Read Banggai 2 TUNDUNAN 23 Bible Online

2 TUNDUNAN 23 - Banggai bible

2 TUNDUNAN 23

¹Doi taun kopituno Imam Yoyada putusiyomo tuuk momokubai tindakan. Yana kubaiyo kopomeenggonan tukon lima kosuludadu kapalano, doiyamo Azarya Yeroham napau, Ismail Yohanan napau, Azarya Obed napau, Maaseya Adaya napau, tukon Elisafat Zikri napau.

²Yanila taus doi sasaibino kokota doi Yehuda, tukon pototongikene ko Lewi mia-miano tukon sasaibino kobenseno kapa-kapalano, maka babayo yanila doi Yerusalem.

³ Yanila pototongi doi TEMENENO Na Bonua, tukon mokubai paladandian tukon Yoas, tomundodoo namalane. Yoyada bantile doi yanila, “Naiyamo Tomundo Ahazia namalane! Yana diabudodoo sio nainosulang doi nakulusi batomundoan, sabab ko TEMENENO lapamo paladandi baikon Tomundo Daud nakaturunan naikon tataap maparenta.

⁴Naiyamo komo sio ndalakukene: Kalukai sasaibino koimam tukon Lewi miano lapamo balimang doi oloyo tadean, yanila aki namoola mule. Tolu koobos luwedoi yanila sio namalaing mobatotooli tataapon-tataapon mobabasal doi TEMENENO Na Bonua,

⁵tolu koobos koidan doi tomundo nakamali tukon kolabino doi Tataapon Mobabasal Pundasino. Sasaibino korayat sio napototongi doi TEMENENO Na Bonua basaleano.

⁶Akiyo komeeng komian momoola usok doi TEMENENO Na Bonua tolongokai imam sasaibino tukon Lewi miano modaanoon mobalimang. Yanila moola usok sabab yanila lapamo inalaas tuuk TEMENENO. Komian-mian bailon sio naloingiyo doi TEMENENO napalatulan tukon dungol doi tonggulung.

⁷Ko Lewi mianoila sio nakokondong boilingiyo kotomundo tukon kibute konasabel, tukon kawale yana doiyayaando kona tausan. Indee komo kakaate mousokiyo ko TEMENENO Na Bonua sio nainakate.”

⁸Yoyada napaletadoo ko Lewi mian-miano tukon Yehuda miano laksanakanggene. Komian-mian mo aki nabalimang doi oloyo tadean aki napinataikon mule. Jadi sasaibino kosuludadu kapalano malaat pongotunggul mau mian-mian moakimo nabalimang maukai mosodo lubat tuuk mobalimang.

⁹Doi sasaibino kosuludadu kapalanodoo Yoyada ebese kopandong tukon tombide Tomundo Daud koona mo inabos doi TEMENENO Na Bonua.

¹⁰Yoyada koidan tampatkanggene komian-mian tukon kibute konasabel doi potikunggon ko TEMENENO Na Bonua salaano sulano nalindungiyo kotomundo.

¹¹Lapa doiya Yoyada babayo Yoas tobuat, maka abese kosonggo batomundoan doi oluno, tukon salakanggene doiyana ko Mian Bisa Nabuku Hukum. Bunomokai doiya Yoas nainodudukan teali tomundo. Doibundu imam Yoyada tukon napau-pau kundange kolisison bakolobokiyan pongoduduko doi Yoas, maka sasaibino komian nggeleamon, “Tubomo kotomundo!”

¹²Atalya lengele komian mokokuweis ngganggaale kotomundo. Yana mosoi-soibit taus doi TEMENENO Na Bonua doi mianoo daango napototongian.

¹³Yana kitayo kotomundo mo booludoo kokondong doi tataapon usokan doi TEMENENO Na Bonua, doi natampat linantikan, kosuludadu kapa-kapalano tukon mopuuke kotorompet boilingiyo yana. Sasaibino korayat kokuweis tedes maka puuke kotorompet, tukon sasaibino kopomaen musiik doi TEMENENO Na Bonua lamekene dolameanoo tukon napai alat-alat musiik. Tukon matakut Atalya bendinge konapakean tukon wookon, “Poloilokis! Poloilokis!”

¹⁴Yoyada aki napataikene Atalya nainakate doi naloolanian ko TEMENENO Na Bonua, jadi yana bantil doi sasaibino kosuludadu kapalano, “Babayomo yana tobuat loloiyo kopadagai nabarisan, tukon akateyo indeemo komiano komo kakaate mosalamatene yana.”

¹⁵Yanila lakoyo yana, maka babayo doi kamali. Yana inakate indaa doi Tataapon Babasal Adalan.

¹⁶Imam Yoyada oluliyo Tomundo Yoas tukon kona rayat polaing-laing tukon yana mokubai paladandian baikon yanila naikon teali TEMENENO Naumat.

¹⁷Sambuno lapa yanila sasaibino molobosi tukon lubange kobonua Baal, Balabaan tukon timbalang-timbalang yanila manasemo, tukon Matan, Imam Baal inakate doi balabaan-balabaanoo salaano.

¹⁸Maka Yoyada beena limang sasaibino koimam tukon Lewi miano tuuk uluse kolimang doi TEMENENO Na Bonua mololoi limang obosano molapamo Tomundo Daud tantukanggene. Yanila sio namososubakon sosubakon mosinua doi TEMENENO — pokokonoi tukon Musa nahukum-hukum — tukon lamean tukon nanian-nanian buno mo lapamo Daud ature.

¹⁹Doi TEMENENO Na Bonua tataapon-tataapono babasal, Yoyada natampatkangganano kopadagai tuuk dagaiyo sulano komian moaki namoola nasosubaiyo ko TEMENENO inai nausok.

²⁰Sasaibino kosuludadu kapalano, sasaibino kopau-paulakai, sasaibino kosambu-sambu, tukon sasaibino korayat lainge Yoyada mobarombongan taus doi Tomundo Yoas luwedoi TEMENENO Na Bonua taus doi kamali. Yanila usok luwedoi tataapon babasal tuuno maka tomundo osulang doi kursi batomundoan bunggono.

²¹Sasaibino korayat tedes, dokotadoo aman tukon Atalya lapamo inakate.