Read Banggai 2 TUNDUNAN 28 Bible Online

2 TUNDUNAN 28 - Banggai bible

2 TUNDUNAN 28

¹Ahas natealian tomundo konaumur 20 kotaun, tukon yana maparenta doi Yerusalem 16 kotaun konakalumbit. Yana aki namoloingi sontoh momonondok luwedoi Tomundo Daud, tumbunoila, bainokai lakukene komo aki nasanaanggene ko TEMENENO noano.

²Yana tubo buno Israel tukon sumboliiyo komian mokubai timbalang-timbalang Baal luwedoi tambaga,

³tukon mosua kamangian doi Hinom Pepelakono. Tukonkai namalane susuungo mososubakene salaku sosubakon doi pilogot, mololoi nakabiasaan molokis mian-mian molapamo TEMENENO siikayo luwedoi tano Kanaan salataa ko Israel miano usok doi tanodoo.

⁴Ahas mososubakon sosubakon tukon mosua kamangian doi tampat-tampat mososubaiyan pilogot doi bunggul-bunggul tukon doi kayung-kayung momasalimbung suukano.

⁵ Sabab Tomundo Ahas baladosa, ko TEMENENO na Mian Bisa sodiikene yana tomundo Siria nalungguiyo tukon koidan moakute ko Yehuda mianoila salaku mian motinaan doi Damsyik. Ko TEMENENO koidan sodiikenemokai Tomundo Pekah Remalya napau moluwedoi Israel nalungguiyo yana, mo doi meeng kooloyo lalomo inakate 120.000 kosuludadu Yehuda mobarani-barani. Ko TEMENENO tumbunoila na Mian Bisa komo batadikenemo doiya sasaibino nateali, sabab ko Yehuda miano akimokai napopusinggon ko TEMENENO.

⁷Ahas namalane, kosambuno Maaseya Zikri meeng ko Israel nasuludadu kapalano komo akateyo. Zikri koidan akateyo Azrikam moulusiyo ko tomundo nakamali, tukon Elkana, tomundo napotombonii momonondok.

⁸Maukai ko Yehuda mian-miano doiyamo bangsa Israel tulano, bai Israel nasuludadu tawane ko 200.000 koboine tukon pau-pau, maka akute yanila doi Samaria polaing-polaing tukon badaang tuuno kobarang molinambas.

⁹Meeng ko TEMENENO nanabi kosambuno Obed dungol doi kota Samaria. Doi tempo ko Israel nasuludadu abali momababa tawanan luwedoi Yehuda, Obed posuunggene yanila salataa yanila naikon usoko doi kota. Yana bantile, “Komuyu lapamo lungguiyo ko Yehuda miano sabab ko TEMENENO tumbumuyu na Mian Bisa nggimoliiyomo yanila. Bai ko TEMENENO ndongoliiyo bulaandokai kopo nggimalan moakateyo ko Yehuda nasuludadudoo.

¹⁰Tukon diabudodoo ko Yerusalem tukon Yehuda mian-miano naikon komuyu tealikene muata-ata! Akikai potoiyo baikon komuyu lapamo baladosa doi TEMENENO mu Mian Bisa?

¹¹Ndongoliiyo! Sasaibino namian nia mo tinaan daanokai utus-utusomu. Jadi, sumboliiyomo yanila namule. Kalu aki, ko TEMENENO naikon nggimal tukon ukume komuyu.”

¹²Sanggap kopaulakai moluwedoi Israel, doiyamo Azarya Yohanan napau, Berekhya Mesilemot napau, Yehizkia Salum napau, tukon Amasa Hadlai napau, koidan tantange kosuludadu momuledoo natindakan.

¹³Yanila bantile, “Inai mobabayo doisumai domian-mianoo motinaan! Kita baladosamo doi TEMENENO, tukon ndalalim-lalim babasal tuuno tukon pantaso ndahinukum. Diabudodoo komuyu yase mokubai lobo motolongo naikon suungiyo konda salah.”

¹⁴Maka dosuludadu-suludadudoo salakanggene sasaibino dotawananoo tukon barang-barang nalinambasoo doi rayat tukon doi nakatua-katua.

¹⁵Maka sangkap dolakaidoo kokondong tuuk mouluse sasaibino domotinaanoo. Yanila obosikene kopakean luwedoi barang mo linambasoo doi sasaibino komotinaanoo mopalaluu. Yanila koidan poobosikene kosapatu, kinaan, tukon moininum. Sasaibino komian motinaanoo modaano kona pakol-pakol pinakuli tukon zaitun lisisono. Motodudul muyuk tuuk moampakon, inalakit doi keledai bungguno, maka sasaibino domotinaanoo binaba doi Yerikho, kota kurma bata-batango, sulano namoola mule doi napai kampung doi Yehuda. Lapadoiya ko Israel miano mule doi Samaria.

¹⁶Ko Edom mian-miano tambuno koidan lobosiyo ko Yehuda tukon badaang komian konatinaan. Sabab doiya Tomundo Ahas kabiyo doi Tiglat-Pileser, tomundo Asyur sulano namosumbolii potombonii.

¹⁸Doi tempodoo koidan ko Filistin mianoila daano molobosiyo kokota-kota doi lipu bunggul uuno taalikon doi talise; tukon doi Yehuda lipuno taalikon doi lalom. Yanila lambase kokota Bet-Semes, Ayalon, tukon Gederot, tukota Sokho, Timna tukon Gomzo tukon kampung-kampung doi napololanikonan tolu dokotadoo, maka manataapo idoo.

¹⁹Sabab Ahas tomundo Yehuda tinggalemo ko TEMENENO tukon aki naparentayo korayat bunokai natutuuwan, maka ko TEMENENO lubatene kosusaan doi Yehuda.

²⁰Tomundo Asyuroo bolikon lubat tuuk tomboniiyo Ahas, bainokai tuuk kubaiyo susah.

²¹Ahas tapakisaa alayo komosoni luwedoi TEMENENO Na Bonua, luwedoi kamali, tukon luwedoi sasaibino kobonua-bonua mokatuaiyo korayat, maka nasalakanggene doi tomundo Asyur. Bai doiyakai akiyo kotakoso doiyana.

²²Doi ndondoong lalomo mosulit tuunodoo, Ahas pololokon baladosa doi TEMENENO.

²³Yana silakakene kobutongo tukon narayat sabab sosubakene kososubakon doi Siria miano napilogot-pilogot molapamo lungguiyo yana. Yana pikikene, “Ko Siria miano napilogot-pilogot lapamo tomboniiyo kotomundo-tomundo Siria, jadi kalu yaku mososubakon sosubakon doi yanila, baanggokai yaku naikon tinomboniikai.”

²⁴Doibundu yana alayo sasaibino ko TEMENENO Na Bonua pakakaso maka namanase. Maka tinatapikono ko TEMENENO Na Bonua, tukon binanguno kobalabaan-balabaan doi posaapon ko Yerusalem.

²⁵Doi sasamba kokota tukon kampung doi Yehuda yana bangune kotampat-tampat mososubaiyan pilogot tuuk mosuaan kamangian doi bangsa-bangsa bailon napilogot-pilogot. Tukon buno doiya yana tealikene ko TEMENENO, sasaibino kotumbunoila na Mian Bisa nggimoliiyo doiyana.

²⁶Kosalitano bailon tentang namaparentaan tukon sasaibino konakokubai luwedoi tumbeno polong doi napangabisan tinuliso Tomundo-tomundo Yehuda tukon Israel Nabuku Tundun lalomo.

²⁷ Ahas mate, tukon kinibul doi Yerusalem, bai aki nakinibul tomundo-tomundo nakinibulan. Konamalane Hizkia teali tomundo posobolino yana.