Read Banggai 2 TUNDUNAN 20 Bible Online

2 TUNDUNAN 20 - Banggai bible

2 TUNDUNAN 20

¹Bubula kotempo doibundu ko Moab nasuludadu tukon Amon, polaing-laing tukon yanila napomeenggonan Meunim nasuludadu, lobosiyo ko Yehuda.

²Maka lubato komian mobabayo nabilita nia doi Tomundo Yosafat, “Badaang tuuno ko Edom nasuludadu molubato luwedoi lipu sembeleng doi Tobun Mate sulano nalobosiyo Tomundo. Yanila lapamo lambase ko Hazezon-Tamar.” (Hazezon-Tamar doiyamo ko En-Gedi posombuino bailon.)

³Yosafat teali matakut maka yana sambeang makabi otunggul luwedoi TEMENENO. Doibundu yana maparentakene sulano sasaibino kona rayat nabapuasa.

⁴Luwedoi sasamba kokota doi Yehuda komian taus doi Yerusalem tuuk makabi tulung doi TEMENENO.

⁵Yanila polaing-laing tukon ko Yerusalem tumbuno pototongi doi TEMENENO Na Bonua basaleano moboolu. Tomundo Yosafat kokondong doi yanila salaano,

⁶maka sambeang kokobukuan, “Oh TEMENENO kotumbunggami na Mian Bisa! Ikoo Mian Bisa doi surgaa tukon moparentayo doi sasaibino kobangsa doi dunia. Ikoo komo balakuasa tukon bukuan; akiyokai komeeng komian mo moola lawane Ikoo.

⁷ Ikoomo komai Mian Bisa. Salataa Komu umat, Israel miano, lubat doi mulipu nia, Ikoo siikayo komian-mian mo doi tempodoo dungol dimbaa. Maka Ikoo beekene nalipu nia doi Abraham nakaturunan, Musobat, tuuk teali napai lipu sidutu-posidutukon.

⁸Yanila lapamo dungol dimbaa tukon mokokondong meeng kobonua tampat sosubaan doi-Koo. Yanila toiyo

⁹baikon kalu yanila malaat hukuman sabab yanila nalalim-lalim, tukon yanila kanakon polobosi, panakit mobadonggiti, kai malaalan, yanila moola lubat doi Ikoo tukon kokondong doi bonua kaledaan nia salaano. Yanila doi susaan lalomo, yanila moola sambeang doi Ikoo, tukon Ikoo naikon ndongoliiyo tukon tulungiyo yanila.

¹⁰ Diabudodoo ko bangsa Amon, Moab tukon Edom lobosiyo kami. Salataa komai mbumbu lubat luwedoi Mesir, Ikoo aki mupataikene yanila dungoliyo dobangsa-bangsadoo nalipu. Maka kotumbunggami loloiyo kololoon bailing tukon aki namanase kobangsa Amon, Moab tukon Edom.

¹¹Diabudodoo, buno naiya dobangsa-bangsadoo natindakan doi kami. Yanila yase siikayo kami luwedoi lipu Ikoo mo beekene doikami.

¹²Ikoomo komai Mian Bisa! Hukumemo yanila, sabab ikami nia akiyo komai daya mosasalaane kosuludadu mobadaangoo, moiyase lobosiyo kami. Ikami akimo mai toiyo oila komo sio mai kubaiyo, tobikon doiya kami lubat doikoo makabi tulung.”

¹³Daanoon mobuno doiya sasaibino Yehuda mala-malaneno polaing tukon nabolokiila tukon nalabuk-labuk kokondong doi TEMENENO Na Bonua.

¹⁴Doi mian badaang tanga-tanganodoo daano ko Lewi miano meeng kosambuno Yahaziel. Yana Zakharia napau luwedoi Asaf benseno doi Benaya nabaris keturunan lalomo, Yeiel, Matanya. Doi tempodoo Yahaziel TEMENENO Na Roh kuasaiyo,

¹⁵ tukon yana bantile, “Tomundo Mo Mulia tukon utus-utus sasaibino. Ko TEMENENO bantile baikon komuyu aki pomoola manasal kai matakut mosasalaane kosuludadu mobadaangoo. Sabab komo molobosi bolikon komuyu, bai Mian Bisa.

¹⁶Namodoa doi tempo napai libaan loloiyo kololoon motolibo doi Zis, lobosiyomo yanila: Komuyu naikon posasalaan tukon yanila doi pepelakon bunduno doi padang bone salaano loolani ko Yeruel.

¹⁷Komuyu akimo napalaluu molobosi doi polobosian nia lalomo. Potauso doi tampat molapamo tinantukon doi komuyu tukon totiiliyomo idoo. Komuyu naikon kitayo ko TEMENENO mobeekene komanangan doi komuyu. Eh Yehuda tumbuno tukon Yerusalem, inaimo mombombokon tukon matakut. Usokiyomokai dopolobosianoo, ko TEMENENO naikon tulungiyo komuyu!”

¹⁸Maka Tomundo Yosafat bapituulo. Sasaibino korayat polaing koidan tukon yana mobapituul sosubaiyo ko TEMENENO.

¹⁹Maka ko Lewi mianoila luwedoi Kehat benseno tukon Kora yanila kokondong, tukon laba nggaale ko TEMENENO, Israel na Mian Bisa.

²⁰Modoakon kooloyono dodowa soono, korayat tobuato tukon taus doi padang bone lolani ko Tekoa. Salataa yanila kabi naluwe, Yosafat beekene nateteba nia doi yanila, “Rayat Yehuda tukon Yerusalem! Maanggamo doi TEMENENO mu Mian Bisa, maka komuyu naikon moola taanggene. Potalimayomo kootunggul luwedoi munabi-nabi, maka komuyu naikon berhasil!”

²¹Salataa lapa mopopikili tukon rayat, tomundo sumboliiyo komian motoiyo manani napakeyo kona pakean seragam mo biasamo pinake doi upacara-upacara agama lalomo. Dopenyanyidoo sio nabaris tukon monondok doi barisan suludadu salaano maka namanyanyi, “Nggaale ko TEMENENO! Kona seang akiyo konapupusan!”

²²Doi tempo dopenyanyidoo natambuunan momanyanyi, ko TEMENENO kubaiyomo konggalanggabutan doi musuh nasuludadu tanga-tangano modaano momolobosi.

²³Ko Amon tukon Moab nasuludadu lobosiyo ko Edom nasuludadu tukon lopuwo tutuuno. Lapa doiya yanila abali polobosi meeng tukon bailon tukon momonas.

²⁴Salataa ko Yehuda nasuludadu polong doi bonua batotoolian doi padang bone tukon okiteese komusuh natampat, yanila kitayo komusuh bajan-bajano mopopisa-pisai doi buta. Akiyokai komeeng komian luwedoi musudoo nasuludadu komo daanoon motubo.

²⁵Maka Yosafat polaing tukon konasuludadu taus molambase komusuh nabarang-barang. Yanila pososuunggene badaang koiyayon piniala, kopalasadiaan, pakean, tukon barang-barang momaaling bailon. Sambuno lapa pototongikene dobarang-barangoo tolu kooloyo konakalumbit, daano badang kobarang-barang bailon, tobikon tapakisaa tininggal.

²⁶Doi oloyo kosanggapo yanila sasaibino pototongi doi Pepelako Banggaalan tukon nggaale ko TEMENENO sabab sasaibino kolobo molapamo nakubaiyo. Doiyamo kosababpo dopepelakonoo sinombuikon, “Banggaalan.”

²⁷Maka Yosafat katuaiyo sasaibino kopasukan mule doi Yerusalem tukon sanaang sabab ko TEMENENO lapamo kalayo konapai musuh.

²⁸Salataa polong doi kota, yanila baris doi TEMENENO Na Bonua inantokon tukon kasapi tukon torompet.

²⁹Sasaibino konegara bailon matakuto salataa lengele bulaando ko TEMENENO nakalaano ko Israel namusu-musu.

³⁰Doiyamo kosababpo Yosafat maparenta tukon monondok, tukon ko TEMENENO beekene doiyana kopaladamean doi posaapon kolipu.

³¹Yosafat natealian tomundo Yehuda konaumur 35 kotaun, tukon yana maparenta doi Yerusalem 25 kotaun konakalumbit. Kotinano doiyamo Azuba Silhi napau.

³²Buno tamano Asa, Yosafat lakukene komo monondok doi TEMENENO napokita.

³³Bai yana aki namanase kotampat-tampat mososubaiyan pilogot. Korayat koidan akiyoon natotubo konoano mobakaleda doi tumbunoila na Mian Bisa.

³⁴Kosalitano bailon tentang Yosafat, luwedoi natambuunan polong doi nabasambuan napupusan, tinulis doi Yehu Hanani napau salitano motalaat doi Tomundo-tomundo Israel Tunduno.

³⁵Doimeeng kotempo Yosafat tomundo Yehuda mokubai hubungan posobatan tukon Ahazia tomundo Israel, molakukene badaang kokulokisan.

³⁶Doi Ezion-Geber tokoluano yanila mokubai kapal-kapal tuuk talabut doi Tarsis.

³⁷Bai Nabi Eliezer Dadowa napau moluwedoi kota Maresa beena poingotii doi Yosafat, konabantilano, “Sabab Tomundo kubaiyo kohubungan posobatan tukon Ahazia, ko TEMENENO naikon akamanasemo Tomundo nalimang.” Maka manaso kokapal-kapal molapamo yana kubaiyo tobikon akimo namoola tinalabuton koidan.