Read Banggai 2 TUNDUNAN 21 Bible Online

2 TUNDUNAN 21 - Banggai bible

2 TUNDUNAN 21

¹Yosafat mate tukon kinibul doi tomundo-tomundo nakinibulan doi Daud nakota. Konamalane Yehoram teali tomundo mosoboliyo yana.

²Yehoram Yosafat namalane, tomundo Yehuda daano konoom koutuso malaneno: Azarya, Yehiel, Zakharia, Azariahu, Mikhail, tukon Sefaca.

³Yanila malaat badaang komosoni, suasa tukon barang-barang modaano koanggano bailon luwedoi tamanoila, tukon suwe-suwele binee koidan meeng kokota modaano kobentengo doi Yehuda. Bai sabab Yehoram yanamo komalane langgongo, Yosafat tantukanggenemo yana sulano nateali tomundo.

⁴Salataa Yehoram toiyo kona kadudukan salaku tomundo mokuato, yana monggiakatekene sasaibino koutus-utuso, tukon koidan bubula kosambu motatandak.

⁵Yehoram natealian tomundo konaumur 32 kotaun, tukon yana maparenta doi Yerusalem 8 kotaun konakalumbit.

⁶Yana loingiyo Tomundo Ahab tukon tomundo-tomundo Israel bailon nacara tuboan, sabab yana pokila tukon Ahab napau moluko meeng. Yana baladosa doi TEMENENO,

⁷ bai ko TEMENENO aki naiyase mosilakaiyo tomundo moluwedoi Daud nakaturunan sabab yana lapamo paladandi baikon Daud nakaturunan naikon tataap maparenta.

⁸ Doi tempo Yehoram namaparentaan, Edom nggabutemo ko Yehuda tukon mokubaimo batomundoan susuungo.

⁹Tobikon doiya Yehoram tukon sasaibino konatalenga tobuat tukon nakereta-kereta polobosi maka lobosiyo ko Edom. Ko Edom napasukan kepuunge yana, bai napopookan yanila lolos musuh nakepungan tukon dampasene kobutongo.

¹⁰Tambuuno doiya Edom akimo natunduk doi Yehuda. Doi tempodoo koidan kokota Libna nggimalo. Sasaibino doiya teali sabab Yehoram tinggalemo ko TEMENENO, tumbunoila na Mian Bisa sinosubai.

¹¹Yana koidan kekendenge kotampat-tampat mososubaiyan pilogot doi lipu Yehuda bunggulo, tobikon korayat Yehuda tukon Yerusalem baladosamo doi TEMENENO.

¹²Maka Yehoram malaat meeng kosulat Nabi Elia motulise salataa yana daano motubo. Bunonaiya dosuratoo nabantilano, “TEMENENO, Daud na Mian Bisa sinosubai, hukume Tomundo sabab Tomundo akimo naloingiyo Tomundo tamano tukon natauwa nakalakuan.

¹³Kobalino, Tomundo tubo buno Israel natomundo-tomundo, tobikon korayat Yehuda tukon Yerusalem akimo nasetia doi Mian Bisa. Tomundo napalabuatan buno Tomundo Ahab tukon poso-posobolino. Tomundo koidan akateyo tomundo utus-utuso, banggokai yanila lobian monondok luwedoi tomundo.

¹⁴Hukuman mobabalat moluwedoi TEMENENO naikon kanakon doi rayat, pau-pau tukon Tomundo nabolo-boloki, tukon manase sasaibino ko Tomundo nabuat.

¹⁵Tomundo susuungokai naikon mallas kokombongo liso mosamba kooloyo polokon masakit tuuno!”

¹⁶Doi tempodoo daano ko Filistin miano tukon Ahab miano modungol loolani ko Sudan miano nadungolan taalikon tobun. Ko TEMENENO derenge domianoila noano sulano nalobosiyo Yehoram.

¹⁷Yanila lobosiyo Yehuda, lambase kotomundo nakamali, maka babayo taus sasaibino Yehoram napau boloki salaku mian motinaan, alaasene namalane pioto Ahazia.

¹⁸Sambuno lapa sasaibino dokadadianoo, ko TEMENENO hukume Yehoram tukon panakit malas kokombongo liso moakimo natangalin.

¹⁹Adukon lua kotaun konakalumbit dopanakitoo pololokono babalat sampe doibundu yana sakisaamo tuuno tukon yana mate. Kona rayat aki namangakait aung babasal salaku paloosan momandaunggene buno yanila molakukene tuuk doi tumbunoila.

²⁰Akiyokai komeeng komian momanasekene konamatean. Yana kinibul doi Daud nokota, bai deikon doi tomundo-tomundo nakinibulan lalomo. Salataa teali tomundo, Yehoram konaumur 32 kotaun, tukon yana maparenta doi Yerusalem 8 kotaun konakalumbit.