Read Banggai 2 TUNDUNAN 17 Bible Online

2 TUNDUNAN 17 - Banggai bible

2 TUNDUNAN 17

¹Yosafat teali tomundo Yehuda soboliyo kotamano Asa, tukon yana kokobukuanggene kobutongo tuuk molawane ko Israel.

²Yana tampatkanggene konasuludadu doi sasaibino kokota modaano konabenteng doi Yehuda, tukon doi tano kota tonggulungo doi Yehuda, tukon doi kota-kota molapamo tamano lambase doi Efraim nalipu.

³Ko TEMENENO balakaatiyo Yosafat sabab yana loloiyo kotamano nakokubai; yana aki nasosubaiyo kopilogot,

⁴baikai tongo bakaleda doi Mian Bisa. Yana taat doi Mian Bisa naparenta; tukon kona tuboan aki nabuno tomundo-tomundo Israel.

⁵Ko TEMENENO beena doi Yosafat basambuan mo moonggol salaku tomundo Yehuda. Sasaibino korayat beena palaseng-palaseng doiyana tukon yana tealimo kaasa tukon inodotii tuuno.

⁶Tukon namongiasan mo moonggol yana taatiyo ko TEMENENO naparenta tukon manase sasaibino kota mososubayan pilogot tukon Yehuda napilogot Asyera timba-timbalango.

⁷Doi taun kotoluno kona basambuan yana utuse kosambu-sambu mo tatandak tuuk otunggulikene ko TEMENENO nahukum-hukum doi kota-kota Yehuda. Yanila doiyamo: Benhail, Obaja, Zakharia, Netaneel tukon Mikha.

⁸Sio ko Lewi miano tukon lua koimam komo kotulayo yanila. Ko Lewi mian-miano doiyamo Semaya, Netanya, Zebaja, Asael, Semiramot, Yonatan, Adonia, Tobia tukon Tob-Adonia. Lua doimamoo doiyamo Elisama tukon Yoram.

⁹Tukon mababa TEMENENO Nabuku Hukum-hukum yanila taus doiyayaa doi sasaibino kota Yehuda tukon otunggule korayat indaa.

¹⁰Ko TEMENENO kubaiyo matakut sasaibino kobatomundoan doi Yehuda tuuk mopolobosi lawane Tomundo Yosafat.

¹¹Luwedoi Filistin miano yana matalima badaang kosuasa tukon palaseng-palaseng bailon, tukon luwedoi Arab miano yana matalima 7.700 kodomba tukon 7.700 kombembe.

¹²Bunomokai doiya Yosafat pololokon malumbit pololokon balakuasa. Doi posaapon ko Yehuda yana bangune kobenteng-benteng tukon kota-kota mangabosan ndemel.

¹³Yana atambune kondemel mobadaang doi kota-kotadoo. Yana tampatkanggene doi Yerusalem kosuludadu kapa-kapalano mobarani,

¹⁴suwe-suwele tukon nakasatuan mololoi mondopulian. Adna doiyamo kopuli-puli doi Yehuda napomeenggonan talengano. Yana katuaiyo ko 300.000 kosuludadu.

¹⁵Komian koluano doiyamo Yohanan; yana kapalaiyo ko 280.000 kosuludadu.

¹⁶Komian kotoluno doiyamo Amasia Zikri napau; yana kapalaiyo ko 200.000 kosuludadu. (Amasia doiyamo meeng komian moiyase maangga doi TEMENENO.)

¹⁷Kopuli-puli napomeenggonan doi Benyamin benseno kotalengano doiyamo Elyada, meeng komian mobarani berjuang. Yana katuaiyo ko 200.000 kosuludadu modaanomo kona pana tukon tombide.

¹⁸Komian koluano doi pomeenggonan nia lalomo doiyamo Yosabad; yana katuaiyo ko 180.000 kosuludadu molengkapo konapai senjata.

¹⁹Yanilamo komo bertugas doi Yerusalem. Bailonggonoo, tomundo tampatkanggene kona kasatuan-kasatuan bailon benteng-benteng doi Yehuda nalipu.