Read Banggai 2 TUNDUNAN 24 Bible Online

2 TUNDUNAN 24 - Banggai bible

2 TUNDUNAN 24

¹Yoas doi tempodoo yana teali tomundo doi Yehuda konaumur pitu kotaun, tukon yana maparenta doi Yerusalem 40 kotaun konakalumbit. Kotinano kosambuno Zibya luwedoi kota Bersyeba.

²Doi nadaanoan imam Yoyada motubo, Yoas lakukene kolangge-langge mo sanaanggene ko TEMENENO noano.

³Yoyada lilike kolua komian boine tuuk Yoas naboloki, tukon luwedoi yanila Yoas malaat pau-pau malaneno tukon moluko.

⁴Sambuno lapa maparenta bubula kotempo konakalumbit, Yoas putusiyo tuuk kindendeke ko TEMENENO.

⁵Sasaibino koimam tukon Lewi miano yana parentayo tuuk taus doi modungoliyo kokota-kota doi Yehuda tukon kombule kodoy luwedoi sasaibino korayat teali pokindoko TEMENENO Na Bonua sasamba kotaun. Yana sumboliiyo yanila namosobit lakukene dolimangoo, bai ko Lewi mianoila kakalumbit.

⁶ Tobikon doiya yana uange imam Yoyada, yanila napai katua, maka bantile, “Bolikonkai Musa TEMENENO napeleleani lapamo sumboliiyo korayat beale konalulu teali poongkosi TEMENENO Na Sandung? Diabudodoo, bulaando ko Lewi miano moaki Tama nadesaake sulano nakombule kolulu luwedoi rayat Yehuda tukon Yerusalem?” (

⁷Atalya napololaing-pololaing, boinedoo lokisoo, manasemo ko TEMENENO Na Bonua, tukon badaang komo luwedoi barang-barang moinalaas tuuk Mian Bisa lapamo yanila pakeyo tuuk sosubaiyo ko Baal.)

⁸Maka tomundo parentayo ko Lewi miano mokubai meeng kopeti bangabosan doy tukon abese doi TEMENENO Na Bonua tataapono babasal salaano.

⁹Posaapon ko Yerusalem tukon Yehuda binontiikon baikon sasaibino komian sio namababa lulu tuuk TEMENENO, pokakana Musa napinalentakon.

¹⁰Popitoikonoo sanaanggene korayat konoano tukon napai katua-katua. Rama-rame yanila mongusokon doy lulu doi petidoo lalomo.

¹¹Sasamba kooloyo dopetidoo Lewi mian-miano babayo doi tomundo napagawe sulano napinalesa. Kalukai dopetidoo moonomo, kodulutulis negara tukon Imam babasal nawakil kaluare kodoyno maka dopetidoo inabalinggon doi natampat inabosan tumbeno. Bunomokai doiya konapai lakukanano sasamba kooloyo, tukon badaang tuuno kodoy motokombul.

¹²Lapa doiya tomundo tukon Yoyada salakanggene dodoydoo doi mian-mian mokapalaiyo ko TEMENENO Na Bonua nakinindokan. Maka domian-mianoo matambo tukang batu, tukang kayu tukon tukang tambaga sulano nakubaiyo dolimangoo.

¹³Maka tambuuno dotukang-tukangoo mokindendeke ko TEMENENO Na Bonua. Yanila sasaibino balimang bunodoiya tobikon doibundu do Bonuadoo teali moonggol tukon monondok buno tumbeno.

¹⁴Sambuno lapa dolimangoo, komosoni tukon suasa labino sinalakanggon doi tomundo tukon Yoyada. Maka komosoni tukon dosuasadoo pinake tuuk mokubai pakakas-pakakas tuuk TEMENENO Na Bonua, buno: pakakas-pakakas mopinake doi upacara kaledaan, tuuk sosubakon mosinua, pinggan-pinggan tuuk kamangian, tukon mangko-mangko. Doi nadaanoan Imam Yoyada motubo, kososubakon mosinua tataap sinosubakon doi TEMENENO Na Bonua.

¹⁵Yoyada motuamo tuuno tukon salataa mate kona umur 130 kotaun.

¹⁶Yana kinibul doi tomundo-tomundo nakinibulan doi Daud Na Kota tuuk moodotiiyo konajasa-jasa doi Mian Bisa, doi TEMENENO Na Bonua tukon Israel miano.

¹⁷Sambuno lapa Yoyada mate ko Yehuda nakatua-katua oluliyo tukon pangaruiyo Yoas tobikon yana akimo koidan namangangga Yoyada naotunggul.

¹⁸Maka korayat akimo koidan nabakaleda doi TEMENENO Na Bonua, tumbunoila na Mian Bisa, bai sosubaiyomo kopilogot tukon pilogot Asyera timba-timbalango. Sabab donapai lalimoo mangaanikene ko TEMENENO nggimoliiyo ko Yehuda tukon Yerusalem.

¹⁹Ko TEMENENO utuse konanabi-nabi tuuk otinauwo yanila sulano naabali mangangga doi TEMENENO, bai korayat akimo naiyase momondongolii.

²⁰ Maka ko Mian Bisa Naroh kuasaiyomo Zakaria Imam Yoyada napau. Zakharia kokondong doi rayat salaano, maka bantile, “Ko TEMENENO Mian Bisa bantile, ‘Bulaando komuyu moakimo potaat doi kuparenta-parenta tukon silakaiyo kobutomu susuumu. Komuyu akimo popaduliyaku, maka yakudoo akimo kupaduliyo komuyu!’ ”

²¹Bai korayat pomeenggon motantange Zakharia, tukon Tomundo Yoas malaing doi poakoolanoo lalomo. Yana akimo naneneeke doi Yoyada, Zakharia tamano najasa-jasa tukon nakesetiaan. Luwedoi tomundo naparenta, Zakharia sinokuli batu sampe mate doi TEMENENO Na Bonua basaleano. Doi tempo nakabian mate, Zakharia nggeleamon, “Boliisi ko TEMENENO nakitayo nakokubai nia tukon yana nabalase!”

²³Doi taunoo koidan, doi napaisobolian kolounu, ko Siria nasuludadu lobosiyo ko Yehuda tukon Yerusalem. Yanila akateyo sasaibino kokatua tukon akute badaang kobarang-barang molinambas doi Damsyik.

²⁴Ko Siria nasuludadu tongo soisik konakadaang, bai ko TEMENENO sodiikene yanila nakalayo ko Yehuda nasuludadu molobioniiyo yanila konakadaang, sabab ko Yehuda miano aki napopusinggon ko TEMENENO tumbunoila na Mian Bisa. Tukon dokokubaidoo ko TEMENENO hukume Tomundo Yoas.

²⁵Yoas pakolon babasal. Sambuno lapa taus komusuh nasuludadu, lua kopagawe pomeenggon. Yanila akateyo yana doi na tampat mooloan salaku posobolino kona inakatean Imam Yoyada napau. Tomundo Yoas kinibul doi Daud nakota, bai aki nakinibul buno tomundo-tomundo. (

²⁶Komian-mian mopoakool molawane yana doiyamo Zabad Simeat napau boine Amon, tukon Yozabad Simrit napau boine Moab.)

²⁷Tentang Yoas napau-pau salitano, tentang ramalan-ramalan moaki namonondok doiyana, tukon bulaando kona boliiyano ko TEMENENO Na Bonua, sasaibino totuliso doi Tomundo-tomundo Na Kitab lalomo. Amazia Yoas namalane, teali tomundo posoboli tamano.