Read Banggai 2 TUNDUNAN 18 Bible Online

2 TUNDUNAN 18 - Banggai bible

2 TUNDUNAN 18

¹Salataa Yosafat tomundo Yehuda kaasamo tukon totoimo, yana osowaanggene komeeng komian kona anggota kaluargaa Ahab tukon tomundo Israel.

²Bubula kotaun doibundu Yosafat taus duutiyo Ahab doi kota Samaria. Tuuk moodotiiyo Yosafat tukon narombongan, Ahab mokubai lamean tukon sumboliiyo nametembel badaang kodomba tukon saapi. Doi tempodoo yana tobiyo Yosafat sulano nalobosiyo kokota Ramot doi Gilead.

³Yana masadai, “Kai ikoo yase motaus polaing yaku molobosiyo ko Ramot?” Yosafat timbiliyo, “Monondok, dakusuludadu naikon pototongimo tukon Tuan nasuludadu. Kita molobosi polaing-laing.

⁴Bai konamondokan kita masadaikene loluk doi TEMENENO.”

⁵Maka Ahab pototongikene uga-ugaat 400 konabi maka masadai doi yanila, “Kai moolamo kutaus molobosiyo ko Ramot kai aki?” Yanila timbiliyo, “Moolamo! Komian Bisa naikon salakanggene kotadoo doi tomundo.”

⁶Bai Yosafat masadai koidan, “Oilakai dimbaa akiyo konabi bailon momoola masadai doi TEMENENO tuuk kita?”

⁷Ahab timbiliyo, “Daanoon komeeng, Mikha Yimla napau. Bai yaku misikitene doiyana, sabab akiyoon naidan yana moramale komeeng komo monondok tuuk yaku; sidutu tongo moaki namondok.” Yosafat timbiliyo, “Ah, inai mobantile buno doiya!”

⁸Maka Ahab uange komeeng komian kopagawe kamali maka sumboliiyo yana mosoi-soibit taus lolobotiyo Mikha.

⁹Doi tempodoo Ahab tukon Yosafat, tukon napakean basambuan, osulang doi kadela batomundoan doi tampat baumbasanan gandum doi Samaria tataapono babasal salaano, daano sasaibino konabi lubat mangadap tukon pelenggene konapai ramalan.

¹⁰Daano komeeng komian luwedoi nabi-nabi doo, kosambuno Zedekia Kenaana napau, makabai tanduk-tanduk besi maka bantile doi Ahab, “Naiyamo ko TEMENENO nabinantil, ‘Tukon tanduk-tanduk mobuno naiya Tomundo naikon lobosiyo ko Siria tukon manasemo yanila.’ ”

¹¹Sasaibino konabi bailon satujuiomo tukon bantile, “Lobosiomo ko Ramot, Tomundo naikon manaang. Ko TEMENENO naikon beena kamanangan doi Tomundo.”

¹²Daanoon dobobitokonoo mololobotiyo Mikha, bantilo doi Mikha, “Sasaibino konabi bailon moramale tuuk tomundo nakamanangan. Boliisi Tama koidan naramale komo monondok buno yanila.”

¹³Bai Mikha timbiliyo, “Lolo doi TEMENENO motubo, yaku naikon tongo bantile oila ko TEMENENO nabinantil doiyaku!”

¹⁴Salataa lapa Mikha polong doi Tomundo Ahab salaano, tomundo masadai, “Kai moola yaku tukon tomundo Yosafat taus molobosiyo ko Ramot kai aki?” Mikha timbiliyo, “Lobosiomo! Tantu Tomundo naikon manaang. Ko TEMENENO naikon beena kamanangan doi Tomundo.”

¹⁵Ahab timbiliyo, “Kalu ikoo basilingan doiyaku tolongo lolo doi TEMENENO sambuno bantilemo komo bisa. Buula luunggon nasio kuingotiikonggon tentang dolanggedoo?”

¹⁶ Mikha balase, “Yaku kitayo ko Israel nasuludadu monggabuto doi bunggul-bunggul. Yanila buno domba moakiyo padagaino, tukon TEMENENO bantile tentang yanila, ‘Mian-mian niaila akiyo komo katuaiyo. Sodiiyomo napai mule tukon salamat.’ ”

¹⁷Maka Ahab bantile doi Yosafat, “Bisa dakubantilan, bolikon? Akiyoon naidan yana moramale komo monondok tuuk yaku! Sidutu tongo mo kulokis!”

¹⁸Mikha bantile koidan, “Diabudodoo ndongoliiyo oila ko TEMENENO nabinantil! Yaku kitayo ko TEMENENO moosulang doi nakadela batomundoan bunggono doi surgaa, tukon sasaibino komalaekat kokondong koolaniyo yana.

¹⁹Ko TEMENENO masadai, ‘Indee naikon komo oluuliyo Ahab sulano yana naiyase taus polobosi tukon mate doi Ramot doi Gilead?’ Domalaekat-malaekatoo napotimbili posasala.

²⁰Doibundu lubat komeeng koroh. Yana koolaniyo ko TEMENENO tukon bantile, ‘Yakumo naikon komo oluuliyo yana.’ ‘Bulaando kokubaiyano’ TEMENENO sadaiyo.

²¹Dorohdoo timbiliyo, ‘Yaku naikon taus tukon kabaiyo sasaibino Ahab Nanabi bakala-kala.’ TEMENENO bantile, ‘Monondok, lakukenemo doiya, ikoo naikon moola muoluuliyo yana!’ ”

²²Banggadudul Mikha bantile, “Nah naiyamo komo teali! Ko TEMENENO lapamo kabaiyo Tomundo nanabi-nabi bakala-kala doi Tomundo sabab ko TEMENENO lapamo tantukanggene tuuk lubatene kosilakaan doi Tomundo!”

²³Maka majumo Nabi Zedekia kolaniyo Mikha maka tapiyo koduduso tukon bantile, “Yaando kona tealian ko TEMENENO Naroh mootinggale yaku tukon basilingan doi komuyu?”

²⁴Mikha timbiliyo, “Sio mukitayo konabukti doi tempo muusokan doi meeng kokombiang tuuk mosapit!”

²⁵Tomundo Ahab naparenta, “Lakeyo yana! tukon babayo yana doi Amon, Kapala Daerah, tukon doi Tomundo Yoas.

²⁶Sumboliiyo yanila nausekene yana doi talunggu lalomo, tukon beena yana kaan tukon monginum sosik tolong polong yaku abali tukon salamat.”

²⁷Mikha bantile, “Kalu Tomundo abali tukon salamat, koalatino TEMENENO aki nabasilingan mololoi yaku. Sasaibino komo daano dimbaa teali sakisii.”

²⁸Doibundu Ahab tomundo Israel, tukon Yosafat tomundo Yehuda taus lobosiyo kokota Ramot doi Gilead.

²⁹Ahab bantile doi Yosafat, “Yaku naikon alatambo tukon malaing polobosi, bai komuyu tadukai popakeyo kopakean mubasambuan.” Bunomokai doiya tomundo Israel naalatamboan salataa taus polobosi.

³⁰Doi tempodoo sasaibino ko Siria napasukan talengano nakereta polobosi lapamo tomundo parentayo tolongo tomundo Israel kona linobosi.

³¹Jadi, salataa yanila kitayo Tomundo Yosafat, yanila sasaibino sangkayo yana doiyamo tomundo Israel. Tobikon doiya yanila lobosiyomo yana. Bai Yosafat nggeleamon, maka TEMENENO Mian Bisa tulungiyo yana tukon liasene doseranganoo doi tujuan bailon.

³²Salataa sasaibino ko Siria nakereta polobosi napasukan talengano sadariyo baikon doiya bolikon tomundo Israel, yanila tademo molobosiyo yana.

³³Sosinggot komeeng komian ko Siria nasuludadu osodiiyo konapana matano aki napakituuwo konasasaran motantu. Bai dopanadoo matano konoiyo Ahab tukon tadule kona kalambi polobosi taalikon doi napinotaamikonan. Ahab bantile doi mokamudio kona kereta, “Yaku kanamo! Abalinggene tukon babayomo yaku tobuat luwedoi polobosian!”

³⁴Bai sabab kopolobosian daano mohebat, Tomundo Ahab tataap kokondong tukon tinumbak doi nakereta lalomo sasalaane ko Siria nasuludadu. Doi tempo nasopokan kooloyo yana matemo.