Read Banggai 2 TUNDUNAN 26 Bible Online

2 TUNDUNAN 26 - Banggai bible

2 TUNDUNAN 26

¹Sala lapa Amazia mate, sasaibino korayat Yehuda lilike konamalane Uzia teali tomundo. Doi tempodoo yana konaumur 16 kotaun. Kotinano sambuno doiyamo Yekholya, boine Yerusalem. Uzia maparenta doi Yerusalem 52 kotaun konakalumbit. Yanamokai komo lambase tukon mobangune koidan kokota Elot.

⁴Bunomokai tamano, Uzia koidan lakukene komo sanaanggene ko TEMENENO noano.

⁵Zakharia konapongotinau rohani, doi nadaanoan Zakharia motubo, Uzia tukon setia bakaleda doi TEMENENO tobikon ko TEMENENO nabalakaatiyo.

⁶Uzia polobosi lawane ko Filistin miano. Yana lubange kotembok-tembok kota Gat, Yabne, tukon Asdod, maka kekendenge kokota modaano kobentengo loolani ko Asdod tukon doi lipu bailon doi Filistin.

⁷Ko Mian Bisa tulungiyo yana mokalayo ko Filistin miano, tukon Arab miano mo dungol doi Gur-Baal tukon Meunim miano.

⁸Ko Amon miano babaeal lulu doi Uzia. Yana pololokon balakuasa tobikon kosambuno totoi polong Mesir.

⁹Tuuk mokeenggele kokota Yerusalem, Uzia mokokondong menara doi Tataapon Babasal Sudut, doi Tataapon Babasal Pepelakon tukon doi tembok nasikuan.

¹⁰Yana koidan mokokondong menara-menara modaano kobentengo doi lipu padang, tukon makali badaang kobubung sabab konaiyayon piniala badaang tuuno, mau doi lipu motatandak maukai doi lipu mopepende doi taalikon talise. Sabab yana kona inutamakanggon doi pertanian, maka yana sumboliyo badaang komian mobalimang tuuk mobukayo koanggur asi-asino doi lipu mobunggukon tukon tuuk molimang kobuta doi lipu-lipu momolumbang.

¹¹Uzia badaang tuuno konasuludadu mosidutu siap mopolobosi. Yanila doiyamo pomeenggonan-pomeenggonan kona kadaang lua kotomundo nadulutulis komo tulise, doiyamo Yeiel tukon Maaseya Hananya komo katuaiyo meeng komian tomundo napagawe.

¹²Sasaibino dosuludadudoo nakadaang 307.500 kosuludadu komo katuaiyo 2.600 kokapalano. Yanila sasaibino daano konakamampuan mobabasal tuuno tuuk polobosi tukon motomboniiyo kotomundo mokalayo komusuh.

¹⁴Uzia lenggkapiyo konasuludadudoo tukon tombide, pandong, songko baja, kalambi besi, pana batango tukon pana matano tukon dimbaalot.

¹⁵Doi Yerusalem sasaibino komopandoikene konasenjata lapamo koalat momoola panakene kopana matano tukon batu babasal luwedoi menara lalomo tukon tembok pasu-pasuno. Uzia tololongol doiyayaa, tukon yana teali balakuasa tuuno sabab ko Mian Bisa tulungiyo tuuno yana.

¹⁶Tomundo Uzia bukuano, yana tealimo sombong, tukon doiya tealikene sabab konasilakaan. Yana lengele ko TEMENENO na Mian Bisa naparentah sabab usok doi TEMENENO Na Bonua tuuk momosua kamangian doi balabaan kamangian bunggono.

¹⁷Bai Imam Azarya polaing ko 80 koimam bailon mobuku-bukuan tukon barani lainge yana

¹⁸tuuk motatange donakokubaidoo. Yanila bantile, “Tuan Moinodotii! Tomundo akiyo konahaak mosua kamangian tuuk TEMENENO, doiya imam-imam Harun nakaturunan nalimang sabab yanilamokai komo tinatapkanggon tuuk doiya. Sio Tomundo natinggalemo kotampat momoliyous nia! Tomundo lawanemo ko TEMENENO Mian Bisa tukon akikai namalaat salamat.”

¹⁹Doi tempodoo Uzia daano mokokondong loolani kokamangian balabaano doi TEMENENO Na Bonua tukon pakakas posua kamangian doi limano. Yana nggimoliiyo doi imam-imamoo, tukon mosoisobit sumbut kopanakit kulit mominatakuton doi bonggoto.

²⁰Asarya tukon imam-imam bailon kitayo doiyana tukon kaget tuuno, maka desaake sulano yana natinggale ko TEMENENO Na Bonua. Moso-mosobit sumbut sabab ko TEMENENO ukumemo yana.

²¹Sampe Tomundo Uzia mate donapanakitoo aki natanga-tangalin. Yana biniol doi meeng kobonua tukon aki napinataikon koidan mousok doi TEMENENO Na Bonua. Yana sinodiikono luwedoi nalimang-limang, tukon Yotam namalane parentayo korayat salaku nawakil.

²²Kosalitano bailon tentang Tomundo Uzia namaparentaan lapamo Nabi Yesaya Amos napau tulise.

²³ Salataa mate, Uzia kinibul doi buta lolani lolani kotomundo-tomundo nakinibulan, bai bolikon doi bakibulanoo susuungo sabab yana kanakon panakit kulit mo minatakuton. Konamalane Yotam teali tomundo posobolino yana.