Read Banggai 2 TUNDUNAN 16 Bible Online

2 TUNDUNAN 16 - Banggai bible

2 TUNDUNAN 16

¹Tomundo Asa maparenta doi taun tolu kolono noom doi Yehuda, Baesa tomundo Israel lobosiyo ko Yehuda tukon keenggele kokota Roma tuuk dimbele kololoon sumbotan tukon usokan doi Yehuda.

²Maka Tomundo Asa mangala mosoni tukon suasa luwedoi mouluse sasaibino kolobo doi TEMENENO Na Bonua tukon doi tomundo nakamali, maka kapatuwo doi Damsyik doi Benhadad tomundo Siria tukon teteba,

³“Maimo nda keenggele konda posobatan nabuno nda orang tua molapamo lakukene. Polaing naiya yaku kapatuwo komosoni tukon suasa salaku palaseeng, tukon tobiyo Tuan naputuse kopotoikonan tukon Baesa tomundo Israel, sulano yana naabalinggene konapasukan luwedoi kulipu.”

⁴Benhadad satujuiyo tukon dopabaasidoo maka nasumboliiyo konasuludadu kapalano polaing yanila napasukan lobosiyo kokota-kota Israel. Yanila kalayo Iyon, Dan, Abel-Beet-Maakha tukon sasaibino kokota-kota mangabosan ndemel doi Naftali.

⁵Salataa Tomundo Baesa lengele dolanggedoo yana tade mokeenggele ko Rama tukon tinggale dokotadoo.

⁶Maka Tomundo Asa parentayo komian badangoo luwedoi sasaibino ko Yehuda tuuk akute kobatu tukon kayung Baesa mopakeyo doi Rama tuuk mokeenggele dokotadoo. Dobahan-bahanoo Asa pakeyo sulano nakeenggele kokota Geba tukon Mizpa.

⁷Doi tempodoo Nabi Hanani lubat doi Tomundo Asa tukon bantile, “Sabab ikoo moini doi tomundo Siria, tukon bolikon doi TEMENENO mu Mian Bisa, maka akiyono komu todanan tuuk mulungguiyo ko Israel nasuludadu.

⁸Bolikonkai ko Sudan tukon Libia daanon kona suludadu polobosi mobabasal tukon badaang kokereta polobosi tukon suludadu molakit adalan? Maukai nabuno doiya ko TEMENENO beekene komanaangan doi komuyu luwedoi yanila, sabab ikoo balaanggene yana.

⁹Ko TEMENENO dagaiyo sasaibino kodunia tuuk mebee kakuatan doi mian-mianoo mosetia doiyana. Ikoo lapamo mokubai longas, sabab doiya tambuun diabudodoo ikoo sidutu naikon toupiyo kopolobosian.”

¹⁰Nabi Hanani nabantilanoo kubaiyo Asa nggimal tuuno tobikon yana usekene donabidoo doi talunggu lalomo. Doi tempodoo koidan Asa lailainggene kobubula komian luwedoi narayat.

¹¹Sasaibino komo teali doi Asa namaparentaan luwedoi tumbeno polong doi napupusan lapamo tinulis doi Tomundo-tomundo Yehuda tukon Israel Nabuku Tundun lalomo.

¹²Doi taun kosongulono sio Asa nabapamarentaan Asa kanakon panakit mosakisaa tuuno doi loolua koaino. Maukai nabuno doiya yana aki namounggolii TEMENENO natulungan, baikai doi dokter.

¹³Lua kotaun doibundu yana matemo.

¹⁴Kobajano binee bahan-bahan mokinubai luwedoi lamba-lamba tukon lobo mobaba-babangi, maka tinadino doi tomundo-tomundo nakinibulan doi Daud nakota. Tukon tuuk moodotiiyo yana korayat mangakait aung unggul mobabasal tuuno.