Read Banggai 2 TUNDUNAN 3 Bible Online

2 TUNDUNAN 3 - Banggai bible

2 TUNDUNAN 3

¹ Tomundo Daud lapamo tatukanggene baikon TEMENENO Na Bonua sio nabinangun doi Yerusalem doi Moria Bunggulo doi tampat gandum natinudongian Arauna Yebus miano koonila. TEMENENO Na Bonua bangunano doo.

²Tomundo Salomo atambunemo, doi bituwon kolua taun kosanggapo doi nabapamarentaan.

³Bonua doo nakobulus 27 meter tukon kokinobintingo 9 meter.

⁴Konakobulus doi ruangan salaano pokakana tukon kokinobintingo Bonua doo, doi yamo 9 meter. Konakatandak 54 meter tambikon doi lalom doi ruanganoo molinapis tukon mosoni tuleng.

⁵Ruangan moutama sinoani tukon dopi tukon kayung cendana momonondok tukon linapis tukon mosoni tua. Doi lapisodo mosoni daano kobatiko gambal kayung palem tukon gambal rante.

⁶Tomundo hiasio Bonua doo tukon batu montotilang momondok tukon mosoni moilubaton luwedoi lipu Parwaim.

⁷Yana mapake mosoni doo koidan tuuk palapis beton-beton TEMENENO Na Bonuadoo, kona sudong-sudong, sudong-sudong tataapon tukon natataapon-tataapon. Konabeton-beton binotik tukon gambal malaekat.

⁸ Ruangan lalom sinumbuikon Kombiang Momoliyous tuuno kona kobulus 9 meter tukon kokinobintingo 9 meter, pokakana tukon TEMENENO doo Na Bonua kokinobintingo. Lua kolono koton komosoni mopinake tuuk palapis beton-beton Kombiang Momoliyous tuuno,

⁹tukon 570 gram komosoni tuuk kinabai paku. Beton ruangan-ruangan taikon doibungkuk linapis tukon mosoni.

¹⁰ Tomundo koidan sumbolio saibino domo balimangoo napo mokubai lua kotimbalang malaekat luwedoi tambaga. Dotimbalang-timbalangoo linapis tukon mosoni tukon inabos pokolanikon doi Kombiang Momoliyous tuuno sasalane kotataapon. Samba do malaekatoo dano kolua kokapilo, sosuele konakobulus 2,2 meter. Kapi-kapilodoo tabuka buno doiya kona lupa sampe doi meeng kobunduno posinggil doi ruangan tangano tukon bunduno bailon latemo kobeton doi babo bakalinga, jadi, kapilo-kapilo doo tobuka kona kobulus 9 kometer doiyamo pokakana kokinobintingo doruangandoo.

¹⁴ Tuuk Kombiang Momoliyous tuuno kinabai koidan bagantungan toik lenan tukon toik bailon mobabatik manampal same-samelaon, tukon memela. Bagantungandoo binubungai tukon malaekat timba-timbalango.

¹⁵Tomundo makabai lua kosudong sue-suele kona katandak 15,5 meter, maka naabese doi TEMENENO Na Bonua salaano. Sasamba dosudongoo kona katandak 2,2 meter.

¹⁶Taikon doi bungkuk dosudong-sudongoo kinindok tukon binubungai luwedoi tambaga, buno rante moinanam tukon 100 kodelima saano.

¹⁷Dosudong-sudongo kinokondong taikon doi bobo tukon bakalinga kotataapon usokan doi TEMENENO Na Bonua; motambikon doi lalom sinumbuikon Yakhin, tukon taikon doi lembet sinumbuikon Boas.