Read Banggai 2 TUNDUNAN 29 Bible Online

2 TUNDUNAN 29 - Banggai bible

2 TUNDUNAN 29

¹Hizkia natealian tomundo Yehuda konaumur 25 kotaun, tukon yana maparenta doi Yerusalem 29 kotaun konakalumbit. Kotinano kosambuno Abia Zakharia napau.

²Hizkia kubaiyo komo sanaanggene ko TEMENENO noano buno tumbunoila Daud.

³Doi bituwon komeengo taun tumbeno lalomo konamaparentaan, Hizkia bukayo ko TEMENENO Na Bonua tataapon-tataapono maka sumboliiyo komian mokikindeke,

⁴Imam-imam tukon Lewi miano sinumbolii pototongi doi TEMENENO Na Bonua basaleano taalikon doi talise,

⁵tukon yana basilingan tukon yanila imbali. Yana bantile, “Komuyu, Lewi mianoila sio nabangalaason butong tuuk TEMENENO, tukon ko TEMENENO Na Bonua kiniliyousi, Mian Bisa mumbumbu: Sasaibino kadikitiyo dobonuadoo sio nakinaluar.

⁶Kotumbunggita aki nasetia doi nda TEMENENO Mian Bisa tukon yanila tongo kubaiyo komo aki nasanaanggene konoano. Yanila aki napusinggene yana tukon aki napaduliyo konatampat dungolan.

⁷Yanila tutupe ko TEMENENO Na Bonua tataapon-tataapono tukon posoiyo koposi-posino. Yanila aki namosua kamangian doi TEMENENO Na Bonua, tukon aki namososubakon sosubakon mosinua doi Mian Bisa Israel miano mososubaiyo.

⁸Maka ko TEMENENO nggimoliiyo yanila tukon hukume ko Yehuda miano tukon Yerusalem. Tukon komuyu sasaibino toiyo bulaando ko TEMENENO doo natindakan molapamo kubaiyo sasaibino komian tukon tano busak konoano.

⁹Kotama-tamanggita mate doi polobosian lalomo, tukon ndapau boloki inakut bunokai tawanan.

¹⁰Diabudodoo yaku yase mokubai paladandian tukon TEMENENO, Israel na Mian Bisa, sulano yana naaki nanggimal koidan doi kita.

¹¹Komuyu dakupau-pau, inaimokai motunda-tundayo koidan, sabab komuyumukai ko TEMENENO nalinilik tuuk doi bakaledaan tukon loingiyo doiyana tukon mosua kamangian tukon katuaiyo korayat tuuk bakaledaan.”

¹²Ko Lewi mian-miano, modaano doi tempodoo doiyamo: Luwedoi Kehat benseno: Mahat Amasai napau, tukon Yoel Azarya napau Luwedoi Merari benseno: Kish Abdi napau, tukon Azarya Yehaleel napau Luwedoi Gerson benseno: Yoah Zima napau, tukon Eden Yoah napau Luwedoi Elisafan benseno: Simri tukon Yeiel Luwedoi Asaf benseno: Zakharia tukon Matanya Luwedoi Heman beseno: Yehiel tukon Simei Luwedoi Yedutun benseno: Semaya tukon Uziel

¹⁵Lapa doiya yanila pototongikene ko Lewi miano bailon, maka yanila sasaibino koliyousiyo kobutongoila. Lapa doiya, pokokonoi tukon tomundo naparenta, sasaibino koimam usok doi TEMENENO Na Bonua lalomo tukon tambuun koliyousiyo mololoi TEMENENO Naukum-ukum. Sasaibino komo lokis binaba doi TEMENENO Na Bonua basaleano tonggulungo. Luwe idoo ko Lewi miano babayo doi Kidron Pepelakono doi kota tonggulungo.

¹⁷Dolimangoo tinambuun doi tanggal komeengo bituwon komeengo. Doi tanggal koaluno yanila lapamo koliyousiyo sasaibino ko TEMENENO Na Bonua basaleano polong doi kantor salaano. Doibundu alu kooloyo konakalumbit koidan yanila koliyousiyo dogedungoo posaapon polong doi tanggal 16 bituwonoo maka nalapa.

¹⁸Maka ko Lewi mian-mianodoo bontiikene doi Tomundo Hizkia, “Kami lapamo koliyousiyo posaapon ko TEMENENO Na Bonua, tongusokon kobalabaan sosubakon mosinua, meda tuuk roti kinaan, tukon sasaibino kopakakaso.

¹⁹Kami koidan lapamo mangala pakakas-pakakas Tomundo Ahas mo alaasemo doi tempo naakiyan napusinggene ko TEMENENO doi tempo namaparentaan lalomo. Sasaibino dopakakasoo lapamo kami alaase koidan tuuk TEMENENO, tukon diabudodoo daanoon doi balabaan salaano.”

²⁰Aki namototiili malu-malumbit Tomundo Hizkia pototongikenemo komasyarakat laka-lakaino, maka taus polaing-laing yanila doi TEMENENO Na Bonua.

²¹Tuuk sosubakon pongompuni lalim tuuk tomundo nakaluargaa Yehuda miano, tukon tuuk mokiniliyousi ko TEMENENO Na Bonua, yanila mababa 7 kosapi langgilo, 7 kodomba langgilo, 7 kodomba napau, tukon 7 mbembe langgilo. Tomundo sumboliiyo koimam-imam Harun nakaturunan mososubakene doiyayon-iyayonoo doi balabaan bunggono salaku sosubakon mosinua.

²²Dosapi-sapidoo tinembel maka koimam-imam bubusikene kosauno doi balabaan. Doibundu yanila kubaiyo bunodoiya tukon pitu kodomba tukon pitu kodomba napaudoo.

²³Doibundu yanila alayo dombembedoo tukon babayo doi tomundo tukon doi rayat modaano mobakaleda idoo, maka yanila sasaibino binggakene kolimanoila doi mbembedoo bunggono.

²⁴Lapadoiya dombembedoo imam-imam komo tembele tukon kosauno kinundongiikon doi balabaan salaku sosubakon potolos lalim sasaibino korayat. Yanila lakukanggene dolanggedoo sabab tomundo lapamo maparentakene sulano kososubakon mosinua dinaakon tukon sosubakon poompuni lalim tuuk sasaibino Israel miano.

²⁵Pokokonoi tukon TEMENENO napotudoikon-potudoikon bineekon doi Daud lolodoi Nabi Gad, mobalimang tuuk tomundo tukon lolo doi Nabi Natan, tomundo tampatkanggene ko Lewi mian-miano doi TEMENENO Na Bonua tuuk mobakasapi tukon mobagambus,

²⁶buno Daud napinake. Koidan sasaibino koimam tinampatkanggon idoo tukon torompet.

²⁷Hizkia mebee paloosan sulano koupacara mososubakonan sosubakon tinambuuno. Daanoon kososubakon mosinosubakon, komian-mian tambuuno momananikene konggaalano doi TEMENENO tukon momaenggene komusiik puuke kotorompet tukon pakakas musik bailon.

²⁸Tomundo Hizkia tukon sasaibino komian modaano idoo sosuba doi TEMENENO daanoon sasaibino kopenyanyi banggadudul mananikene tukon sasaibino kopomaen musiik banggadudul maenggene konamusik sampe sasaibino dososubakonoo tosua kabus.

³⁰Tomundo tukon sasaibino kolaka-lakai doi masyarakat sumboliiyo ko Lewi mian-miano namananikene kongganggaalano ko TEMENENO Daud tukon Nabi Asaf mokarange. Sasaibino komian manani tukon tedes tuuno maka pabituul tukon sosubaiyo ko Mian Bisa.

³¹Lapa doiya Hizkia bantile, “Sabab dibudodoo komuyu lapamo inalaas tuuk TEMENENO, maka salaku musosubakon syukur, komuyu sio pomababa sosubakon doi TEMENENO Na Bonua.” Maka sasaibino komian mo daano idoo mababa sosubakon-sosubakonoo, tukonkai daano koidan mo tukon noano momoloyos mababa iyayon-iyayon tuuk mosinosubakon salaku sosubakon mosinua.

³²Yanila babayo ko 70 kosapi langgilo 100 kodomba, tukon 200 kodomba napau tukon sosubakene teali sosubakon mosinua doi TEMENENO.

³³Yanila mababa koidan idoo 600 kosapi langgilo tukon 3.000 kodomba sulano nasinosubakon tukon kinaan posinggat sasaibino komo daano idoo.

³⁴Koimam-imam mo lapamo koliyousiyo kobutongo tolongo soisik konakadaang tuuk mokanite sasaibino doiyayonoo. Tobikon doiya ko Lewi mian-miano tomboniiyo yanila, sabab ko Lewi miano setia tuuno doi peraturan bakiliyousian. Yanila tataap motombonii sampe sukup koimam molapamo koliyousiyo kobutongo.

³⁵Mobolikon sosubakon mosinua, sasaibino koimam koidan sosubakene koinak luwedoi sosubakon syukur rayat mokaane. Yanila mososubakon koidan anggur mo kinundang pososinggat kososubakon mosinuadoo. Bunomokai doiya kona kinubaiyan koidan kobakaledaan doi TEMENENO Na Bonua.

³⁶Maka Tomundo Hizkia noano sanaango tukon narayat sabab doi tempo mopalus lalomo ko Mian Bisa lapamo tomboniiyo yanila molakukene sasaibino doiya.