi tombide-tombidedoo, doibundu yana abalinggene doi kombiang badagaiyan.

¹²Sabab tomundo totulaiyo kobutongo doi TEMENENO salaano, tukon koidan sabab daano kolangge-langge monondok doi Yehuda maka mbeengo ko TEMENENO nanggimoliiyano doi Rehabeam tukon akimo nasilakaiyo yana.

¹³Rehabeam maparenta doi Yerusalem tukon nakuasa pololokon babasal. Yana kona umur 41 kotaun salataa natealian tomundo, tukon yana maparenta 17 kotaun konakalumbit doi Yerusalem, kota moposaapon luwedoi posaapon ko Israel TEMENENO lilike tuuk moteali tampat kaledaan doiyana. Rehabeam tinano doiyamo Naama luwedoi lipu Amon.

¹⁴Rehabeam kubaiyo kolokis sabab akimo nakakaate molakukene ko TEMENENO namongiasan.

¹⁵Rehabeam salitano kaliangano luwedoi tumbe polong doibundu kona katurunan tinulis doi buku lalomo Naluwean Nabi Semaya tukon doi buku lalomo Naluwean Nabi Ido. Antara Rehabeam tukon Yerobeam sidutu kai teali kopolobosian.

¹⁶Rehabeam mate tukon kinibul doi tomundo-tomundo nakinibulan doi Daud Na Kota. Konamalane Abia teali tomundo mosoboliyo yana.