Read Banggai 2 TUNDUNAN 2 Bible Online

2 TUNDUNAN 2 - Banggai bible

2 TUNDUNAN 2

¹Tomundo Salomo lapamo putusiyo sulano Nabangune ko TEMENENO Na Bonua, tukon meeng kokamali tuuk butongo.

²Tuuk doya yana maparentah 70.000 komian sulano napoangkate kobahan bangunan 80.000 komian tuuk amaase kobatu doi bungkukoo tukon 3.600 mandol tuuk awasio dolimangoo.

³Salomo kapatuwo bilita nia doi Hiram tomundo Tirus, “Tadukai Tuan kabayo kohubungan dagang tukon yaku buno tukon Daud tamanggu. Tuan lapamo bolukikene doiyana kayung cemara libanon tuuk bangunan kamali.

⁴Diabudodoo yaku yase mobangune komeeng kobonua kaleda moinalas tuuk odotiyano ko TEMENENO Mian Bisa. Doi bonuadoo yaku tukon kurayat naikon bakaleda doi Yana tukon mosua kamangian babangi, tukon mososubakon roti kinaan tuuk Yana secara tataap. Doibonua doo koidan ikami naikon mososubakon sosubakon mosinua samba kododoa tukon popook, samba kooloyo Tadean, oloyo Babasal Bituwon Sodo tukon olo-oloyo motangalas bailon tuuk pongodoti TEMENENO komai Mian Bisa. Sabab, Yana lapamo maparentakene sulano langgedoo Israel miano nakabai tuuk sidutu-posidutukon.

⁵Yaku yase sulano TEMENENO Na Bonua naikon kubangune bunokai bonua momonondok sabab komai Mian Bisa lobian monondok luwedoi ilah mau oilano koidan.

⁶ Bai konakanan akiyo komeeng komian momampuwe kekendenge kobonua tuuk Mian Bisa, sabab posaapon kodapaang babasal aki nasukup babasal tuuk teali natampat dungolan. Jadi, TEMENENO Na Bonua momoola ikoo kekendenge kalu tolongo tampat tuuk mosuan kamangian tuuk Mian Bisa!

⁷Tobikon doiya, tadukai Tuan namakapatu doi kami meeng komian mopandoi makabai ukilan tukon moola limange komosoni, suasa, tambaga, besi koidan pandoi makabai toik bilu, sasamelaang, tukon memela. Yana naikon balimang pokakana tukon sasaibino komolole doi Yehuda tukon doi Yerusalem molapamo Daud tamanggu lilike.

⁸Yaku toiyo baikon saibino kopatape kayung doi Tuan nalipu pandoi matape kayung, tobikon doiya tadukai Tuan kapatuwe doi yaku lupa-lupa kayung cendana tukon kayung cendana luwedoi Libanon. Yaku naikon sumboliiyo daku mian-mian tuuk bantuwe Tuan namian daango,

⁹Sulano napo masadaimo kayung mobadaang. Sabab TEMENENO Na Bonua naikon yaku bangune doo siokai nababasal tukon hebat.

¹⁰Tuuk mokinaan Tuan namian daangodoo naikon yaku kapatuwe doi Tuan lua kolupano kogandumo, suwe-suwele 2.000 ton anggur konadaang 400.000 koliter tukon zaitun lisosono 400.000 koliter.”

¹¹Salaku pabalaso doi Tomundo Salomo nasuratoo, Tomundo Hiram makapatu surat konabantilan bunonia, “Sabab TEMENENO seseange Konaumat, yana lapamo binggate Tuan teali tomundo doi yanila.

¹²Nggale ko TEMENENO Israel miano na Mian Bisa, mopasitakayo kotimbu tukon buta! Yana beena doi Daud meeng komalane mopandoi tuuno koidan talakana kona pikilan, tukon kona pangatahuan, diabudodoo daano balausala mokokondong meeng kobonua motuuk TEMENENO tukon meeng kokamali motuuk doi butongo.

¹³Polaing-laing naiya yaku makapatu doi Tuan meeng kotanaga ahli mopandoi tukon badaang konamotoiyan, kosambuno Huram.

¹⁴Kotinano luwedoi Dan bensemo, ko tamano Tirus mianno. Yana pandoi makabai barang-barang moluwe doi masoni, suasa, tambaga, besi, batu tukon kayung. Yana toiyo molimang toik manampal, same-samelaan, memela tukon koidan toik lenan. Saibino kolupano kolimang babotik moola nakabaiyo mololoi modeel oilamo komo kinabi. Mondok kai konatinugaskanggonan sulano nabalimang polaing-laing tukon saibino komomolole doi Tuan. Tukon mian badaang molapamo balimang tuuk Tomundo Daud tuan tamano.

¹⁵Ikami montili kapatu lua kolupano kogandum, anggur tukon zaitun lisasono Tuan janjikenedoo.

¹⁶Ikami naikon matape kayung cemara luwedoi Libanon bunggulo konakadaang Tuan napinalaluu, maka napiboikon teali rakit tukon yana anuse loloiyo kotobung polong doi Yope. Luwe indaa Tuan moolamo akute doi Yerusalem.”

¹⁷Tomundo Salomo monggitulisene doi saibino komian lubat modungol doi Israel, bunokai doi indannoo Tomundo Daud tamano naadakangganano. Talaat daano 153.600 komian lubat.

¹⁸Pitukolono kobailonggon luwedoi yanila binotokon tuuk akute kobahan-bahan bangunan, 80.000 tuuk bangamaat batu doi bunggulo, tukon 3.600 tuuk awasio tukon balatanggung jawab doi limangoo.