Read Banggai 2 TUNDUNAN 25 Bible Online

2 TUNDUNAN 25 - Banggai bible

2 TUNDUNAN 25

¹Amazia teali tomundo Yehuda salataa konaumur 25 kotaun, tukon maparenta doi Yerusalem 29 kotaun konakalumbit. Kotinano doiyamo Yoadan luwed oi Yerusalem.

²Amazia lakukene komo kindendeke ko TEMENENO noano, bai tongo sembeleng konoano.

³Sambuno tataap konakadudukan, yana ukume mate kopagawe-pagawe moakateyo kotamano.

⁴ Bai dopagawe-pagawedoo konapau-pau aki naakateyo sabab yana loingiyo ko TEMENENO naparenta mo totulis doi Musa Na Buku lalomo bunonaiya, “Inai moukume mate koorang tua sabab napau-pau nakalakuan mokulokis, tukon inai moukume mate kopau-pau sabab tamano nakulokisan kinubai. Sasamba komian tongo moola inukum mate sabab kulokisan yana mokubaiyo susuungo.”

⁵Tomundo Amazia pototongikene sasaibino ko Yehuda tukon Benyamin mian-miano benseno maka sumboliiyo yanila nakokondong suwe-suwele benseno, komokatuaiyo doiyamo pasukan soloon komondaano pasukan sakat komondaano. Lapa doiya yana lilike komian-komian mo 20 lobian kotaun konaumur momampu polobosi tukon pandoi pakeo kopandong tukon tombide. Yanila nakadaang daano ko 300.000 komian.

⁶Sangalaasan doiya yana tamboyo ko 100.000 komian kosuludadu luwedoi Israel tukon patambo uga-ugaate 3.400 kokilogram kosuasa.

⁷Bai meeng konabi lubat doi tomundo tukon bantile, “Inai mopakeo ko Israel nasuludadudoo, sabab ko TEMENENO aki natulungiyo ko Israel miano moluwedoi Batomundoan taalikon Lembet.

⁸Bai kalu Tomundo pakeyo yanila koidan, ko Mian Bisa naikon sodiikene komusuh nalungguiyo Tomundo nasuludadu mobukuan tukon barani. Sabab tolongo Mian Bisa tolong komo balakuasa beena manaangan kai kalaan.”

⁹Amazia sadaiyo, “Bai bulaandomokai tukon sasaibino kosuasa mo lapamo yaku beekene doi yanila?” Donabidoo timbiliyo, “Ko TEMENENO moola abalinggene doi Tomundo lobian doiya!”

¹⁰Tobikon doiya Amazia bebaskanggene kosuludadu-suludadu tamboanoo tukon sumboliiyo yanila mule doi natano. Yanilakai mule bai tukon nggimal tuuno.

¹¹Amazia kabaranikene kobutongo tukon babayo konasuludadu doi Asin Pepelakono. Yanila polobosi indaa tukon akateyo ko 10.000 ko Edom nasuludadu.

¹²Songulo koloon kobailon tinaan. Yanila binaba doi bunggul batu bunggono doi kota Sela maka sinakukon doi bilit sampe mate.

¹³Daanoon mobuno doiya ko Israel nasuludadu-suludadu molapamo Amazia sumboliiyo mule, tukon aki napinataikon malaing molobosi, lapamo lobosiyo kokota-kota Yehuda antara Samaria tukon Bet-Horon. Yanila akateyo ko 3.000 komian tukon lambase badaang kobarang.

¹⁴Sambuno lapa lungguiyo ko Edom nasuludadu, Amazia mule babayo ko Edom miano napilogot timba-timbalangoo tukon tampatkanggene doi Yehuda. Maka yana suayo kokamangian tuuk timba-timbalango tukon sosubaiyo.

¹⁵Donakokubaidoo kubaiyo ko TEMENENO teali nggimal. Yana bintekene komeeng konabi doi Amazia. Donabidoo bantile, “Bulaando Tomundo mososubaiyo kobangsa bailon napilogot mo aki namoola salamatene kona bangsa susuungo luwedoi Tomundo nakakuasaan?”

¹⁶“Tade,” Amazia bantile, “Kalu aki kami akatekon! Aki mai oduduke ikoo teali tomundo napongotinau!” Maka tademo donabidoo, bai akiyoon doiya yana moolamo mobantile, “Diabudodoo yaku toiyo baikon ko Mian Bisa lapamo putusiyo tuuk moakateyo Tomundo sabab Tomundodoo nakokubai, tukon sabab Tomundo aki namangangga daku otinau.”

¹⁷Amazia tomundo Yehuda tukon sasaibino kokolompok napongotinau lawane ko Israel. Yana bintekene kona bito-bito doi Yoas tomundo Israel, Yoahas napau, Yehu natumbu, sulano natantange kona polobosi.

¹⁸Bai Tomundo Yoas kapatuwo napotimbili nia, “Doi meeng kotempo komosolot mopalasoniton doi Libanon bunggulo makapatu nakakabi nia doi kauwalu batango, ‘He kauwalu batango, beekenemokai komupau boine doi kupau sulano nateali naboloki.’ Bai lapa doiya aloyokai idoo komeeng koiyayon mosolot motuda-tudange komosolot mosonitonoo.

¹⁹Ikoo, Amazia babanggaal baikon ikoo lungguiyomo ko Edom miano, bai lobian komonondok ikoo dungolo doi bonua. Tuuk oila mounggo-unggoliiyo kohal motolongo naikon silakaiyo kobutomu tukon murayat?”

²⁰Bai Amazia, tomundo Yehuda aki napusinggene Yoas tomundo Israel nabantilan-bantilan. Tukon ko Mian Bisa tutuu kubaiyo sulano Amazia nakinala sabab yana lapamo sosubaiyo kotimbalang Edom miano napilogot.

²¹Tobikon doiya Yoas ampakon tukon nasuludadu doi Bet-Semes maka polobosi tukon Amazia indaa.

²²Yehuda nasuludadu kalah tukon sasaibino kosuludadu dampas mule doi nabonua suwe-suwele.

²³Yoas lakoyo Amazia tukon babayo doi Yerusalem maka lubange dokotadoo natembok konakobulus ugate 200 kometer, tambuun luwedoi Tataapon Babasal Efraim polong doi Tataapon Sudut.

²⁴Sasaibino komosoni tukon suasa tukon sasaibino kopakakas mopinosuunggon doi TEMENENO Na Bonua tukon modaanoon doi Obed-Edom nadagaiyano, koidan sasaibino kobuat doi kamali, polaing kobubula komian motinaan Yoas babayo doi Samaria.

²⁵Sambuno lapa Yoas tomundo Israel mate, Amazia tomundo Yehuda daano koidan motubo 15 kotaun.

²⁶Salataa Amazia tinggalemo ko TEMENENO, komian poakoolo molawane yana doi Yerusalem. Tobikon doiya, yana dampas doi kota Lakhis, bai kona musuh-musu lelenggene yana dombalaa tukon inakate. Kobajano inalakit doi adalan kinanggi doi Yerusalem maka kinibul doi tomundo-tomundo nakinibulan doi Daud nakota. Kosalitano bailonggon tentang Tomundo Amazia luwedoi tumbeno polong doi maparentaan napupusan tinulis doi Tomundo-tomundo Yehuda tukon Israel Nabuku Tundun lalomo.