Read Banggai 2 TUNDUNAN 15 Bible Online

2 TUNDUNAN 15 - Banggai bible

2 TUNDUNAN 15

¹Ko TEMENENO Naroh kuasaiyomo Nabi Azariya Obed napau,

²tobikon yana taus pososuung Tomundo Asa, tukon bantile, “He Tomundo Asa, tukon sasaibino komo dungoliyo ko Yehuda tukon Benyamin! Ko TEMENENO loolani doi komuyu kalu komuyu loolani doiyana. Kalu komuyu mangkabi otunggul doi TEMENENO, yana naikon beekenemo. Bai kalu komuyu aki popusinggene iyana, yanakai aki napusinggene komuyu.

³Malumbit tuuno ko Israel naakiyan namaangga doi Mian Bisa, Akiyo kohukum-hukum mosio nalinoingi, tukon akiyo koimam-imam mootunggule yanila.

⁴Bai salataa yanila doi susah lalomo, yanila makabi tulung doi TEMENENO, Israel na Mian Bisa, yanila mangkabi naotunggul tukon Yana beekene.

⁵Doi tempodoo akiyo komian momoola taus tukon monondok, sabab sasamba kolipu daano konggabutan mobabasal.

⁶Kobangsa meeng lailainggene kobangsa bailon, tukon kokota meeng lailainggene kokota bailon, sabab ko Mian Bisa lubatene konggambutan mo babasal doi yanila.

⁷Bai komuyu sio posabar tukon barani. Komu usaha naikon daano kohasilo.”

⁸Salataa Asa lengele konabantilan Obed napaudoo, lubato konasamangat. Yana dedeenggene sasaibino kopilogot doi lipu Yehuda tukon Benyamin, tukon doi kota-kota molapamo linunggui doi Efraim bunggulo, maka yana kindendeke ko TEMENENO nabalabaan motalaat doi TEMENENO Na Bonua basaleano.

⁹Badaang ko Efraim miano, Manasye, tukon Simeon mopototongi tukon Asa tukon dungol doi nalipu batomundoan, sabab yanila kitayo baikon ko TEMENENO tulungiyo yana. Asa sumboliiyo sasaibino domianoo napolaing tukon Yehuda tukon Benyamin miano,

¹⁰pototongi doi Yerusalem. Maka yanila pototongimo doi bituwon kotoluno taun kosongulono lima lalomo Asa namaparentaan.

¹¹Doi oloyodoo yanila mososubakon doi TEMENENO 700 kosapi, tukon 7.000 kodomba, yanila molambase babayo mule luwedoi polobosian.

¹²Yanila paladandi doi TEMENENO baikon tukon sasaibino konoano tukon yanila butongo naikon tubo loloiyo ko TEMENENO namongiasan, tumbunoila na Mian Bisa.

¹³Indeemokai komiano, motua kai mongula, mala-malane kai boine, mo aki natubo mololoi TEMENENO namongiasan tantu inukum mate.

¹⁴Tukon lalo mobabasal yanila batotopi doi TEMENENO baikon yanila naikon taaniyo dopaladandianoo. Doibundu yanila nggele-nggeleamon tukon puuke kotorompet.

¹⁵Sasaibino ko Yehuda miano sanaang sabab yanila lapamo bantile dototopidoo tukon tootubo konoano. Yanila sanaang mokaleda doi TEMENENO, tukon do TEMENENO doo sanaang motalimayo yanila. Yana beekene doi yanila kokaamanan doi napai lipu.

¹⁶Lapadoiya Tomundo Asa pusake konambuumbu Maakha, luwedoi nakaduduka salaku Ibu Suri sabab yana lapamo kubaiyo kobapilogotan timbalango mokulokis tuuk Asyera, pilogot boine mobabayo komolumbangan. Asa lubange tukon manasemo dotimbalangoo maka yana suayo doi Kidron Pepelako.

¹⁷Maukai Asa naaki namanase sasaibino kotampat sosubaan doi pilogot doi lipudoo, bai yana tataap setia doi TEMENENO sampe yana mate.

¹⁸Sasaibino komosoni tukon suasa tukon barang-barang bailon langge yanila molambase doi polobosian tamano koona tukon koona susuungo inabos doi TEMENENO Na Bonua sulano nateali TEMENENO koona.

¹⁹Polong doi taun kotolu kolonono lima Asa namaparentaan akimo koidan nateali kopolobosian doilipudoo.